سۋرەت: qaz.ulysmedia.kz
قازىرگى تاڭدا تسيفرلاندىرۋدىڭ ەڭ جارقىن مىسالى – تسيفرلىق قۇجاتتار بۇگىندە تولىققاندى فيزيكالىق قۇجاتتارعا تەڭەستىرىلدى. ازاماتتار ەل ىشىندە ۇشاقتاردا, پويىزداردا تەك تسيفرلىق قۇجاتتاردىڭ نەگىزىندە ەركىن جۇرە الادى. بىلتىر بۇل قىزمەت 200 ملن-نان استام رەت كورسەتىلگەن. تاعى ءبىر جەتىستىك – ونلاين نوتاريۋس.
«دەگەنمەن, كەيبىر ازاماتار قىزمەتتى قولدانۋدا ىڭعايسىزدىققا تاپ بولاتىنىن بايقادىق. ولار قوسىمشادان ىزدەۋ, سىلتەمەنى كورۋ سياقتى مىندەتتەردى قيىنسىنادى. ولارعا ءالى دە حالىققا قىزمەت كورسەتۋ ورتالىعىنا بارعان جەڭىلدەۋ. سوندىقتان بۇل جەردە جاساندى ينتەللەكتىنى ەنگىزۋ قاجەت دەپ سانايمىز. جاساندى زەردەنى بيزنەس سالالارىنا ەنگىزۋ دە ەلىمىزدىڭ ەكونوميكالىق كورسەتكىشتەرىنە ەلەۋلى اسەر ەتەدى. ەكونوميكا تيىمدىرەك بولادى, ەڭبەك ونىمدىلىگى ارتىپ, ءبىلىم سالاسى داميدى. ەندى ءبىز جاساندى ينتەللەكت نەگىزىندە ۆيرتۋالدى كومەكشىلەردى ەنگىزۋ بويىنشا جۇمىستاردى باستادىق», دەگەن ەدى ۇكىمەت وتىرىسىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
بۇل مىندەتتەردىڭ بارلىعى جاساندى ينتەللەكتىنى دامىتۋدىڭ 2029 جىلعا دەيىنگى تۇجىرىمداماسى مەن جاساندى ينتەللەكت تۋرالى جاڭا زاڭ اياسىندا جالعاسادى. اتالعان تۇجىرىمدامادا بىرنەشە ماڭىزدى باعىت بار. ءبىرىنشىسى – سۋپەركومپيۋتەرلىك ينفراقۇرىلىمدى دايىنداۋ, ەكىنشىسى – زاڭنامالىق اكتىلەردى شىعارۋ, ءۇشىنشىسى – ادامي كاپيتالدى دامىتۋ. بيىل وسى ءۇش باعىت باستى نازاردا بولماق.
جىل سايىن ەلىمىزدەگى ستارتاپتاردىڭ سانى مەن ساپاسى ارتىپ كەلەدى, بۇل ءۇردىس الداعى ۋاقىتتا دا جالعاسىن تاپپاق. «Astana Hub» تەحنوپاركى وسى جىلى دا «Silkway Accelerator» جانە «AI’preneurs» سەكىلدى تابىستى باعدارلامالار لەگىن جالعاپ, ستارتاپ نەگىزىن قالاۋشىلارعا قولداۋ كورسەتەدى. بىلتىر قۇرىلعان «Astana Hub Ventures» قورى بيىل جەرگىلىكتى ستارتاپتاردى قولداۋدا ماڭىزدى قۇرالعا اينالماق. ايتا كەتەيىك, 10 ميلليون دوللار كولەمىندە باعالاناتىن بۇل قور «Astana Hub» باعدارلاماسىنىڭ تۇلەكتەرىنە ينۆەستيتسيا سالۋعا باعىتتالعان.
ايتا كەتەيىك, بۇگىندە «Astana Hub» تەحنوپاركى 1 500-دەن استام قاتىسۋشىنى ءبىر ارنادا توعىستىرادى. ولاردىڭ قاتارىندا جاساندى ينتەللەكت سالاسىندا جۇمىس ىستەيتىن 150 ستارتاپ بار. جاڭا «Alem AI» ورتالىعى ەلىمىزدىڭ جي سالاسىنداعى وڭىرلىك كوشباسشى ءرولىن نىعايتىپ, يننوۆاتسيالار, زەرتتەۋلەر مەن جاھاندىق ىنتىماقتاستىق ءۇشىن اۋقىمدى پلاتفورما ۇسىنادى.
