فوتو: سىرتقى ىستەر مينيسترلىگى
ارمەنيا تاراپىمەن قازاقستان ازاماتتارىنىڭ يران – ارمەنيا شەكاراسىنان كەدەرگىسىز ءوتۋىن قامتاماسىز ەتۋ ماسەلەسى كەلىسىلدى. قاجەت بولعان جاعدايدا ازاماتتار ارمەنيا اۋماعى ارقىلى ەۆاكۋاتسيالانادى. ارمەنيانىڭ سىرتقى ساياسي ۆەدومستۆوسىنىڭ باسشىلىعىمەن تۇراقتى بايلانىس ورناتىلعان.
وسىعان ۇقساس كەلىسسوزدەر ازەربايجان تاراپىمەن دە جۇرگىزىلدى. ازەربايجان ەۆاكۋاتسيالاۋ ىسىندە قولداۋ كورسەتۋگە دايىن ەكەنىن ءبىلدىردى. الايدا ەلدىڭ قۇرلىقتاعى شەكارا بەكەتتەرىندە وتكىزۋ ءتارتىبى شەكتەۋلى بولعاندىقتان, شەكارادان ءوتۋ ءۇشىن ارنايى رۇقسات تالاپ ەتىلەدى. ەكى ازاماتتىڭ ءوتىنىشى نەگىزىندە قازاقستان رەسپۋبليكاسىنىڭ ازەربايجانداعى ەلشىلىگى يراننان «دجۋلفا» باقىلاۋ-وتكىزۋ پۋنكتى (ناحچىۆان) ارقىلى كىرۋگە جەدەل رۇقسات الدى.
تۇرىكمەنستان تاراپى دا وتانداستارىمىزدى ەۆاكۋاتسيالاۋ ماقساتىندا مەملەكەتتىك شەكارادان وتكىزۋگە جاردەم كورسەتۋگە دايىن ەكەنىن راستادى.
بۇل باعىتتاعى جۇمىستار جالعاسىپ جاتىر. قوسىمشا اقپارات سىرتقى ىستەر مينيسترلىگىنىڭ جانە شەتەلدەگى مەكەمەلەردىڭ رەسمي اقپاراتتىق رەسۋرستارىندا جاريالانادى.
جەدەل اقپارات تاراتۋ ءۇشىن سىرتقى ىستەر مينيسترلىگى زاماناۋي تسيفرلىق مۇمكىندىكتەردى, سونىڭ ىشىندە Kaspi ينفراقۇرىلىمىن پايدالاندى. كومپانيامەن بىرلەسىپ حابارلاما تاراتۋ جۇيەسى ىسكە قوسىلىپ, وڭىردەگى ازاماتتاردىڭ ءموبيلدى قۇرىلعىلارىنا رەسمي اقپارات پەن تۇسىندىرمەلەر ۋاقىتىلى جەتكىزىلىپ جاتىر.
«وڭىردەگى احۋال تولىق تۇراقتالعانعا دەيىن ازاماتتاردى سابىر ساقتاۋعا, جەرگىلىكتى بيلىك ورگاندارىنىڭ تالاپتارى مەن ۇسىنىستارىن ورىنداۋعا, قاۋىپتى ايماقتاردان اۋلاق بولۋعا جانە ۋاقىتشا شەكتەۋلەرگە تۇسىنىستىكپەن قاراۋعا شاقىرامىز. جاڭا مالىمەتتەر تۇسكەن جاعدايدا قوسىمشا حابارلانادى. وسىعان بايلانىستى سىرتقى ىستەر مينيسترلىگىنىڭ جانە شەتەلدەگى مەكەمەلەردىڭ رەسمي اقپاراتتارىن ۇنەمى قاداعالاپ وتىرۋدى سۇرايمىز», دەلىنگەن مينيسترلىك حابارلاماسىندا.
