№84 مەكتەپ-ليتسەيىنىڭ 9 سىنىپ وقۋشىسى بۇل ءبىلىم بايگەسىنە حيميا پانىنەن قاتىسىپتى. ونىڭ جەتەكشىسى ەلميرا قاجەكەنوۆانىڭ ايتۋىنشا, وليمپياداعا جۇيەلى دايىندىق 7 سىنىپتان باستالعان.
«اليدان سول كەزدىڭ وزىندە-اق مەكتەپ باعدارلاماسىنداعى كىتاپتاردى تولىق وقىپ تاۋىستى. وتكەن وقۋ جىلدارىنداعى وليمپيادا تاپسىرمالارىن تالداپ دايىندالدى. ناتيجەسىندە, 7-8 سىنىپتاردا حيميا پانىنەن اۋداندىق, وبلىستىق, كەيىن رەسپۋبليكالىق پاندىك وليمپيادالارعا قاتىسىپ جۇلدەلى ورىندارعا يە بولدى. ال 9 سىنىپقا كوشكەندە جوعارى وقۋ ورىندارىنىڭ وقۋلىقتارىنا اۋىز سالدى. «Daryn.online», «Ustudy.kz», «Quizlet» سىندى پلاتفورمالارمەن دە ءبىرشاما دايىندالدىق. ەتكەن ەڭبەك ەش كەتكەن جوق. مىنەكەي, شاكىرتىمىز تالانتتار تايتالاسىندا توپ جارىپ كەلدى. ءبىز مۇنىمەن توقتامايمىز. اليداننىڭ الار اسۋى ءالى الدا. رەسپۋبليكالىق پاندىك وليمپيادادان وزا شاۋىپ, «ICho» حالىقارالىق حيميا وليمپياداسىندا التىننان القا تاعۋ – ەندىگى ماقساتىمىز», دەيدى ە.قاجەكەنوۆا.
جىل سايىن ءداستۇرلى تۇردە وتەتىن حالىقارالىق «COPERNICUS» وليمپياداسى بيىل التىنشى مارتە ۇيىمداستىرىلىپ وتىر. بۇل جارىستا جەر-جەردەن كەلگەن جوعارى سىنىپ وقۋشىلارى جاراتىلىستانۋ باعىتىنداعى پاندەر بويىنشا باق سىنايدى. ياعني وسىناۋ كادەلى كونكۋرس جاس ورەندەردى عىلىم جولىنا جەتەلەيدى.
اناسىنىڭ ايتۋىنشا, اليدان كىشكەنتاي كەزىنەن-اق ءارتۇرلى نارسەلەردىڭ قالاي, نەدەن جاسالاتىنىن زەرتتەۋدى ۇناتاتىن بولعان.
«بالامنىڭ جەڭىسىنىڭ ارتىندا ۇلكەن ەڭبەك جاتىر. ارينە ءبارى پانگە دەگەن قىزىعۋشىلىقتان باستالادى. ۇستازدارىنىڭ دا ەڭبەگى زور. ءبىز اتا-انا رەتىندە قولداۋ كورسەتىپ وتىردىق. سونىمەن قاتار ءتىلدى جاقسى مەڭگەرۋىنە جاعداي جاسادىق. اليدان اعىلشىن تىلىنەن بولەك, اراب, تۇرىك تىلدەرىن دە ءتاۋىر بىلەدى. بالامىز بولاشاقتا عىلىممەن اينالىسقىسى كەلەدى», دەيدى اناسى اعىنان جارىلىپ.
