سۋرەت: baq.kz
سەنات كوميتەتىنىڭ توراعاسى اندرەي لۋكين شەكارا نىساندارى قۇرىلىسىنىڭ كەشەۋىلدەۋ ماسەلەسىنە نازار اۋداردى. ونىڭ ايتۋىنشا, رەسپۋبليكالىق بيۋدجەتتەن جىل سايىن قارجى بولىنگەنىمەن, كوپتەگەن نىسانداعى جۇمىس نە توقتاپ قالعان, نە تىم باياۋ جۇزەگە اسىپ جاتىر.
ء«بىز سولتۇستىك قازاقستان وبلىسىنداعى «اقكول» شەكارا بولىمشەسى سياقتى نىسانداردىڭ قۇرىلىسى توقتاپ قالعانىن ءوز كوزىمىزبەن كوردىك. ماسەلەنىڭ سەبەبىن انىقتاۋ ارەكەتىنەن ەشتەڭە شىقپادى, ناقتى جاۋاپ الا المادىق. سونىمەن قاتار مۇنداي جاعداي شامامەن 20 نىساندا بايقالىپ وتىر, بۇل مەردىگەرلەرگە سالماقتى سۇراق قويۋدى تالاپ ەتەدى», دەدى ا.لۋكين.
كولىك ۆيتسە-ءمينيسترى ءساتجان ابلاليەۆ نەگىزگى ماسەلەلەر قارجىلاندىرۋ مەن سۋ تاسقىنى كەزىندەگى قيىندىقتارعا بايلانىستى ەكەنىن اتاپ ءوتتى. ونىڭ ايتۋىنشا, جۇمىس كەستەسىن بۇزعان مەردىگەر ۇيىمدارعا ايىپپۇل سالۋ تۋرالى ەسكەرتۋ جولدانعان, ال 20 نىسان قۇرىلىسىنىڭ ءبىرىنشى كەزەڭىن 2025 جىلى اياقتاۋ جوسپارلانىپتى.
وتىرىس بارىسىندا بيۋدجەت قارجىسىن ماقساتتى تۇردە پايدالانۋعا باقىلاۋدى كۇشەيتۋ ماسەلەسى مەن تاپسىرىس بەرۋشىلەر, مەردىگەرلەر جانە قاداعالاۋ ورگاندارى اراسىنداعى ءوزارا ءىس-قيمىلدى جاقسارتۋ جونىندەگى ۇسىنىستار تالقىلاندى. سەناتورلار قۇرىلىس مەرزىمىن ساقتاۋ جانە ەكىنشى كەزەڭدەگى قۇرىلىسقا ارنالعان جوبالاۋ-سمەتالىق قۇجاتتامانى ازىرلەۋ قاجەتتىگىنە ەرەكشە نازار اۋداردى. ەكىنشى كەزەڭ اياسىندا تاعى 30 شەكارالىق نىسان سالۋ جوسپارلانىپ وتىر.
كەزدەسۋگە قاتىسۋشىلار بارلىق تاراپتىڭ مىندەتتەمەلەردى قاتاڭ ورىندالۋى ماڭىزدى ەكەنىن جانە مۇنداي ايرىقشا جوبالاردى جۇزەگە اسىرۋدا جاۋاپكەرشىلىكتى ارتتىرۋ قاجەتتىگىن اتاپ ءوتتى.
