«مۋفاسا: ارىستان پاتشا» فيلمىندە رافيكي سيمبا مەن نالانىڭ قىزى كياراعا پرايد جەرلەرىنىڭ سۇيىكتى پاتشاسىنىڭ حيكاياسى مەن پاتشا اتانۋ جولىندا باسىنان كەشكەن قيىندىقتارى تۋرالى باياندايدى. اداسىپ, جەتىم قالعان مۋفاسا پاتشا وتباسىنان شىققان تاكا ەسىمدى مۇراگەردى كەزدەستىرەدى. تاكا وعان جانى اشىپ, قولداۋ كورسەتەدى. ەكەۋى تاعدىر وزگەرتەر ساياحاتقا اتتانىپ, دۇشپاندارىمەن بەتپە-بەت كەزدەسەدى. ولاردىڭ دوستىعى دا سىنعا تۇسەدى. سونداي-اق كورەرمەن تيمون, پۋمبامەن قايتا قاۋىشادى.
شىتىرمان وقيعاعا قۇرىلعان ءفيلمنىڭ شىنايى قابىلدانۋى دۋبلياج قىزمەتىمەن تىكەلەي بايلىنىستى ەكەنى بەلگىلى. ەراسىل مۇحاماديەۆ – مۋفاسا, باقتيار بايسەرىك – پۋمبا, دۋلىعا اقمولدا – رافيكي, اسان ءماجىت – كيروستى كەيىپتەپ, باس كەيىپكەرلەردى قازاق تىلىندە دىبىستادى. ال قازاق تىلىندەگى ۆوكالدى پارتيالار Abik Jeksen – مۋفاسا, دينارا سۇلتان – سارابي, Jaman T (تاير ساحيەۆ) – جاس رافيكي, Ace – زازۋدىڭ داۋسىمەن شىرقالدى. تاكانىڭ ءسوزى مەن اندەرىن قازاق تىلىندەگى دۋبلياجدىڭ رەجيسسەرى شاح-مۇرات ورداباەۆ ورىندادى. انيماتسيانىڭ مۋزىكالىق جەتەكشىسى – انەل سىرگەباەۆا.
– قازاق تىلىنە اۋدارىلىپ جاتقان فيلمدەردى بارىنشا كەڭىنەن ناسيحاتتاپ, قازاق دۋبلياجىن قولداۋعا شاقىرۋدى جالعاستىرا بەرەمىز. الەمدىك ستۋديالاردىڭ قازاقتىلدى ورتانىڭ قىزىعۋشىلىعى مەن نارىققا ىقپالىن ەسكەرىپ, ۇزدىك تۋىندىلارىن ءوز ەسەبىنەن اۋدارىپ, ۇسىنۋى – ءبىز ءۇشىن وتە ماڭىزدى باستاما. بيىلعى الەمدىك پرەمەرالاردىڭ قازاق تىلىندەگى اۋدارماسى بۇرىن-سوڭدى بولماعان رەكوردتىق كورسەتكىشتەرگە جەتتى. «موانا 2» ءفيلمىنىڭ قازاقشا نۇسقاسى بۇعان دەيىنگى قازاق تىلىندەگى بارلىق انيماتسيالىق ءفيلمنىڭ رەكوردتارىن جاڭارتتى. بۇل – قازاقشا كينو قاراۋعا ىقىلاستى قاۋىم كوبەيگەنىنىڭ بەلگىسى. الداعى ۋاقىتتا تانىمال تۋىندىلاردى قازاق تىلىنە اۋدارۋ جالعاسا بەرەدى. بۇل ءتىلىمىزدىڭ تارتىمدىلىعىن ارتتىرۋعا جانە كەڭىنەن تاراتۋعا باعىتتالعان ءتيىمدى ءتاسىل دەپ سانايمىن, – دەيدى حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى.
بۇعان دەيىن «موانا 2-ءنىڭ» قازاقشا نۇسقاسى بوكس-وفيستەردىڭ 12,36% ۇلەسىن قامتىدى. كاسسالىق تابىس ۇلەسى 12 كۇندە 151 000 000 تەڭگەدەن اسىپ, قازاقشاعا اۋدارىلعان انيماتسيالىق فيلمدەر اراسىندا ەڭ تابىستى تۋىندى رەتىندە رەكورد ورناتتى. بيىل ماۋسىم ايىندا Disney مەن Pixar ستۋدياسىنىڭ «ويجۇمباق 2» ءفيلمى العاشقى 4 كۇندە 40 000 000 تەڭگەدەن استام قاراجات جيناپ, بۇعان دەيىن كورسەتىلگەن تۋىندىلار اراسىندا رەكورد ورناتقان ەدى.
الماتى
