اقىننىڭ كىندىك قانى تامعان مەكەندە وسىعان دەيىن ءبيۋستى مەن جەكەلەگەن ەسكەرتكىشتەرى ەلىمەن ويشىلدىڭ مەرەيتويلارى قارساڭىندا قاۋىشقان ەدى. ال بۇل كومپوزيتسيادا ءمۇسىنشى شاكارىمنىڭ ويلى بەينەسىن وڭ قولىنا كىتاپ, سول قولىنا تاسپيق ۇستاتۋ ارقىلى بەينەلەگەن. ەسكەرتكىش اۆتورى – وسىعان دەيىن ابايدىڭ, قۇنانبايدىڭ جانە باسقا دا تاريحي تۇلعالاردىڭ كەسكىن-كەلبەتىن كەلىستىرگەن – جەرگىلىكتى ءمۇسىنشى نۇربول قاليەۆ. ەرەكشە ماعىنا ۇستەگەن ونەر تۋىندىسى تاريحي قالانىڭ شاكارىم داڭعىلى مەن قابانباي باتىر كوشەسىنىڭ قيىلىسىنا قويىلدى.
اتالعان ەسكەرتكىشتىڭ سالتاناتتى اشىلۋ راسىمىنە پرەزيدەنت قاسىم-جومارت توقاەۆ قۇتتىقتاۋ حات جولدادى. حاتتى سالتاناتتى ءىس-شارادا وبلىس اكىمى نۇرلان ۇرانحاەۆ وقىپ بەردى.
«بارشاڭىزدى قازاق رۋحانياتىنىڭ التىن بەسىگى – سەمەي تورىندەگى شاكارىم قۇدايبەردى ۇلى ەسكەرتكىشىنىڭ اشىلۋىمەن قۇتتىقتايمىن!
شاكارىم قۇدايبەردى ۇلى – ءتول وركەنيەتىمىزدىڭ ءورىسىن كەڭەيتۋگە ولشەۋسىز ۇلەس قوسقان كەمەڭگەر تۇلعا.
عۇلاما ويشىل ۇلاعاتى مول شىعارمالار جازىپ, ۇلى ابايدىڭ سارا جولىن جالعادى. الەم ادەبيەتىنىڭ جاۋھار تۋىندىلارىن انا تىلىمىزدە سويلەتتى. سول ارقىلى ۇلت دۇنيەتانىمىن بايىتۋعا زور ەڭبەك ءسىڭىردى.
شاكارىم قۇدايبەردى ۇلى قازاق حالقىنىڭ عانا ەمەس ءتۇبى ءبىر تۇركى جۇرتىنىڭ تاريحىن جاڭعىرتىپ, اعارتۋشىلىق سالاسىندا وشپەس ءىز قالدىردى. ەۋروپا مەن شىعىس ەلدەرىنىڭ ءىلىمىن تەرەڭ زەرتتەپ, ۇلتتىق فيلوسوفيانىڭ ىرگەتاسىن قالاۋعا اتسالىستى.
كورنەكتى اقىننىڭ اق جۇرەك, تازا اقىل, ادال ەڭبەك سياقتى اسىل قاسيەتتەردى كەڭىنەن دارىپتەگەن تەڭدەسسىز مۇراسى ءالى تالاي ۇرپاققا ونەگە بولارى ءسوزسىز.
ساۋلەت ونەرىنىڭ تۋىندىسى ەل يگىلىگىنە اينالسىن» دەلىنگەن مەملەكەت باسشىسى جولداعان حاتتا.
شاكارىم قۇدايبەردى ۇلى – ءحىح عاسىردىڭ سوڭى مەن وتكەن عاسىردىڭ باسىندا قازاق رۋحانياتىنىڭ قامباسىن بايىتقان ايتۋلى ءسوز زەرگەرلەرىنىڭ ءبىرى. ابايدىڭ ءتالىمى مەن تاعىلىمىن تەرەڭ ۇعىنعان ول ارنايى حاكىم اماناتىن ورىنداپ, قاجىلىق ساپار شەگۋمەن بىرگە ەۋروپا ەلدەرىن ارالاپ, قازاقتىڭ ءتۇپ تاريحىن تاسقا باسقان. ادامزات بالاسى ءۇشىن ەڭ قاستەرلى ۇعىم ار ءىلىمىن العا تارتىپ, ءوزىنىڭ عۇمىرلىق فيلوسوفياسىمەن تانىلعان ءسوز يەسى. ونىڭ اسا باي ءارى سان قىرلى مول ادەبي مۇراسى – قازاق حالقىنىڭ عانا ەمەس, بارشا تۇركى جانە شىعىس مادەنيەتى ءۇشىن, جالپى ادام بالاسى ءۇشىن ەڭ قاستەرلى دۇنيەلەر.
اباي وبلىسى
