قازاقستان رەسپۋبليكاسىنىڭ جيددا قالاسىنداعى باس كونسۋلى رۋسلان قوسپانوۆ مەككەدەگى ابرادج ءال-بەيت كەشەنىندە (ساعات مۇناراسى) ورنالاسقان پايعامباردىڭ ءومىربايانى جانە يسلام وركەنيەتى حالىقارالىق مۇراجايىنا زيارات ەتتى.
مۇراجايدىڭ ەكسكليۋزيۆتى وپەراتور بولىپ تابىلاتىن Al-Salam Company (ASC) كومپانياسىنىڭ باس مەنەدجەرى فايەز كانساردىڭ قاتىسۋىمەن وتكەن كەزدەسۋ بارىسىندا مادەنيەت, اعارتۋ جانە تۋريزم سالالارىنداعى ىقتيمال ىنتىماقتاستىق باعىتتارى تالقىلاندى. بۇل باعىتتار قاسيەتتى مەككە مەن ءمادينا قالالارىنا باراتىن قازاقستان ازاماتتارى ءۇشىن مۇمكىندىكتەردى كەڭەيتۋدى كوزدەيدى.
قازاقستان كۆوتاسىمەن شەتەلدىكتەردى قاجىلىققا اپارعاندار جاۋاپقا تارتىلادى
باس كونسۋل بۇعان دەيىن دۇنيەجۇزىلىك مۇسىلمان ليگاسىنىڭ باسشىلىعىمەن قول جەتكىزىلگەن ۋاعدالاستىقتارعا سايكەس جانە قازاقستان مۇسىلماندارى ءدىني باسقارماسىنىڭ قاتىسۋىمەن, قازىرگى ۋاقىتتا قازاقستان رەسپۋبليكاسىنىڭ ەلورداسى استانا قالاسىندا ورتالىق ازياداعى العاشقى پايعامبار مۇراجايىن اشۋ جونىندەگى جۇمىستار جۇرگىزىلىپ جاتقانىن اتاپ ءوتتى.
ءوز كەزەگىندە, فايەز كانسارا اتالعان باستامانى جوعارى باعالاپ, ءوزارا ءتيىمدى ىنتىماقتاستىقتى ودان ءارى جولعا قويۋ جانە نىعايتۋعا دايىندىعىن ءبىلدىردى.
كەزدەسۋ قورىتىندىسى بويىنشا مۇراجايدىڭ ەكسكليۋزيۆتى وپەراتورى بولىپ تابىلاتىن Al-Salam Company (ASC) كومپانياسى مەن قازاقستان رەسپۋبليكاسىنىڭ باس كونسۋلدىعى اراسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويۋدىڭ سالتاناتتى ءراسىمى ءوتتى. ءراسىم بارىسىندا فايەز كانسارا قازاقستان رەسپۋبليكاسىنىڭ مۇراجايدىڭ وسىنداي كەلىسىمگە قول قويعان العاشقى شەت مەملەكەت بولعانىن ەرەكشە اتاپ ءوتتى.
ەلوردادا 17 ادامدى «قاجىلىققا جىبەرەمىن» دەپ الداعان الاياق جازالاندى
قول قويىلعان قۇجاتقا سايكەس, قازاقستان رەسپۋبليكاسى ازاماتتارى ءۇشىن ارنايى جەڭىلدىك باعدارلاماسىن ەنگىزۋ جونىندە كەلىسىمگە قول جەتكىزىلدى. بۇل باعدارلاما پايعامباردىڭ ءومىربايانى جانە يسلام وركەنيەتى حالىقارالىق مۇراجايىنا كىرۋ بيلەتتەرىنە جەڭىلدىك بەرۋدى كوزدەيدى. اتالعان باستاما مەككە مەن ءمادينا قالالارىنداعى مۇراجايدىڭ فيليالدارىنا دا قولدانىلادى جانە شەكتەۋلى مەرزىم ىشىندە جۇزەگە اسىرىلادى, ودان كەيىن تاراپتاردىڭ قالاۋى بويىنشا ۇزارتىلۋى مۇمكىن.
كەزدەسۋ قورىتىندىسى بويىنشا تاراپتار سەرىكتەستىكتى ودان ءارى نىعايتۋعا, بىرلەسكەن مادەني-اعارتۋشىلىق باستامالاردى دامىتۋعا, سونداي-اق قازاقستان ازاماتتارىنىڭ كورولدىككە ساپارى بارىسىندا قىزمەت كورسەتۋ ساپاسىن ارتتىرۋ جانە مۇمكىندىكتەردى كەڭەيتۋ ماقساتىندا جۇمىس تارتىبىندەگى ۇيلەستىرۋدى جالعاستىرۋعا دايىن ەكەندىكتەرىن ءبىلدىردى.
