بيىل ادامزاتتى تاريحىندا وشپەس ءىز قالدىرعان ەكىنشى دۇنيەجۇزىلىك سوعىستىڭ اياقتالعانىنا 80 جىل تولادى. جەڭىستىڭ 80 جىلدىعىن مەرەكەلەۋ اياسىندا سوعىس ارداگەرلەرىنە 5 ملن تەڭگە كولەمىندە بىرجولعى ماتەريالدىق كومەك بەرۋ جوسپارلانىپ وتىر.
رەسمي دەرەككە سۇيەنسەك, 2025 جىلعى 20 قاڭتارداعى جاعدايعا سايكەس ەلىمىزدە ەكىنشى دۇنيەجۇزىلىك سوعىستىڭ 120 ارداگەرى, سونداي-اق جەڭىسكە ۇلەس قوسقان 42 545 ازامات تۇرادى. ولاردىڭ ىشىندە: قورشاۋداعى لەنينگراد تۇرعىندارى – 67 ادام, كونتسلاگەرلەردىڭ بۇرىنعى كامەلەتكە تولماعان تۇتقىندارى – 139 ادام, سوعىس كەزىندە اۋىر جارالانعان, كونتۋزياسى بار, زاقىمدانۋى نەمەسە اۋرۋى سالدارىنان مۇگەدەكتىگى بار, سول سەبەپتى قايتىس بولعان ارداگەرلەردىڭ جۇبايلارى – 743 ادام, سوعىستا قازا تاپقان (قايتىس بولعان, حابار-وشارسىز كەتكەن) جاۋىنگەرلەردىڭ جەسىرلەرى – 2 ادام, تىل ەڭبەككەرلەرى – 41 594 ادام.
«ارداگەرلەر مەن تىل ەڭبەككەرلەرىنە قامقورلىق جاساۋ, ولاردىڭ ءومىر ءسۇرۋ ساپاسىن ارتتىرۋ – مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى. قارتتاردى الەۋمەتتىك قورعاۋ ءىس-شارالارى ورتالىق دەڭگەيدە دە, جەرگىلىكتى دەڭگەيدە دە جۇزەگە اسىرىلادى. بىرىنشىدەن, زەينەتاقى, وزگە دە الەۋمەتتىك تولەمدەردىڭ مولشەرى جىل سايىن ارتىپ كەلەدى. ازاماتتاردىڭ 19 ساناتىنا (سوعىسقا قاتىسۋشىلار, تىل ەڭبەككەرلەرى, اقتالعان ازاماتتار, ت.ب.) وزگە دە الەۋمەتتىك تولەمدەرگە قاراماستان ارناۋلى مەملەكەتتىك جاردەماقى بەرىلەدى», دەپ جازادى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
رەسمي ورىنداردىڭ بەرگەن مالىمەتىنە سايكەس, بيىلعى 1 قاڭتارداعى جاعداي بويىنشا, ەكىنشى دۇنيەجۇزىلىك سوعىسقا قاتىسقاندارعا, زەينەتاقىلارىن ەسكەرە وتىرىپ, اي سايىن بەرىلەتىن الەۋمەتتىك تولەمدەردىڭ جيىنتىق مولشەرى – 262 334 تەڭگە, ەكىنشى دۇنيەجۇزىلىك سوعىس كەزەڭىندە جارالانۋى, كونتۋزيا الۋى, مەرتىگۋى نەمەسە اۋرۋى سالدارىنان مۇگەدەكتىگى بار ادامدار ءۇشىن – 279 330 تەڭگە.
بۇعان قوسا ارداگەرلەردى الەۋمەتتىك قولداۋدىڭ قوسىمشا تۇرلەرى دە بار. ماسەلەن, ولاردىڭ بارلىعى اسكەري قىزمەتشىلەرگە كورسەتىلەتىن قۇقىقتار مەن كەپىلدىكتەرگە يە. سالىق سالۋ جونىنەن جەڭىلدىكتەردى پايدالانادى. ولارعا استانا, الماتى قالالارىنداعى مامانداندىرىلعان گوسپيتالداردا بىلىكتى مەديتسينالىق كومەك كورسەتىلەدى, ساناتوري-كۋرورتتىق ەمدەۋ ۇسىنىلادى. سونىمەن قاتار ەكىنشى دۇنيەجۇزىلىك سوعىس ارداگەرلەرىنە بىرجولعى ماتەريالدىق كومەك جىل سايىن بەرىلەدى.
«وبلىستاردا, رەسپۋبليكالىق ماڭىزى بار قالالاردا بيىل جەڭىس كۇنىنىڭ 80 جىلدىعىن مەرەكەلەۋ قۇرمەتىنە 120 سوعىس ارداگەرىنىڭ ارقايسىسىنا 5 ملن تەڭگەدەن بىرجولعى ماتەريالدىق كومەك كورسەتىلەتىن بولادى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىك حابارلاماسىندا.
بيىلعى 1 قاڭتارداعى جاعداي بويىنشا ەلىمىزدە 85 203 ارداگەر تۇرادى. بىلتىر ارداگەرلەردىڭ اتالعان ساناتتارىنا جيىنى 16,7 ملرد تەڭگە جاردەماقى بەرىلسە, بيىل 17 ملرد تەڭگە قاراستىرىلدى.
ماسەلەن, بۇل جەڭىلدىكتەر سوعىس ارداگەرلەرىنە – 16 اەك (62 912 تەڭگە), سوعىس ارداگەرلەرىنە تەڭەستىرىلگەن ارداگەرلەرگە (ەكىنشى دۇنيەجۇزىلىك سوعىس كەزەڭىندە جاراقات الۋى, كونتۋزيا الۋى, مەرتىگۋى نەمەسە اۋرۋ سالدارىنان مۇگەدەكتىگى بار ادامدارعا جەڭىلدىكتەر جونىندە تەڭەستىرىلگەن ادامدارعا) – 7,55 اەك (27 875 تەڭگە), ەكىنشى دۇنيەجۇزىلىك سوعىس قاتىسۋشىلارىنا تەڭەستىرىلگەن تۇلعالارعا – 6,19 اەك (24 339 تەڭگە), باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرىنە (اۋعانستانداعى ۇرىس قيمىلدارىنا قاتىسۋشىلار) – 6,19 اەك (24 339 تەڭگە), تاجىك-اۋعان ۋچاسكەسىندە تمد شەكاراسىن قورعاۋدى كۇشەيتۋ جونىندەگى مىندەتتەردى ورىنداعان, يراكتاعى حالىقارالىق بىتىمگەرشىلىك وپەراتسياعا, تاۋلى قاراباقتاعى ەتنوسارالىق قاقتىعىستى رەتتەۋگە قاتىسقان اسكەري قىزمەتشىلەرگە – 4,8 اەك (18 874 تەڭگە), ەكىنشى دۇنيەجۇزىلىك سوعىس جىلدارىنداعى تىل ەڭبەككەرلەرىنە 2,13 اەك (8 376 تەڭگە) مولشەرىندە قاراستىرىلعان.
