ەربول مىرزابوسىنوۆ ەڭ الدىمەن 2020 جىلى پايدالانۋعا بەرىلگەن «ارەنا» مادەني-سپورت كەشەنىنە باردى. بۇل كەشەندە بالالارعا باسكەتبول, فۋتبول, تەننيس, سۋ پولو جانە ءجۇزۋ سياقتى سپورت تۇرلەرىمەن ەركىن اينالىسۋعا بارلىق قاجەتتى جاعدايلار جاسالعان. مۇندا زاماناۋي جابدىقتار, كەڭ ءارى ىڭعايلى الاڭدار بار, بۇل بالالاردىڭ سپورتپەن شۇعىلدانۋىنا ۇلكەن مۇمكىندىك بەرەدى.
سونداي-اق وڭىردەگى جاتتىقتىرۋشىلارمەن كەزدەسىپ, ولاردىڭ پىكىرلەرى مەن ۇسىنىستارىن تىڭداپ, جەرگىلىكتى مامانداردىڭ جۇمىس شارتتارى مەن ماسەلەلەرىن نازارعا الدى.
مينيستر جاتتىقتىرۋشىلارمەن كەزدەسۋدە وليمپيادالىق رەزەرۆتى دايارلاۋ ماسەلەسىنىڭ ماڭىزدىلىعىن اتاپ ءوتتى. بۇل ماسەلە قازاقستاندا جوعارى دەڭگەيدەگى سپورتشىلاردى دايىنداۋعا كەدەرگى كەلتىرۋدە. مينيستر ماسەلەنى شەشۋ ءۇشىن بولاشاقتا ارنايى باعدارلامالار مەن جوبالاردى ىسكە اسىرۋ قاجەتتىگىن ايتتى.
بۇدان بولەك, ول جاتتىقتىرۋشىلاردىڭ بىلىكتىلىگىن ارتتىرۋدىڭ ماڭىزدىلىعىنا توقتالىپ, ولاردى ۇزدىكسىز ءبىلىم بەرۋ باعدارلامالارىمەن قامتاماسىز ەتۋ قاجەتتىگىن اتاپ ءوتتى. سپورتتىق مەديتسينا سالاسىنا دا كوپ كوڭىل ءبولىنۋى كەرەكتىگىن, ونىڭ سپورتشىلاردىڭ دەنساۋلىعىن ساقتاۋ جانە ءتيىمدى جاتتىعۋ پروتسەسىن ۇيىمداستىرۋ ءۇشىن ماڭىزدى ءرول اتقاراتىنىن جەتكىزدى.
بۇدان ءارى مينيستر جاقسىلىق ۇشكەمپىروۆ اتىنداعى سەمەي قالاسىنداعى №1 وبلىستىق وليمپيادالىق رەزەرۆ مامانداندىرىلعان بالالار-جاسوسپىرىمدەر سپورت مەكتەبىنە باردى. مۇندا بالالار بوكس, دزيۋدو, گرەك-ريم كۇرەسى, ەركىن كۇرەس, ۆەلوسپورت, تاەكۆوندو (WT, I.T.F), سپورتتىق جانە جاۋىنگەرلىك سامبو, سونداي-اق ۆولەيبول سەكىلدى سپورت تۇرلەرىمەن اينالىسادى.
«قازىرگى تاڭدا اباي وبلىسىندا جازعى جانە قىسقى وليمپيادالىق, وليمپيادالىق ەمەس, پاراليمپيادالىق, سۋردليمپيادالىق سپورت تۇرلەرى قارقىندى دامىپ كەلەدى. ۇلتتىق سپورت تۇرلەرىنە دەگەن قىزىعۋشىلىق تا ارتا تۇسۋدە. قىركۇيەك ايىندا ەلوردامىزدا 5-ءشى دۇنيەجۇزىلىك كوشپەندىلەر ويىندارى وتكەنىن جاقسى بىلەسىزدەر. اباي وبلىسىنىڭ سپورتشىلارى 3 التىن جانە 2 كۇمىس مەدالدى ەنشىلەدى. كەلەسى جىلدىڭ باستى سپورتتىق وقيعالارىنىڭ ءبىرى – قىتايدىڭ حاربين قالاسىندا وتەتىن قىسقى ازيا ويىندارى. بۇگىندە سپورتشىلارىمىزدىڭ ءساتتى ونەر كورسەتۋىن قامتاماسىز ەتۋ بويىنشا دايىندىق جۇمىستارى جۇرگىزىلۋدە. قازاقستان قۇراماسىنان 6 سپورت تۇرىنەن 139 سپورتشى قاتىسادى دەپ جوسپارلانۋدا. سونىڭ ىشىندە اباي وبلىسىنان 4 سپورتشى, اتاپ ايتقاندا بياتلوننان – 2, شاڭعى جارىسىنان 2 سپورتشى قاتىسادى», دەدى ەربول مىرزابوسىنوۆ.
