سەكتسيالىق وتىرىستاردا استانا قالاسى مەن اقمولا وبلىسىنىڭ 7-9 سىنىپ وقۋشىلارى ءوز جوبالارىن ۇسىندى. ايتا كەتەيىك, كونفەرەنتسياعا قاتىسۋعا 80-نەن اسا بايانداما جىبەرىلىپ, ونىڭ 55-ءى ەكىنشى كەزەڭگە وتكەن.
«بۇگىندە باس شاھارىمىز رەسپۋبليكانىڭ ءىرى ساياسي, ەكونوميكالىق, مادەني جانە عىلىمي ورتالىعىنا اينالدى. استانانىڭ تاريحىن, ەكولوگيالىق جاعدايىن, تۋريستىك ماسەلەلەرىن بالالار وسى باستان ءبىلۋى قاجەت. سوندىقتان ءبىز بۇل جيىنعا وسى سالانىڭ الدىڭعى قاتارلى ماماندارىن شاقىردىق. ولار ەلوردانىڭ وركەندەۋ جولىن, قازىرگى تۇيتكىلدەرىن, بولاشاقتاعى جاي-كۇيىن ورتاعا سالدى. وقۋشىلار دا ويىن بۇكپەي, ۇسىنىستارىن اشىق ايتتى», دەدى پرەزيدەنت ورتالىعى ديرەكتورىنىڭ مىندەتىن اتقارۋشى سەرىك سىدىقوۆ.
قازاقستاننىڭ قۇرمەتتى ساۋلەتشىسى, ساۋلەت عىلىمىنىڭ كانديداتى امانجول چيكاناەۆتىڭ ايتۋىنشا, استانانىڭ باس جوسپارىنا ارنالعان حالىقارالىق بايقاۋعا الەمدىك ساۋلەت ونەرىنىڭ شەبەرلەرى ۇسىنعان بىرنەشە جوبا ساراپتاۋدان وتكىزىلگەن.
«ناقتىراق ايتساق, بايقاۋعا 47 شىعارماشىلىق ۇجىم قاتىستى. مەن ۇيىمداستىرۋ كوميتەتىنىڭ قۇرامىندا بولدىم. بايقاۋدىڭ فينالىندا 3 ۇزدىك جوبا تاڭدالدى. ءبىرىنشى ەسكيزدىڭ اۆتورى – ايگىلى جاپون ساۋلەتشىسى كيسە كۋروكاۆا, ەكىنشى جوبا – وتاندىق ساۋلەتشىلەردىكى, ءۇشىنشى جوبانىڭ اۆتورلارى – رەسەيلىك ماماندار ەدى. استانا ساۋلەتتىك قيالعا شەكسىز ەركىندىك بەردى, ەڭ باتىل ساۋلەتتىك ۇسىنىستاردى شەشۋگە مۇمكىندىك بەردى», دەدى ول.
اتالعان كونفەرەنتسيانىڭ ەرەكشەلىگى – بۇرىن مۇنداي جيىندارعا ەلوردانىڭ قۇرداستارى شاقىرىلاتىن, ال بۇل جولى مەكتەپ وقۋشىلارى مىنبەگە شىعىپ, ۇتىمدى ۇسىنىستارىن ايتتى.
«2010 جىلى استانادا «جابىق قالا» كەشەنىن سالۋ جوسپارلانعان. شۇعىل كونتينەنتالدى سۋىق اۋا رايىنا توتەپ بەرەتىن جوبا 10 مىڭ تۇرعىنعا ەسەپتەلگەن. جەرگىلىكتى ساۋلەتشىلەر كيىز ءۇي سياقتى جاساۋدى ۇسىنىپتى. بىراق كەيىن بۇل جوبا اياقسىز قالدى. ءبىز وسى كەشەننىڭ كەلەشەكتە دە ماڭىزدى ەكەنىن زەرتتەدىك, عالىمدارمەن سۇحباتتاستىق. جالپى ۇزىندىعى ءبىر شاقىرىمدى قامتيدى. كۇمبەز استىندا دامىعان الەۋمەتتىك ينفراقۇرىلىمدار, اتاپ ايتساق, مادەني ورتالىقتار, عىلىمي زەرتحانالار, بوتانيكالىق باقتار مەن ويىن-ساۋىق ورتالىقتارى بوي كوتەرەدى. قىسى-جازى قالىپتى اۋا رايىن ساقتاپ, ءجۇز پايىز ەكولوگيالىق تازالىق كەپىلدىگىن بەرەدى. قالانىڭ اۋماعى شاعىن بولعاندىقتان, ەكونوميكالىق جاعىنان ءتيىمدى. ەڭ باستىسى, تۋريستەردىڭ كوپتەپ كەلۋىن قامتاماسىز ەتەدى. جوبانىڭ رەسمي اتاۋى – باتىعاي. ويتكەنى استانا ماڭىندا بۇرىن وسى اتتاس قالا بولعانىن بىرنەشە تاريحي دەرەكتەر دالەلدەيدى», دەدى استانا قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 7 «ە» سىنىبىنىڭ وقۋشىلارى ومار نۇرلان ۇلى مەن رىسباي بەكزات.
ء«بىلىم سالاسىنداعى ستاتيستيكاعا كوز جۇگىرتسەك, ەلوردانى الماتىدان اقمولاعا اۋىستىرۋ ۋاقىتىندا مۇنداعى مەكتەپتە بار-جوعى 45 مىڭ وقۋشى بولسا, قازىر 300 مىڭنان اسا بالا ءبىلىم الىپ جاتىر. 1997 جىلى قالادا 46 مەكتەپ قانا بولسا, قازىر 200-گە جۋىق ءبىلىم وشاعى بار ەكەنىن اتاپ وتكىم كەلەدى», دەدى استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ.
كونفەرەنتسيا ناتيجەسىندە, ەربولات قاراقات «استانا قالاسىنىڭ تاريحى جانە مادەني مۇراسى (قالا جانە ايماقتىڭ 1991 جىلعا دەيىنگى تاريحى)» سەكتسياسىندا جەڭىمپاز اتاندى. ال «استانا – تاۋەلسىز قازاقستاننىڭ ەلورداسى» باعىتىندا كاميلا ءجۇسىپوۆا 1-ورىن السا, «بولاشاقتاعى استانا» سەكتسياسىندا جانەركە رىسقۇل كوش باستادى.
