بىلتىر باستاۋ العان بۇل باعدارلاما بيىل دا جالعاسىن تاۋىپ, 3 مىڭنان استام ايەل IT سالاسىندا ءبىلىمىن شىڭدادى. اتالعان جوبا 18 جاستان اسقان قىز-كەلىنشەكتەردى, ونىڭ ىشىندە جۇمىسسىزداردى, دەكرەتتىك دەمالىستاعى ايەلدەردى, ستۋدەنتتەر مەن جاس كاسىپكەرلەردى قامتيدى. قاتىسۋشىلاردىڭ باسىم بولىگى باتىس قازاقستان وڭىرىنەن, استانا, الماتى قالالارىنان تىركەلگەن.
ەكىنشى لەكتىڭ بىرقاتار تابىستى باستامالارى بار. ماسەلەن, قىزىلوردالىق ساعيليا ساعيدان «EdKids» اتتى وڭتايلى وقىتۋ پلاتفورماسىن ويلاپ تاپتى. بۇل قىزمەت بالالارعا ساپالى ءبىلىم ۇسىنىپ, ەرتە جاستان باستاپ ءوز داعدىلارىن دامىتۋعا سەپتىگىن تيگىزەدى. اتالعان باعدارلاما ينتەراكتيۆتى وقىتۋعا باعىتتالعان ءارى كەڭ اۋديتورياعا قولجەتىمدى. ال اقتوبەلىك اسەل قاراجان مەنتالدى اريفمەتيكاعا باۋليتىن «AKM Education» مەكتەبىنىڭ ساپالى سايتىن ازىرلەدى. بۇل مەكتەپ بالالار مەن جاسوسپىرىمدەردىڭ اناليتيكالىق ويلاۋىن دامىتۋعا, جادى مەن زەيىنىن جاقسارتۋعا كومەكتەسىپ, زاماناۋي وقىتۋ تاسىلدەرىن ۇسىنادى. استانالىق مەرۋەرت جارىلقاسىنوۆا دا جوبادا جارقىن ناتيجە كورسەتىپ, «Qadam» ءموبيلدى قوسىمشاسىن ىسكە قوستى. بۇل ءونىم كاسىپكەرلەر مەن ستارتاپ يەلەرىنە قولجەتىمدى گرانتتار مەن قولداۋ باعدارلامالارى تۋرالى مالىمەتتەردى وڭاي ىزدەپ, ءوتىنىم بەرۋگە وتە ىڭعايلى. ال الماتىلىق ايدانا سەمباەۆا «Telegram» جەلىسىندە ءجيى قويىلاتىن سۇراقتارعا جەدەل جاۋاپ بەرەتىن اقىلدى چاتبوت ازىرلەدى. بۇل بيزنەس-ۇدەرىستىڭ تيىمدىلىگىن ارتتىرادى.
«Astana Hub» باسقارۋشى ديرەكتورى دانيا احمەتوۆانىڭ ايتۋىنشا, جوباعا قاتىسۋشىلار سانى جىل سايىن ارتىپ كەلەدى.
«IT سالاسىندا ءبىلىمىن شىڭداۋ ماقساتىندا بىلتىر IT-Aiel باعدارلاماسىنا ەلىمىزدىڭ 17 وڭىرىنەن 2634 ايەل ءوتىنىم بەردى. ولاردىڭ قاتارىندا 900-دەن استام جۇمىسسىز, 500 ستۋدەنت, 700 ءوزىن-ءوزى جۇمىسپەن قامتىعان قىز-كەلىنشەك, سونداي-اق 400-دەن استام دەكرەتتەگى انا بولدى. ءبىرىنشى لەك تۇلەكتەرى ۆەب-سايتتار مەن قوسىمشالار سياقتى ءوز IT-ونىمدەرىن مەڭگەردى. وسىلايشا, ولار قارجىلىق تاۋەلسىزدىك پەن كاسىبي شىڭدالۋعا ماڭىزدى قادام جاسادى. ماسەلەن, ءاليا ورازىمبەتوۆا بالالار مەن جاسوسپىرىمدەر اراسىنداعى تسيفرلىق گيگيەنا جانە كيبەربۋللينگتىڭ الدىن الۋ تۋرالى بوت-كومەكشى «CyberBalا» جوباسىن ازىرلەدى. وسىنداي مىسالدى مىڭداپ كەلتىرۋگە بولادى. بيىل دا باعدارلاما بارىسىندا ايەلدەر تابىستى مانساپ قۇرىپ, قوعامنىڭ دامۋىنا ۇلەس قوسۋعا سەپتىگىن تيگىزەتىن جاڭا مۇمكىندىكتەرگە قول جەتكىزدى», دەدى ول.
جوبانىڭ ەكىنشى لەگى اياسىندا ۇسىنىلعان كۋرس مازمۇنى: ۆەب-سايتتار, ءموبيلدى قوسىمشالار, چاتبوتتار مەن باسقا دا كود جازۋدى قاجەت ەتپەيتىن تسيفرلىق ونىمدەر قۇرۋعا ارنالعان «No Code School», قاشىقتان جۇمىس ىستەۋگە, ءوز باعىتىن تاڭداۋعا, قىزمەتتەردى ساتۋعا جانە كليەنتتەردى تارتۋعا ارنالعان «Freelance School», ماقساتتى جارنامانى ازىرلەۋگە, الەۋمەتتىك جەلىدە پاراقشالار جۇرگىزۋگە, ينتەرنەت-دۇكەن اشۋعا, حالىقارالىق ونلاين-الاڭداردا تاۋارلار ساتۋعا, ونلاين-تولەمدەردى قوسۋ مەن كيبەرقاۋىپسىزدىك نەگىزدەرىنە ۇيرەتۋگە ارنالعان «E-commerce» باعدار-لامالارىنان قۇرالعان.
«IT-Aiel 2.0» جوباسىن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, «Astana Hub» حالىقارالىق تەحنوپاركى جانە «TechnoWomen» كوممەرتسيالىق ەمەس ۇيىمى جۇزەگە اسىرىپ كەلەدى. ۇلتتىق كوميسسيانىڭ قولداۋىمەن قىزدار مەن ايەلدەردى IT سالاسىنا باۋلۋعا, ولاردىڭ ستارتاپتارىن قولداۋعا باعىتتالعان «TechGirls», «IT-Aiel» سياقتى جوبالار جىل وتكەن سايىن قارقىندى ىلگەرىلەپ كەلەدى.
