سۋرەت: gazeta.ru
اباي وبلىسىنىڭ پوليتسيا دەپارتامەنتىنە قاراستى ءبولىمنىڭ باستى مىندەتىنە زارداپ شەككەندەرگە جەدەل كومەك كورسەتۋ, ءتيىمدى شارالار قولدانۋمەن قاتار الىمجەتتىكتىڭ الدىن الۋ ماسەلەسى دە كىرىپ وتىر. جاڭادان قۇرىلعان ءبولىم كەلەشەكتە جازا باسقانداردى بىردەن جازاعا تارتۋدى عانا قاراستىرماي, كەلەڭسىز جاعدايعا تاپ بولعان وتباسى مۇشەلەرىمەن تىعىز قارىم-قاتىناس ورناتىپ, وڭتايلى قىزمەت اتقارۋدى ماقسات ەتىپ وتىر. بۇعان قوسا اتالعان ءبولىم زورلىق-زومبىلىق تۋرالى ارىز-شاعىمدارعا دەر كەزىندە جاۋاپ قاتىپ, جەدەل ارەكەت ەتۋدى, ءجيى قايتالاناتىن وقيعالاردىڭ الدىن الۋ مەن زارداپ شەككەندەرگە بىلىكتى زاڭگەرلىك, الەۋمەتتىك جانە پسيحولوگيالىق قولداۋ كورسەتۋدى مىندەت ەتىپ جۇكتەيدى.
وتكەن جىلى وڭىردە 3 548 تۇرمىستىق قۇقىق بۇزۋشىلىق ارەكەتىنىڭ جولى كەسىلگەن. 3,5 مىڭنان اسا ادام پروفيلاكتيكالىق ەسەپكە الىندى. بۇل تۇرمىستىق زورلىق-زومبىلىقتىڭ كۇن ساناپ ءورشىپ تۇرعانىنىڭ, ۇدايى كۇرەستىڭ وزەكتىلىگىنىڭ ايقىن دالەلى بولسا كەرەك. جاڭا قۇرىلعان ءبولىم داعدارىس ورتالىقتارىمەن, مەديتسينالىق مەكەمەلەرىمەن, قوعامدىق ۇيىمدارمەن تىعىز جۇمىس ىستەيدى. بۇل جابىرلەنۋشىلەرگە كەشەندى كومەك كورسەتۋدىڭ جۇيەسىن قۇرۋعا جانە ءار كەزەڭدە قولداۋدى قامتاماسىز ەتۋگە مۇمكىندىك بەرەتىنىن ايتادى ماماندار.
«بۇل ءبولىمنىڭ قۇرىلۋى – جاي باستاما ەمەس, بۇل ءوڭىرىمىز ءۇشىن اسا ماڭىزدى قادام. ءاربىر زورلىق-زومبىلىق وقيعاسىنىڭ ارتىندا ناقتى ادام تاعدىرى تۇر. سوندىقتان ءبىزدىڭ ماقساتىمىز – تەك ارەكەت ەتۋ ەمەس, وسىنداي جاعدايلاردىڭ الدىن الۋ. قازىر ءبولىمدى جاساقتاۋ جۇمىستارى جۇرگىزىلىپ جاتىر: شتات 36 ينسپەكتوردان تۇرادى جانە ولار وسى ماڭىزدى مىندەتتى ورىنداۋعا تولىق دايىن بولادى», دەيدى ءبولىم باستىعى, پوليتسيا پودپولكوۆنيگى ۆيتالي كاۆەرين.
ءبولىمنىڭ جەدەل جەلىسى تاۋلىك بويى جۇمىس اتقارىپ, زورلىق-زومبىلىققا تاپ بولعانداردىڭ نەمەسە وسىنداي جاعدايدان قۇلاعدار ءاربىر ازاماتتىڭ ارىز-شاعىمىن قابىلداي الادى.
اباي وبلىسى
