حالىقارالىق «الاش» ادەبي سىيلىعى لاۋرەاتىنىڭ بۇل كەشى «قارقۋار» دەپ اتالدى. اباي اتىنداعى قازاق مۋزىكالىق دراما تەاترىنداعى شارا شىمىلدىعى وبلىس اكىمىنىڭ قۇتتىقتاۋ سوزىمەن ءتۇرىلدى.
«حاكىم اباي, دانىشپان شاكارىم, مۇحيت ويلى مۇحتارعا قىزمەت ەتۋدى تولەگەن اعادان ۇيرەنۋ كەرەك دەسەم, ارتىق ايتقاندىق ەمەس. دۇنيەنىڭ «قىزىل-جاسىلىنا» الدانباي, «قاققان قازىقتاي» قاراۋىلعا بايلانىپ, بابالار مۇراسىن قورىپ كەلە جاتقان تولەگەن جانعالي ۇلىنا اباي ەلى ءدان ريزا! قازاق رۋحانياتىنىڭ قاينارىنان سۋسىنداپ, ابايشا تەرەڭ تولعانىپ, ۇلى وي, سىرلى ءسوزدىڭ جۇگىن ارقالاعان قارىمدى قالامگەرگە شىن جۇرەكتەن شىعارماشىلىق تابىس تىلەيمىن! مەرەيتوي قۇتتى بولسىن!», دەدى وبلىس اكىمى نۇرلان ۇرانحاەۆ.
شىعارماشىلىق كەشتە وبلىستىق «داريعا-اي» جاستار تەاترى ارتىستەرىنىڭ قاتىسۋىمەن, اقىننىڭ جان الەمى مەن جۇرەك تەبىرەنىسىن جارقىراتىپ كورسەتكەن «قارقۋار» تەاترلاندىرىلعان قويىلىمى كورەرمەن نازارىنا ۇسىنىلدى. تەاتر تۋىندىسىنىڭ رەجيسسەرى – مادەنيەت سالاسىنىڭ ۇزدىگى جۇلدىزبەك جۇمانباي.
اقىن تولەگەن جانعاليەۆتى ارمان-اڭسارى اۋىلدا جۇرگەندە الىستان قول بۇلعاپ, قالاعا شاقىرسا دا, شىعارماشىلىق كۇش-قايراتىن دالەلدەپ الماتىعا مويىن بۇرعان جوق. اباي اۋدانى اكىمدىگىندە قارا حالىقتىڭ قامىن جەپ, بىلگەنىنەن جاڭىلمادى. ارتىق سويلەپ, اسىرا سىلتەيتىندەردى قالامىمەن جاسقاپ وتىرعانى راس-تى.
اتوم ازابىن تارتقان حالىقتىڭ, سونىڭ ىشىندە سەمەي جۇرتىنىڭ قاسىرەتىن جىر ەتىپ, ازاماتتىق ۇستانىمىن تانىتىپ, ەلىمەن بىرگە تۇرىستى. زاپىران قۇسقان حالىقتىڭ زارىن ۇقتىردى. شىندىققا سۋارىلعان جىرلارىنىڭ كەيىپكەرلەرى پوليگون ازابىن تارتقان ادامدار مەن اۋىلداعى اڭقاۋ جۇرت ەدى. وسىنداي توسىن تاقىرىپ پەن وقشاۋ كەيىپكەرلەرى ارقىلى وقىرماننىڭ ويىن ءدوپ باستى.
تولەگەن جانعاليەۆ 90-جىلداردىڭ سوڭىندا قاراۋىلدا «اقسۇڭقار» اقىندار مەكتەبىن اشتى. ماڭىنا ولەڭ جازۋعا ىنتىق, ءسوز ونەرىنىڭ يەسىن تانىپ, كيەسىن قۇرمەتتەگەن جاس جەتكىنشەكتەردى جيدى. اقىندىق ونەر مەكتەبىن قالىپتاستىردى.
سەمەيدە وتكەن ادەبي كەشتە مەرەيتوي يەسىنە مەملەكەتتىك كەڭەسشى ەرلان قاريننىڭ, جازۋشىلار وداعىنىڭ قۇتتىقتاۋ حاتتارى تابىس ەتىلدى. كەشكە ارنايى قاتىسقان اقىن شاكىرتتەرىنىڭ قاراسى دا قالىڭ بولدى. ولار دا بۇگىندە ۇستاز ءۇمىتىن اقتاپ تاۋەلسىز قازاق ادەبيەتىنىڭ ءبىر-ءبىر ۋىعىنا اينالعان قالقامان سارين, باقىتجان بايبولوۆ, ۇلان ساعاديەۆ, نۇرجان ءبايتوس, ارمان شەريزات, ايدانا ءبايتوسوۆا, گ ۇلىم ەربولاتقىزى سىندى اقىندار ەكەنىن اتاعان ءجون. اقىن-ۇستاز تويىنا شاكىرتتەرى دە قۇر قول كەلمەي بەلگىلى عالىمدار مەن جازۋشىلار تۇرسىن جۇرتباي, روللان سەيسەنباەۆ سياقتى جانداردىڭ تولەگەن حاقىنداعى لەبىزدەرى مەن ارناۋلارى مەن ارنايى جازىلعان ادەبي ماقالالار توپتاسقان «شىڭعىستاۋدىڭ ءبىر شىڭى» اتتى كىتاپتى تابىس ەتىپ, تۇساۋىن كەستى.
سالتاناتتى ءىس-شارادا ساحناعا كوتەرىلگەن تالانتتى اقىن قالقامان سارين قارا ولەڭنىڭ اۋىلىن كۇزەتكەن اقىن تولەگەن جانعاليەۆ شىعارماشىلىعى جايىندا پىكىر ءبىلدىرىپ, جازۋشى, حالىقارالىق «الاش» ادەبي سىيلىعىنىڭ لاۋرەاتى داۋلەت سەيسەن ۇلى جازۋشىلار وداعىنىڭ توراعاسى مەرەكە قۇلكەنوۆتىڭ قۇتتىقتاۋىن جەتكىزدى.
سەمەي
