تاۋەلسىزدىك جىلدارىندا العاش رەت يادرولىق فيزيكا ينستيتۋتىنا ارنايى سالىنعان جاتاقحانا پايدالانۋعا بەرىلدى. جەتى قاباتتى جاڭا عيمارات 166 قىزمەتكەر مەن مامانعا ارنالعان. بۇل نىسان عىلىمي-زەرتتەۋ ۇيىمىنىڭ الەۋمەتتىك ينفراقۇرىلىمىن كۇشەيتىپ, عىلىم ادامدارىنىڭ تۇرمىس ساپاسىن جاقسارتۋعا باعىتتالعان ماڭىزدى قادام سانالادى.
سالتاناتتى اشىلۋ راسىمىنە ەلىمىزدىڭ اتوم ەنەرگياسى جونىندەگى اگەنتتىگىنىڭ توراعاسى الماسادام ساتقاليەۆ پەن ينستيتۋتتىڭ باس ديرەكتورى سايابەك ساحيەۆ قاتىستى. جالپى اۋماعى 5 082 شارشى مەتردى قۇرايتىن عيمارات جاس عالىمدارعا قولايلى جاعداي جاساپ, كادرلىق الەۋەتتى بەكەمدەۋدى كوزدەيدى. بۇل باستاما ەلدەگى يادرولىق كلاستەردى قالىپتاستىرۋ ۇدەرىسىنە دە سەرپىن بەرەدى.
اتوم ەنەرگەتيكاسى ماماندارى «بولاشاق» باعدارلاماسى اياسىندا ءبىلىم الادى
جاتاقحانا زاماناۋي تالاپتارعا ساي بوي كوتەرگەن. جارتىلاي جەرتولە قاباتىندا جاتتىعۋ زالى, كىر جۋ بولمەسى, قىزمەتتىك ءۇي-جايلار ورنالاسقان. ءبىرىنشى قاباتتا كەڭ ۆەستيبيۋل, قابىلداۋ ايماعى, كوۆوركينگ كەڭىستىگى, كەلىسسوزدەر زالى, 50 ورىندىق اسحانا قاراستىرىلعان. ءار بولمە جەكە سانيتارلىق توراپپەن, دۋش كابيناسىمەن جابدىقتالعان. بۇل تۇرعىنداردىڭ تۇرمىستىق جايلىلىعىن ارتتىرىپ, جەكە كەڭىستىكتى ساقتاۋعا مۇمكىندىك بەرەدى. جوبالاۋ كەزىندە ەرەكشە قاجەتتىلىگى بار ازاماتتارعا ارنالعان قولجەتىمدى ورتا تالاپتارى ەسكەرىلگەن.
الماسادام ساتقاليەۆ عىلىمدى ىلگەرىلەتۋ الەۋمەتتىك ينفراقۇرىلىمنان باستالاتىنىن جەتكىزدى. ونىڭ ايتۋىنشا, قولايلى ورتا تۇراقتى عىلىمي ۇجىمداردىڭ قالىپتاسۋىنا جول اشادى, دارىندى جاستاردى تارتادى, اتوم سالاسىنىڭ كەلەشەگىن ايقىندايتىن اۋقىمدى جوبالاردى جۇزەگە اسىرۋعا نەگىز قالايدى.
سايابەك ساحيەۆ جاڭا نىسان ينستيتۋتتى جاڭعىرتۋ جولىنداعى جۇيەلى جۇمىستىڭ ءبىر بەلەسى ەكەنىن ايتتى. كەيىنگى جىلدارى يادرولىق مەديتسينا, رادياتسيالىق تەحنولوگيالار, ىرگەلى زەرتتەۋلەر باعىتىندا تىڭ جوبالار قولعا الىنعان. جاتاقحانانىڭ ىسكە قوسىلۋى وسى باستامالاردىڭ تۇراقتى دامۋىنا قىزمەت ەتەدى.
عالىمعا جاسالعان جاعداي – ەلدىڭ ەرتەڭىنە سالىنعان ينۆەستيتسيا. جاڭا جاتاقحانا عىلىمي ورتادا ورنىقتى كاسىبي احۋال قالىپتاستىرىپ, اتوم سالاسىنىڭ ستراتەگيالىق مىندەتتەرىن جۇزەگە اسىرۋعا نەگىز بولاتىن زاماناۋي ەكوجۇيەنى نىعايتا تۇسەدى.
ەسكە سالا كەتەيىك, بىلتىر جاس عالىمدارعا پاتەر كىلتى تابىستالعان بولاتىن.
