ءوزىنىڭ ايتۋىنا قاراعاندا, ءورت سوندىرۋشىگە كاسىبي بىلىكتىلىگىن عانا ەمەس, سپورتتىق بابىن شىڭداۋ قاجەت. سول سەبەپتەن, ول سپورتتىڭ پاۋەرليفتينگ جانە گرەپپلينگ ءتۇرىن سەرىك ەتىپ ءجۇر. وسى كەزگە دەيىن سپورت شەبەرى نورماسىن ورىنداعان. ماسەلەن, پاۋەرليفتينگتەن الەم چەمپيونى, ازيا چەمپيوناتىنىڭ قولا جۇلدەگەرى اتانعان.
جاقىندا ول كومىر تيەلگەن 94 توننالىق ۆاگوندى سۇيرەدى. ەندى سالماعى 120 توننا بولاتىن 5 ۆاگوندى سۇيرەۋدى ماقسات ەتىپ ءجۇر. ەگەر بۇل ويى ىسكە اسسا, ەلىمىزدە جاڭا رەكورد تىركەلۋى مۇمكىن.
– سپورت – مەنىڭ ءحوببيىم. بۇرىننان اۋىر سالماق كوتەرۋگە قىزىعاتىن ەدىم. سول ماقساتىمدى ورىنداپ ءجۇرمىن. الداعى ۋاقىتتا شاكىرت تاربيەلەپ, وسى سالادا چەمپيوندار دايارلاۋدى كوزدەدىم. جاتتىقتىرۋشىم الەكساندر ليتۆينوۆ جەڭىسكە تالپىندىراتىن كەڭەسىن بەرىپ كەلەدى, – دەيدى ە.برالين.
بالا كۇنىنەن قازاقشا كۇرەس, گىر تاسىن, قوي كوتەرۋ سەكىلدى جارىستارعا ءجيى قاتىسقان. قازىر قايراتتى جىگىت اپتاسىنا ءۇش رەت ءۇش ساعاتتان جاتتىعادى. سونىڭ ناتيجەسىندە 141 كيلو تاستى ەركىن كوتەرەدى. ارماتۋرانى يەدى.
بىلتىر ماڭعىستاۋ وبلىسىندا وتكەن «تولاعاي» اتتى الىپتار سايىسىنىڭ جەڭىمپازى بولعان. سول سايىستا ءبىر مينۋتتا سالماعى 141 كيلو تاستى كوتەرىپ, قاشىقتىققا اپاردى. ۇزىندىعى 80-150 سم, ديامەترى 14-16 مم ارماتۋرانى مويىنعا قويىپ ءيدى. ال ۇزىندىعى 2-3 مەتر, سالماعى 500 كيلو اربانى سۇيرەپ, سالماعى 10 كيلو اعاش نايزانى الىسقا لاقتىردى.
اتىراۋ وبلىسى
