فوتو: سۋ رەسۋرستارى جانە يرريگاتسيا مينيسترلىگى
سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە سالا ۆەدوموستۆوسى بيىل قىتايلىق Power China كومپانياسىمەن وتاندىق مامانداردى قحر-دا بىلىكتىلىك ارتتىرۋ كۋرستارىنان وتكىزۋ تۋرالى كەلىسىمگە كەلگەن. كۋرستار ءار توقسان سايىن ءوتىپ, وعان جالپى سانى 105 مامان قاتىسادى.
ەسكە سالايىق, بىلتىر 500-دەن استام سۋشى مامان بىلىكتىلىك ارتتىرۋ كۋرستارىنان ءوتتى. بۇل باستاپقى جوسپاردان 12%-عا ارتىق.
سالا مينيسترلىگىنە قاراستى عىلىم جانە يننوۆاتسيا دەپارتامەنتىنىڭ سۋ شارۋاشىلىعىنداعى ادام رەسۋرستارىن دامىتۋ باسقارماسىنىڭ باسشىسى ديدار جانىبەك ۇلىنىڭ ايتۋىنشا مامانداردى دايارلاۋ جانە قايتا دايارلاۋ – ەلىمىزدىڭ سۋ سالاسىن جاڭعىرتۋدىڭ ماڭىزدى باعىتى.
«مەملەكەت باسشىسىنىڭ تاپسىرماسى بويىنشا تاراز قالاسىندا ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى اشىلدى, وندا 200-گە جۋىق ستۋدەنت وقيدى. ءبىزدىڭ مينيسترلىك سۋ سالاسى ءۇشىن كاسىبي ستاندارتتاردى ازىرلەيتىن كاسىپتىك بىلىكتىلىك جونىندەگى سالالىق كەڭەس قۇردى. ونىڭ نەگىزىندە وتاندىق جوعارى وقۋ ورىندارى وزدەرىنىڭ ءبىلىم بەرۋ باعدارلامالارىن وزەكتەندىرەتىن بولادى», دەدى ول.
