باس پروكۋراتۋرانىڭ حابارلاۋىنشا, كۇدىكتى 2005-2007 جىلدار ارالىعىندا الماتى قالاسىنداعى قۇرىلىس كومپانياسىندا ەسەپشى بولىپ جۇمىس ىستەي وتىرىپ, ۇلەستىك قۇرىلىسقا قاتىسۋشىلاردان اقشا قابىلداۋدى جۇزەگە اسىرعان, تۇرعىن ءۇي كەشەنىنىڭ اياقتالماعان قۇرىلىس وبەكتىسى بويىنشا كىرىس كاسسالىق وردەرلەرىنە بۋحگالتەرلىك ەسەپتە كورسەتىلمەگەن جالعان تۇبىرتەكتەر جازعان.
«ونىڭ جانە قىلمىستىڭ باسقا دا قاتىسۋشىلارىنىڭ ارەكەتتەرى سالدارىنان الماتى قالاسىنىڭ 80-نەن استام تۇرعىنى زارداپ شەكتى, ولارعا 3,7 ملرد تەڭگەدەن استام شىعىن كەلتىرىلدى.قىلمىسقا قاتىسۋشىلاردىڭ ءبىرى سوتتالعان, الايدا ول قىلمىس جاساعاننان كەيىن جاسىرىنعان, سوندىقتان وعان حالىقارالىق ىزدەۋ جاريالاندى», دەلىنگەن حابارلامادا.
وتكەن جىلدىڭ جەلتوقسان ايىندا ىزدەۋدە جۇرگەن ادام رەسەي فەدەراتسياسىنىڭ كراسنودار ولكەسىندە ۇستالعان. كەيىن قازاقستان رەسپۋبليكاسى باس پروكۋراتۋراسىنىڭ سۇراۋ سالۋى بويىنشا قازاقستانعا ەكستراديتسيالانعان.
«قازىرگى ۋاقىتتا كۇدىكتى تەرگەۋ يزولياتورىنا قامالدى. ايىپتاعان قىلمىس جاساعانى ءۇشىن مۇلكى تاركىلەنىپ, بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان», دەپ حابارلادى پروكۋراتۋرانىڭ ءباسپاسوز قىزمەتى.
