وتكەن عاسىردىڭ 90-جىلدارى سۋرەتشى ەركىن نۇرازحان مەن اقىن جاراسقان ءابدىراش سومداپ شىعارعان اقىن-جازۋشىلار وبرازى كوڭىلگە نىق بەكىگەنى بەلگىلى. جارىق كورگەن ء«ازىلىڭ جاراسسا» جيناعىندا سۋرەت پەن ءسوز استاسىپ ەگىز ۇعىم ۇستەگەنى تاعى ايان. قازاق كاريكاتۋراسىن ءسوز ەتكەندە ەركىن نۇرازحاندى, ايداربەك عازيزدى اينالىپ وتپەسىمىز بەلگىلى جايت. ءبىز جان الەمىنە ۇڭىلگەلى وتىرعان كەيىپكەر دە وسى تانىمال سۋرەتشىلەردىڭ شىعارماشىلىق شۋاعىن بار ج ۇلىن-جۇيكەسىمەن سەزىنگەن نۇربوسىن وقاسوۆ. قازىرگى ۋاقىتتا سەمەي قالاسىنداعى گەودەزيا, كارتوگرافيا جانە قۇرىلىس جوعارى كوللەدجىندە ۇستازدىق قىزمەت اتقاراتىن ونىڭ ءومىر تىنىسى سۋرەت بولسا, سونىڭ ىشىندە كەيىپكەرىنىڭ كەسكىن-كەلبەتىن كەلىستىرە كەستەلەيتىنى كاريكاتۋرا.
نۇربوسىن سەرىكقازى ۇلى 1982 جىلى مەكتەپتى بىتىرە سالا سۋرەت, سىزۋ جانە ەڭبەك ءپانىنىڭ مۇعالىمى دەگەن ماماندىققا ءتۇسۋ مۇمكىندىگىنە قول جەتكىزە الماي, اۋىلىنا قايتادى. سول جىلى اۋدان ورتالىعى اقسۋات اۋىلىنداعى كوركەمسۋرەت شەبەرحاناسىندا باس سۋرەتشىنىڭ كومەكشىسى بولىپ جۇمىس ىستەدى. وسى كەزەڭدە ءوزى قىزىعاتىن, الايدا قىر-سىرىن تەرەڭ ۇعىنا قويمايتىن الەمگە شىم باتتى. كاسىبي سۋرەتتى مەڭگەرگەن مامانداردىڭ ءىزىن باسىپ, بىلگەنىن كوڭىلگە توقىپ, ىزدەنىپ اجەپتاۋىر شىڭدالا ءتۇستى. وتان الدىنداعى بورىشىن وتەپ كەلگەننەن كەيىن 1992 جىلى سەمەيدەگى ن.كرۋپسكايا اتىنداعى پەداگوگيكالىق ينستيتۋتتىڭ كوركەمسۋرەت فاكۋلتەتىن ءبىتىرىپ, كاسىبي مامان رەتىندە ەڭبەك جولىن تەحنيكالىق جانە كاسىپتىك ءبىلىم سالاسىنان باستادى. سودان بەرى 33 جىل بويى ارمان-اڭسارى اداستىرماي, قىلقالامنىڭ قۇدىرەتىنە تەرەڭ بويلادى. كوبىنە تابيعات ليريكاسىنىڭ كوركىن كەلىستىرىپ كارتينا سالىپ جۇرگەنىمەن, كاريكاتۋرانى ۇدايى سەرىك ەتىپ كەلەدى. باسىندا قۇربى-قۇرداستارىنا قالجىڭداپ, سولاردىڭ مىنەز-قۇلقىن استارلاپ سۋرەت سالا باستادى. ءبىردى-ەكىلى شىعارماسىن اتاقتى سۋرەتشى ەركىن نۇرازحان اعاسىنىڭ الدىنا توسىپ, اق باتاسىن الدى.
«جالپى العاندا, ءازىل سۋرەتتەر ادامنىڭ ىشكى جان دۇنيەسىن, ونىڭ باسقا دا جاقسى قاسيەتتەرىن ايگىلەپ تۇرادى. ءوز كەيىپكەرىڭنىڭ كەلبەتىن كەلىستىرۋ ءۇشىن ونى جان-جاقتى زەرتتەۋىڭ كەرەك. بەت الپەتىن, اتقاراتىن قىزمەتىن, مىنەز-قۇلقىن, قيمىل-قوزعالىسىن باقىلاپ, كەمشىلىگىن كورىپ, ارتىقشىلىعىن اڭداعان دۇرىس. شىنىن ايتۋ كەرەك, كوبىنەسە بەت-پىشىنىندە ايرىقشا بەلگىلەرى بار جانداردىڭ سۋرەتىن سالعان وڭايعا تۇسەدى», دەيدى سۋرەتشى.
سۋرەتشى نۇربوسىن وقاسوۆتىڭ العاشقى سۋرەتتەرى 90-جىلداردىڭ اياعىندا كوپشىلىك اراسىنا تاراي باستادى. وقۋ ورنىندا جۇرگەندە قاتارلاستارىمەن ازىلدەسىپ, ءبىر-ءبىرىنىڭ بەت الپەتىن ازىلگە اينالدىراتىنى سۋرەتشىنىڭ شىعارماشىلىعىن شىڭداي ءتۇستى. وسىدان ەكى-ءۇش جىل بۇرىن سىنىپتاستارىمەن كەزدەسىپ, ەرەكشە سەزىمگە بولەنگەن شىعارماشىلىق يەسى قۇرداستارىنىڭ كەسكىن-كەلبەتىنە جىلدار سالعان بەلگىنى كورىپ, وي قاماپ, قىلقالامىنا قول سوزدى. سونىڭ اسەرىنەن تۋعان بىرنەشە سۋرەتتى اينالاسى جىلى قابىلداپتى.
سۋرەتشى كاريكاتۋرادان بولەك پورترەتتەردى سالۋعا دا قۇمار. پەيزاجدار سالۋدى جانى قالايتىن سۋرەتشى وعان كوپ ۋاقىت كەرەك ەكەنىن ايتادى. سۋرەتشى قالاي بولعاندا دا ءوزىنىڭ كوڭىلىنە جاقىن سۋرەتتەر سالىپ, كەلەشەكتە كەڭ كولەمدى كورمەسىن ۇيىمداستىرعىسى كەلەدى. سىرلى سۋرەتتەر سەرياسىن سالۋ ءۇشىن كوپ ەڭبەك پەن ازداعان ەركىندىكتىڭ كەرەك ەكەنىن ايتادى. ول ءوزىنىڭ شارجدارى مەن كۇلكى ۇيىرەتىن كاريكاتۋرالارىنا «قارىنداشتار قالجىڭى» دەپ ات قويىپتى. شىن مانىندە, جورا-جولداستار اراسىندا ءازىل-وسپاق ارقىلى باستالعان بۇل سۋرەتتەر بۇگىندە ۇلكەن ونەردىڭ باستاۋ بۇلاعىنداي كورەرمەنىن باۋراپ كەلەدى.
سەمەي
