سۋرەت: seykhuninfo.kz
حالىقتىڭ الەۋمەتتىك وسال توپتارىنا جالعا بەرىلەتىن پاتەرلەرگە ەرەكشە نازار اۋدارىلىپ, جالپى اۋدانى 79,5 مىڭ شارشى مەتر بولاتىن 1070 پاتەر ساتىپ الىندى. 2024 جىلى كەزەكتە تۇرعان 848 ادام جاڭا تۇرعىنجايدىڭ كىلتىن الدى. اتاپ ايتقاندا, ۇيلەرى اپاتتى جاعدايدا دەپ تانىلعان 70 تۇرعىن, اتا-اناسىنان ايىرىلعان 155 بالا, حالىقتىڭ الەۋمەتتىك وسال توپتارىنا جاتاتىن 307 ادام, 225 كوپبالالى وتباسى, 91 مەملەكەتتىك, بيۋدجەتتىك ۇيىمداردىڭ قىزمەتكەرلەرىنە جاڭا باسپانا كىلتى تابىستالدى.
«وبلىس بيىل دا نەسيەلىك تۇرعىن ءۇي قۇرىلىسىن بەلسەندى جالعاستىرۋدى جوسپارلاپ وتىر. كوپقاباتتى ۇيلەرمەن قاتار جەكە تۇرعىن ۇيلەر دە سالىنادى. سەمەي, اياگوز قالالارىندا جالپى اۋدانى 54,6 مىڭ شارشى مەتردى قۇرايتىن 14 ءۇيدىڭ قۇرىلىسى جۇرگىزىلىپ جاتىر. الداعى ۋاقىتتا تاعى 6 كوپقاباتتى ءۇيدىڭ قۇرىلىسى باستالادى. بۇل كوپتەگەن وتباسىلارعا ءتيىمدى شارتتارمەن جەكە باسپانا ساتىپ الۋعا مۇمكىندىك بەرەدى», دەيدى اباي وبلىسى اكىمىنىڭ ورىنباسارى ديميتري گاريكوۆ.
جالپى, وڭىردە تۇرعىن ۇيگە سۇرانىس وتە جوعارى. قازىردە 19 850 ادام تۇرعىن ءۇي كەزەگىندە تۇر. اسىرەسە ءومىر, ەڭبەك جولىن ەندى باستاعان جاستاردىڭ باستى ماسەلەسى باسپانا بولىپ وتىر. قولجەتىمدى باسپانامەن قامتاماسىز ەتۋدەگى نەگىزگى شارالاردىڭ ءبىرى «وتباسى بانك» اق ارقىلى باعدارلامالاردى جۇزەگە اسىرۋ بولاشاقتا جالعاسادى. قازىر ايماقتا جاستار مەن وبلىس تۇرعىندارى باسپاناعا نەگىزگى ءۇش باعدارلاما – نەسيە مەرزىمى 19 جىلعا دەيىنگى «ناۋرىز», سىياقى مولشەرلەمەسى جىلدىق 9%-عا دەيىنگى «وتاۋ», تۇرعىن ءۇي كەشەنىن دامىتۋدىڭ 2023–2029 جىلدارعا ارنالعان تۇجىرىمداماسى اياسىنداعى باعدارلاما ارقىلى قول جەتكىزە الادى.
سونداي-اق سەمەي قالاسى اكىمدىگى مەن «وتباسى بانك» بىرلەسىپ جۇزەگە اسىرىپ جاتقان «اباي جاستارى» وڭىرلىك باعدارلاماسىن ەرەكشە اتاپ ءوتۋ كەرەك. باعدارلاما اياسىندا وتكەن جىلى وبلىستاعى جۇمىسشى جاستاردىڭ اراسىنان 19 وتباسى باسپانا كىلتىنە يە بولدى. اياگوز اۋدانىنىڭ جاستارىنا ارنالعان «قوزى كورپەش – بايان سۇلۋ» جاستار باعدارلاماسى دا جاستاردى باسپانامەن قامتاماسىز ەتۋگە باعىتتالعان. جالپى, ايماق تۇرعىندارى مەن بارلىق ساناتتاعى ازاماتتاردى تۇرعىن ۇيمەن قامتاماسىز ەتۋ شارالارى بيىلعى جىلى دا ساتىمەن جالعاساتىنىنا سەنىم مول.
اباي وبلىسى
