مارقۇمداردىڭ جاقىن تۋىسى گالينا نابيەۆانىڭ «31 ارناعا» بەرگەن سۇحباتىنا سۇيەنسەك, بۇل قاسىرەتتىڭ الدىن الۋعا مۇمكىندىك بولعان. كۇدىكتىنىڭ پسيحيكالىق اۋىتقۋلارى ەرتە جاستان, ءتىپتى ءۇشىنشى سىنىپتان باستاپ بايقالعان كورىنەدى.
«ول پسيحيكالىق ەسەپتە تۇرعان. ءبىزدىڭ نوۆوروسسيسكىدە تۇراتىن اعامىز بار. اپكەم (مارقۇم) وعان حابارلاسىپ, ۇلىنىڭ (كۇدىكتىنىڭ) ۇستىنەن شاعىمداناتىن كورىنەدى. نەگە ول ماعان ايتپادى ەكەن؟ ەگەر بىلگەنىمدە, ونى بىردەن ءتيىستى مەكەمەگە جاتقىزار ەدىم. ول ەكى جىل بويى پسيحيكالىق اۋرۋحانادا ەمدەلدى. ءتىپتى ءۇشىنشى سىنىپتا وقىپ جۇرگەندە-اق ونىڭ اقىل-ەسىندە اۋىتقۋلار بارى انىقتالعان ەدى. ونى قاراۋسىز قالدىرۋعا بولمايتىن, ول تۇراقتى كومەككە مۇقتاج جان بولاتىن. بۇل جەردە دارىگەرلەر دە ءوز جۇمىسىن ءتيىستى دەڭگەيدە اتقارمادى دەپ ەسەپتەيمىن», دەيدى مارقۇمداردىڭ تۋىسى گالينا نابيەۆا.
اۋىل تۇرعىندارىنىڭ ايتۋىنشا, بۇل وتباسى سىرت كوزگە وتە تىنىش كورىنگەن. كۇدىكتىنىڭ ءوزى تۇيىق بولعان, اۋلادان شىقپاي, ادامدارمەن ارالاسپاعان. تەك كەيدە ەش سەبەپسىز ايقايلاپ, اينالاسىنا قورقىنىش ۇيالاتاتىن ساتتەرى بولعانىن ايتادى.
اقمولا وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى ەرلان اقباروۆتىڭ مالىمدەۋىنشە, اتالعان فاكتى بويىنشا قىلمىستىق ءىس قوزعالىپ, تەرگەۋ امالدارى ىشكى ىستەر مينيسترلىگى مەن وڭىرلىك دەپارتامەنت باسشىلىعىنىڭ تىكەلەي باقىلاۋىنا الىندى.
