قازىردە «اۋىل – ەل بەسىگى» باعدارلاماسى اياسىندا ءۇرجار اۋىلىندا 10 توسەكتىك كۇندىزگى ستاتسيونار مەن 50 ادام قابىلدايتىن دارىگەرلىك امبۋلاتوريا سالۋ جوباسى ىسكە اسىرىلىپ جاتىر. وبلىستىق دەنساۋلىق ساقتاۋ باسقارماسىنىڭ باسشىسى تالعات مولدابەكوۆ اۋىلداعى بەيىندى ماماندار تاپشىلىعىن شەشۋ باعىتىندا دا ماقساتتى جۇمىستار جۇرگىزىلىپ جاتقانىن ءمالىم ەتتى. ءتىس دارىگەرى, حيرۋرگ, اكۋشەر-گينەكولوگ سياقتى مامانداردى تولىقتىرۋ ماسەلەسى كەلەشەكتە شەشىمىن تاپپاق.
«كادر تاپشىلىعى ماسەلەسىن شەشۋگە 8,5 ملن تەڭگە كولەمىندە كوتەرمە جاردەماقى ءبولۋ قاراستىرىلعان. ءبىز بيىل اسا تاپشى ماماندىقتاردىڭ ءتىزىمىن انىقتاۋ جونىندەگى جۇمىستى جالعاستىرامىز. كادرلار دايارلاۋعا دا ەرەكشە كوڭىل بولىنەدى. 2024 جىلى جەرگىلىكتى بيۋدجەت قاراجاتى ەسەبىنەن وبلىستىڭ 80 دارىگەرى شەتەلدە تاجىريبەسىن شىڭدادى. 15 مامان رەسەي, گەرمانيا, ازەربايجاننىڭ جەتەكشى مەديتسينالىق مەكەمەلەرىندە تاعىلىمدامادان ءوتتى. بۇل باعدارلاما بىلىكتىلىكتى ارتتىرۋعا, اۋىل مەديتسيناسى جۇمىسىنا زاماناۋي تاسىلدەردى ەنگىزۋگە باعىتتالعان», دەيدى باسقارما باسشىسى.
وبلىستا اۋىل تۇرعىندارىنا 9 جىلجىمالى مەديتسينالىق كەشەن قىزمەت كورسەتەدى. ولار 173 ەلدى مەكەندەگى تۇرعىنداردىڭ دەنساۋلىعىن باقىلاۋعا العان. وتكەن جىلى 64 435 ادامدى تەكسەرۋمەن قامتۋ جوسپارلانسا, ءىس جۇزىندە 56 233 تۇرعىن مەديتسينالىق كومەككە جۇگىنگەن.
اۋىل مەديتسيناسىن دامىتۋدىڭ نەگىزگى باعىتتارىنىڭ ءبىرى – ماتەريالدىق-تەحنيكالىق بازانى جاڭارتۋ. 2024 جىلى 1,3 ملرد تەڭگەدەن استام سوماعا 200 مەديتسينالىق تەحنيكا ساتىپ الىندى. بيىل 1,2 ملرد تەڭگەگە 182 جابدىقتار ساتىپ الۋ جوسپارى جۇزەگە اسىرىلادى.
اباي وبلىسى
