سۋرەت - ءارتۇرلى بوياۋلارمەن: اكۆارەلمەن (قاعازعا نەمەسە كارتون), مايلى بوياۋمەن (حولستقا, كارتونعا, اعاشقا), پاستەلمەن (ەرەكشە ءتۇرلى-ءتۇستى قارىنداشتارمەن قاعازعا نەمەسە كارتونعا) سالىناتىن ونەر ءتۇرى.
عالىمدار سۋرەت سالۋدىڭ ۇكىمىن ەكىگە ءبولىپ قاراستىرادى:
جانسىز زاتتاردىڭ سۋرەتىن سالۋ. ءتورت ءمازھابتىڭ (حانافي, ماليكي, شافيعي, حانبالي) عالىمدارى جانسىز نارسەلەردىڭ سۋرەتىن سالۋعا رۇقسات ەتىلگەندىگىنە ءبىراۋىزدان كەلىسكەن.
«يبن ابباستان جەتكەن ريۋاياتتا سۋرەت سالۋشىعا: "بۇدان باسقا جۇمىس جاساي الماساڭ, مىنا اعاشتىڭ سۋرەتىن نەمەسە كەز كەلگەن جانسىز زاتتى بەينەلە" دەگەن», دەلىنگەن جازبادا.
ءتىرى جاننىڭ سۋرەتىن سالۋ. بۇل - عۇلامالاردىڭ اراسىندا تارتىستى تاقىرىپ. جۇمھۋر (حانافي, شافيعي, حانبالي) عالىمدارى ءتىرى جاننىڭ تولىق بەينەسىن سالۋعا تىيىم سالعان.
«پايعامبارىمىز قيامەت كۇنى قاتتى ازاپقا تارتىلاتىندار - سۋرەتشىلەر, دەگەن. ماليكي ءمازھابىنىڭ جانە زامانىمىزدىڭ كوپتەگەن عالىمى كولەڭكەسى جوق جانى بار نارسەلەردىڭ سۋرەتتەرىن سالۋعا رۇقسات بەرەدى. سەبەبى پايعامبارىمىزدىڭ كەزىندە كولەڭكەسى جوق سۋرەتتەردى قولدانعانى تۋرالى ريۋاياتتار كەلگەن. تەك ونى كەيبىر سەبەپتەرگە بايلانىستى عانا قۇپتاماعان. ال سۋرەت سالۋعا تىيىم سالىنعان حاديستەردى كولەڭكەسى بار سۋرەتتەرگە قاتىستى كەلگەن دەپ تۇسىندىرەدى», دەلىنگەن حابارلامادا.
دەسە دە, عالىمدار سۋرەت سالۋعا تىيىم سالىنعان حاديستەردىڭ قۇرامىنا جانى بار نارسەنىڭ بەينەسىندەگى ويىنشىقتاردىڭ كىرمەيتىنىن ايتقان. سەبەبى ونىڭ بالانىڭ جاقسى ءوسىپ, قالىپتاسۋىنا جانە بالا تاربيەسىنە پايداسى مول.
«وسى رەتتە زامانىمىزدىڭ عالىمدارى ويىنشىققا سالىستىرىپ, ءبىلىم بەرۋ ماقساتىندا جانى بار نارسەنىڭ سۋرەتىن سالۋعا رۇقسات بەرگەن. سونداي-اق تاربيەلىك ءمانى بار, پايدالى, شاريعاتتىڭ قاعيداتتارىنا قايشى كەلمەيتىن مۋلتفيلمدەردى شىعارۋعا دا رۇقسات ەتىلەدى», دەلىنگەن حابارلامادا.
شەشىم:
جانسىز زاتتىڭ سۋرەتىن سالۋعا رۇقسات ەتىلەدى.
ءبىلىم بەرۋدە, عىلىمي ماقساتتا جانى بار نارسەنىڭ سۋرەتىن سالۋدىڭ وقاسى جوق.
تاربيەلىك ءمانى بار, شاريعاتتىڭ قاعيداتتارىنا قايشى كەلمەيتىن مۋلتفيلمدەردى شىعارۋعا بولادى.
پايعامبارلاردىڭ بەينەسىن بەينەلەۋ - حارام.
