سۋرەتتى تۇسىرگەن – ەرلان ومار, «EQ»
قانشا كىسى ۇيقىدا, قانشا ادام وياۋ, قانشاسى قام-قارەكەت ۇستىندە تىربانىپ جاتادى. جول ۇستىندەگى 60 مىڭ جولاۋشىنى ايتپاعاندا, استانا – الماتى, استانا – شىمكەنت, الماتى – شىمكەنت, استانا – سەمەي, الماتى – سەمەي باعىتىندا ىزعىتقان پويىزداردى تىزگىندەپ, جول بويىندا قاۋىپسىزدىگىن كۇزەتىپ, وتكىزىپ, جىبەرىپ, شىعارىپ سالىپ, قارسى الاتىنداردىڭ اياۋلى ەڭبەگىمەن ولشەنەدى ءومىر. ءبىرىنىڭ قاۋىپسىزدىگى ءۇشىن كەلەسى ءبىرى كىرپىك ىلمەيتىن ۋاقىت تىنىسىنىڭ ءوزى جۇرەكتەرمەن ءبىر سوققانداي اسەر قالدىرادى. وسىنىڭ ءبارى ورتاق وتانىمىزدىڭ جارقىن بولاشاعى ءۇشىن ەمەس پە؟
«جولاۋشىلار تاسىمالىنىڭ» ءمالىم ەتۋىنشە, 31 جەلتوقساننان 1 قاڭتارعا قاراعان جاڭا جىل ءتۇنى قازاقستان بويىنشا ۆوكزالداردا 47 كاسسير كەزەكشىلىك ەتسە, پويىزداردا 73 پويىز باستىعى مەن جولاۋشىلار ۆاگوندارىندا 1 774 جولسەرىك, جالپى سانى 115 پويىز بريگاداسى قىزمەت كورسەتىپتى. وسىنىڭ ءبارى 60 مىڭ جولاۋشى ءۇشىن, مۇمكىن اراسىندا ءسىز بەن ءبىزدىڭ جاقىنىمىز دا بار شىعار.
