بيىلعى «دارىن» سىيلىعىنىڭ جەڭىمپازدارى قاتارىندا ءتۇرلى بايقاۋلار مەن فەستيۆالدەردىڭ لاۋرەاتتارى, سپورتتىق جارىستاردىڭ جەڭىمپازدارى, قوعام قايراتكەرلەرى مەن بەلسەندىلەر بار. قازىلار القاسى لاۋرەاتتاردى «ادەبيەت», «عىلىم», «ديزاين جانە بەينەلەۋ ونەرى», «جۋرناليستيكا», «كلاسسيكالىق مۋزىكا», «كرەاتيۆتى باستامالار», «سپورت», «تەاتر جانە كينو», «ەسترادا» جانە «حالىق شىعارماشىلىعى» اتالىمدارى بويىنشا سارالاپ, داۋىس بەرگەن.
ماراپاتتاۋ كەزىندە مادەنيەت جانە اقپارات ءمينيسترى ايدا بالاەۆا ەلىمىزدە ورتاق مۇددە مەن ماقساتتاردى ۇستاناتىن پروگرەسسيۆتى ءارى دارىندى بۋىننىڭ ءوسىپ كەلە جاتقانىن اتاپ ءوتتى.
«سىزدەر – حالىقتىڭ ءۇمىتى مەن تىرەگىسىزدەر. ەل پرەزيدەنتى جاستار ءۇشىن ءۇش باستى باعداردى ۇنەمى ايتىپ كەلەدى. ول – بىلىمگە ۇمتىلۋ, ەڭبەكقورلىق جانە پاتريوتيزم. بۇلار – مىقتى ءارى تابىستى ۇلتتىڭ نەگىزى بولاتىن ءۇش تۇعىر. دەمەك ۇلتتىڭ بولاشاعىن سىزدەر ايقىندايسىزدار. سوندىقتان مەملەكەت باسشىسى جاستارعا ۇلكەن ءۇمىت ارتادى. مەملەكەت تاراپىنان جان-جاقتى قولداۋدى جالعاستىرا بەرەدى», دەدى مينيستر.
«تاۋەلسىزدىك ۇرپاقتارى» گرانتىنىڭ يەگەرلەرى رەتىندە ۇزدىك جوبالار ۇسىنعان 30 جاس تاڭدالىپتى. ولاردىڭ جوبالارى مادەنيەت, عىلىم, مەديا, اقپاراتتىق تەحنولوگيالار, بيزنەس سالالارىن قامتيدى. بيىل بايقاۋعا جاڭا «ۆولونتەرلىك» دەپ اتالاتىن باعىت قوسىلدى.
«بۇل گرانت مەملەكەت باسشىسى قاسىم-جومارت توقاەۆتىڭ تاپسىرماسىمەن ازىرلەندى. سوندىقتان بۇگىنگى ماراپاتتارىڭىز – ۇلكەن جاۋاپكەرشىلىك. ەل پرەزيدەنتىنىڭ سەنىمىن اقتايتىندارىڭىزعا شىن جۇرەكتەن سەنەمىن. ءاردايىم بيىكتەردەن كورىنىڭىزدەر!» دەدى ا.بالاەۆا.
سونىمەن قاتار مينيستر سوزىندە جاستارعا ەگەمەندىك پەن ەلدىكتى نىعايتۋداعى نەگىزگى قۇندىلىقتار تۋرالى ايتتى.
«پرەزيدەنتىمىز بيىلعى ۇلتتىق قۇرىلتايدا ەلىمىز ءۇشىن ماڭىزدى بىرنەشە قۇندىلىقتى اتاپ وتكەن ەدى. ول قۇندىلىقتار – تاۋەلسىزدىك جانە وتانشىلدىق, بىرلىك پەن ىنتىماق, ادىلدىك جانە جاۋاپكەرشىلىك, زاڭ مەن ءتارتىپ, ەڭبەكقورلىق جانە كاسىبي بىلىكتىلىك, جاسامپازدىق پەن جاڭاشىلدىق. مەملەكەت باسشىسى بەلگىلەپ بەرگەن ناقتى قۇندىلىقتاردى ۇستانۋ – جاستاردىڭ دامۋىنا, قوعامدىق سانانىڭ وزگەرۋىنە وڭ ىقپال ەتەرى انىق», دەدى مينيستر.
ايتا كەتەيىك, «تاۋەلسىزدىك ۇرپاقتارى» كونكۋرسىنىڭ ءار جەڭىمپازىنا 3 ملن تەڭگە كولەمىندە جۇلدە بەرىلدى. بيىل كونكۋرسقا 1 284 ءوتىنىم ءتۇسىپ, ونىڭ 897-ءسى قابىلداندى.
«دارىن» جاستار سىيلىعىنىڭ 20 جەڭىمپازىنا «دارىن» مەملەكەتتىك جاستار سىيلىعىنىڭ لاۋرەاتى» اتاعى بەرىلىپ, ەستەلىك ستاتۋەتكا مەن اقشالاي سىيلىق تابىستالدى. اراسىندا «جۋرناليستيكا» اتالىمى بويىنشا ات وزدىرعان ارىپتەسىمىز نازەركە جۇماباي دا بار. ارىپتەسىمىزدى اتاۋلى سىيلىعىمەن قۇتتىقتاپ, شىعارماشىلىق تابىس تىلەيمىز.
