«2026 جىلعى 28 اقپاندا باستالعان اسكەري ءىس-قيمىلدار توقتاتىلدى», دەپ جازدى ترامپ وكىلدەر پالاتاسىنىڭ سپيكەرى مايك دجونسون مەن سەنات توراعاسىنىڭ مىندەتىن ۋاقىتشا اتقارۋشى چاك گراسسليگە جازعان حاتىندا.
الايدا حاتتا سوعىستىڭ تولىق اياقتالماعانىن مەڭزەيتىن مالىمدەمە دە بولدى.
«اقش-تىڭ يران رەجيمىنە قارسى وپەراتسيالارىنىڭ ءساتتى وتكەنىنە جانە تۇراقتى بەيبىتشىلىك ورناتۋ باعىتىنداعى جالعاسىپ جاتقان كۇش-جىگەرگە قاراماستان, يراننىڭ اقش پەن ءبىزدىڭ قارۋلى كۇشتەرىمىزگە توندىرەتىن قاۋپى ءالى دە ايتارلىقتاي», دەدى پرەزيدەنت.
1973 جىلعى اسكەري وكىلەتتىكتەر تۋرالى قارارعا سايكەس, اقش پرەزيدەنتى اسكەري ءىس-قيمىلداردى تەك 60 كۇن جۇرگىزە الادى. وسى مەرزىمنەن كەيىن ول سوعىستى توقتاتۋى نەمەسە «شۇعىل اسكەري قاجەتتىلىك» جاعدايىندا كونگرەستەن تاعى 30 كۇنگە ۇزارتۋدى سۇراۋعا ءتيىس.
ترامپقا قاستاندىق جاساماق بولعان كۇدىكتى ءومىر بويىنا سوتتالۋى مۇمكىن
30 ساۋىردە CBS News امەريكالىق شەنەۋنىكتەرگە سىلتەمە جاساپ, اقش-تىڭ يرانعا قارسى سوعىسقا جۇمساعان ناقتى شىعىندارى پەنتاگون جاريالاعان 25 ميلليارد دوللاردان ەكى ەسە كوپ ەكەنىن حابارلادى. ءبىر كۇن بۇرىن اقش قورعانىس مينيسترلىگىنىڭ قارجى ديرەكتورى دجۋلس حيورست كونگرەسسمەندەرگە رەسمي شىعىن كولەمى 25 ميلليارد دوللار ەكەنىن ايتقان. الايدا CBS News دەرەككوزدەرى بۇل ەسەپكە جويىلعان جانە زاقىمدانعان تەحنيكا مەن امەريكالىق اسكەري بازالارعا كەلتىرىلگەن شىعىن كىرمەيتىنىن مالىمدەدى.
دەموكرات سەناتور كريس كۋنس تا رەسمي باعالاۋدى تىم تومەندەتىلگەن دەپ اتاپ, وعان سوڭعى ەكى ايدا ايماقتاعى اسكەردى ۇستاۋعا كەتكەن شىعىندار ەنگىزىلمەگەنىن ايتتى.
ينفراقۇرىلىمدى جويۋ قاۋپى: ترامپ يرانعا تاعى دا سەس كورسەتتى
بۇدان بولەك, باق مالىمەتىنشە, دونالد ترامپ يران ەكونوميكاسىن مۇناي ەكسپورتىن شەكتەۋ ارقىلى تۇنشىقتىرۋ ماقساتىندا ۇزاق مەرزىمدى تەڭىز بلوكاداسىنا دايىندىق جۇرگىزۋدى تاپسىرعان.
