ستاتيستيكاعا سۇيەنسەك, ەلىمىزدە «Instagram»-عا – 12,1 ملن, «Facebook»-قا – 2,6 ملن, ال «TikTok»-قا 14,1 ملن قولدانۋشى تىركەلگەن. سوڭعى اتالعان پلاتفورمانىڭ قازاق قوعامىنا قانشالىقتى تامىر جايىپ ۇلگەرگەنىن وسى دەرەكتەن ايقىن اڭعارامىز. بۇنى قولدانا الساڭ – يگىلىگىڭ, قولدانا الماساڭ – قيعىلىعىڭ. سوندىقتان جەتكىنشەكتى جەتەكتەگەن جەلىدە قىزىقتى ءھام پايدالى كونتەنتتىڭ وتە-موتە كوپ بولعانى دۇرىس.
«بۇل بايقاۋدى ءۇشىنشى رەت وتكىزىپ وتىرمىز. جەلىدەگى جارىسقا قىزىعۋشىلىقتىڭ جىل سايىن ارتىپ كەلە جاتقانى ايقىن اڭعارىلادى. اتالعان جوبا پەداگوگتەردى شىعارماشىلىق تاسىلدەر ىزدەۋگە شابىتتاندىرىپ, ءبىلىم الۋدى قىزىقتى ەتىپ كورسەتەدى دەپ ۇمىتتەنەمىز. ۆيزۋالدى جانە ينتەراكتيۆتى فورماتتار ۇستازدارعا اقپاراتتى قولجەتىمدى ءارى تارتىمدى ەتىپ جەتكىزۋگە كومەكتەسەدى», دەدى ورتالىق ازياداعى «TikTok» وپەراتسيالىق ءبولىمىنىڭ باسشىسى سايف مۋدجاحيد.
ەندى مىڭنان جۇيرىك شىققان ءۇش جەڭىمپازدى تانىستىرىپ وتەيىك. بايبولات سەيداحان – ماتەماتيكا ءپانىنىڭ مۇعالىمى. ول قازاق تىلىندە ميلليونداعان قارالىم جينايتىن بەينەجازبالار دايىندايدى. تانىمالدىلىعىنىڭ سىرى – كۇردەلى ەسەپتەردىڭ شەشۋ جولدارىن قاراپايىم ءارى تۇسىنىكتى ەتىپ ءتۇسىندىرۋى, سونداي-اق لوگيكالىق تاپسىرمالار ۇسىنۋى. بايبولات ماتەماتيكالىق ءبىلىمنىڭ ومىردەگى ناقتى ماسەلەلەردى شەشۋگە قالاي كومەكتەسەتىنىن كورسەتىپ, تەوريانى پراكتيكامەن ۇشتاستىرادى. ونىڭ باستى ماقساتى – ماتەماتيكانى تەك فورمۋلالار جيىنتىعى ەمەس, الەمدى تانۋدىڭ قىزىقتى قۇرالى رەتىندە تانىستىرۋ.
ال ەۆگەني سولونيتسىن – وقۋشىلارعا جاقىن تىلدە سويلەيتىن جاس مۇعالىم. ول الگەبرا جانە گەومەتريا پاندەرىن جەڭىل ءارى تارتىمدى ەتىپ ءتۇسىندىرۋ ءۇشىن ءازىل مەن كۇندەلىكتى ومىردەن الىنعان مىسالداردى شەبەر پايدالانادى. ماسەلەن, ءبىر بەينەجازباسىندا شولدەگى قۇمنىڭ مولشەرىن قالاي ەسەپتەۋگە بولاتىنىن تۇسىندىرەدى. ەۆگەنيدىڭ وقىتۋ ءادىسى كوپشىلىكتىڭ قىزىعۋشىلىعىن تۋدىرىپ, ماتەماتيكاعا دەگەن كوزقاراسىن وزگەرتەدى.
«TikTok»-تاعى تاعىلىمدى تارتىستا وزا شاپقان تاعى ءبىر جەڭىمپاز – مارينا فرانگۋليدي. ول – 37 جىلدىق تاجىريبەسى بار پەداگوگ. پەداگوگ پلاتفورمادا تەك ءبىلىمىن عانا ەمەس, سونىمەن قاتار جەكە ويلارىن, اۆتورلىق ادىستەمەلەرىن ءبولىسىپ وتىرادى. ونىڭ كونتەنتى – مۇعالىمنىڭ جۇمىسىنا دەگەن ەرەكشە كوزقاراستىڭ كورىنىسى. مىسالى, ءبىر بەينەجازباسىندا وقۋشىلاردىڭ ومىردەگى جەتىستىكتەرىنە قانداي فاكتورلار اسەر ەتەتىنىن تالداپ, ءوز ويلارىن ورتاعا سالادى. مارينانىڭ ماتەريالى تەك وقۋشىلارعا عانا ەمەس, باسقا مۇعالىمدەرگە دە جىگەر بەرىپ, قولداۋ كورسەتەدى.
بۇل بايقاۋ «TikTok»-تا تاعىلىمدى كونتەنتتىڭ ماڭىزدىلىعىن كورسەتىپ قانا قويماي, ۇستازداردىڭ شىعارماشىلىعىن دامىتىپ, وقىتۋدى جاڭا فورماتتا ۇسىنۋعا جول اشتى. مۇنداي باستامالار ءبىلىم مەن تەحنولوگيانى ۇيلەستىرىپ, جاس ۇرپاقتىڭ قىزىعۋشىلىعىن ارتتىرۋعا ىقپال ەتەتىنى ءسوزسىز.
