بۇل تەحنولوگيا ءموبيلدى قۇرىلعىلاردى ەكى مەترگە دەيىنگى قاشىقتىقتا, 50 ۆت-تىق ەلەكترمەن 46 پايىزعا دەيىن قۋاتتاۋعا مۇمكىندىك بەرەدى. سونداي-اق بىرنەشە قۇرىلعىنى ءبىر مەزەتتە قۋاتتاي الادى. ينجەنەلەر اشىق بيفيليارلىق كاتۋشكانى قولدانۋ ارقىلى وسى ناتيجەگە قول جەتكىزگەن. عالىمدار بۇل تەحنولوگيانى اقىلدى وندىرىستەردە, لوگيستيكالىق روبوتتاردى قۋاتتاۋدا, قۇرىلعىلاردى اۆتوماتتى تۇردە قۋاتتاي الاتىن جۇيەلەردە قولدانۋعا بولاتىنىن اتاپ ءوتتى.
ءدارى جەتكىزەتىن روبوت
كاليفورنيا عالىمدارى دەنە ىشىندە ءدارىنى ءدال اۋرۋ وشاعىنا جەتكىزەتىن شاعىن ميكروروبوتتار جاساپ شىعاردى.
روبوتتار سىناق بارىسىندا ءدارىنى جەتكىزىپ, تىشقانداردىڭ ىسىك اۋرۋلارىن ازايتۋعا كومەكتەسكەن. روبوتتاردىڭ ديامەترى نەبارى 30 ميكرومەتر. سىرتقى بەتى سۋعا تارتىلادى, ال ىشكى بەتى سۋدان قورعايدى. بۇل قۇرىلىم اۋا كوپىرشىكتەرىن ۇستاپ, قوزعالىس كەزىندە جابىسپاۋعا مۇمكىندىك بەرەدى. ماگنيت نانوبولشەكتەرىمەن جابدىقتالعان روبوتتار سىرتقى ماگنيت ءورىسى ارقىلى قاجەتتى جەرگە باعىتتالادى. ءدارى سول جەردە قالىپ, بىرتىندەپ تارالادى.
قاتەرلى ىسىكتى ەمدەۋدىڭ جاڭا ءتۇرى
كورەيانىڭ الدىڭعى قاتارلى عىلىم جانە تەحنولوگيا ينستيتۋتىنىڭ (KAIST) زەرتتەۋشىلەرى راك جاسۋشالارىن ساۋ كۇيىنە قايتاراتىن جاڭا تەحنولوگيا ويلاپ تاپتى.
پروفەسسور كۆان-حيون چو باستاعان زەرتتەۋشىلەر گەندىك جەلىنىڭ تسيفرلىق ۇلگىسىن جاساپ, راك جاسۋشالارىن قالىپتى كۇيگە قايتارۋعا مۇمكىندىك بەرەتىن نەگىزگى مولەكۋلالاردى انىقتادى. بۇل ءادىس جانۋارلارعا جاسالعان سىناقتان ءساتتى ءوتتى. عالىمدار بۇل ءتاسىلدى باسقا قاتەرلى دەرت تۇرلەرىنە دە قولدانۋعا بولادى دەپ وتىر.
