فوتو: sabah.com.tr
قۇزىرلى ورگانداردىڭ مالىمەتىنشە, ءورت تۇنگى ساعات 03:21-دە قوناقۇيدەگى مەيرامحانادان باستالعان. وسى كەزدە اسحانا قىزمەتكەرلەرى تاعامدى قۋىرۋ ءۇشىن گريلدى پايدالانىپ, تاڭعى استى پىسىرۋگە دايىندالىپ جاتقان. قۇرىلعىنى ۇزاق قىزدىرۋ سالدارىنان ونىڭ بەتىندەگى ماي كەنەتتەن جانعان.
اس ءۇي قىزمەتكەرلەرى ءورتتى وزدەرى سوندىرمەك بولعان. الايدا ولار ءورت ءسوندىرۋ قۇرالىن پايدالانۋدىڭ ورنىنا جالىندى سۋمەن وشىرەمىز دەپ قاتە شەشىم قابىلداعان. بۇل ءورتتىڭ ودان دا قارقىندى تارالۋىنا ىقپال ەتكەن.
جالىن مايدان تازارتىلماعان سورعىشقا ءتيىپ, جەلدەتۋ جۇيەسى ارقىلى شاتىرعا تاراعان. سالدارىنان ءورت بۇكىل عيماراتتى شارپىعان. وسىلايشا, Grand Kartal قوناقۇيىندەگى ءىرى ءورتتىڭ شىعۋىنا اسپازداردىڭ سالعىرتتىعى سەبەپ بولعان. سونداي-اق, تەرگەۋ بارىسىندا قوناقۇيدەگى ءورت دابىلى جۇمىس ىستەمەگەنى انىقتالعان.
قازىرگى ۋاقىتتا قىلمىستىق ءىس قوزعالىپ, اسحانانىڭ ءتورت قىزمەتكەرى ۇستالعان.
ەستەرىڭىزگە سالا كەتەيىك, قوناق ۇيدە بولعان ءىرى ورتتەن 79 ادام قازا تاپتى.
