«GenCast» اۋا رايى تۋرالى 1979–2018 جىلدارداعى دەرەكتەرگە سۇيەنە وتىرىپ بولجام جاسايدى. بۇل مودەل ەۋروپا مەترولوگيا ورتالىعىنان (ECMWF) اسىپ ءتۇسىپ, ىستىق تولقىن, تروپيكالىق تسيكلوندار سياقتى قاۋىپتى قۇبىلىستاردى ءدال بولجاي العان. ماسەلەن, 2019 جىلى جاپونياعا سوققان حاگيبيس تايفۋنىن «GenCast» ءداستۇرلى جۇيەلەرگە قاراعاندا 12 ساعات ەرتە ەسكەرتكەن. «GenCast» 15 كۇندىك اۋا رايىن نەبارى 8 مينۋتتا بولجايدى, ال باسقا جۇيەلەرگە بىرنەشە ساعات قاجەت.
شويىن ءوندىرۋدىڭ وڭاي جولى
قىتاي عالىمدارى شويىن ءوندىرۋدىڭ جاڭا ءارى ەكولوگيالىق تازا ءادىسىن ويلاپ تاپتى.
بۇل تەحنولوگيا ۇنتاقتالعان تەمىر كەنىن قىزدىرىلعان پەشكە بۇركۋ ارقىلى شويىندى نەبارى 3–6 سەكۋندتا الۋعا مۇمكىندىك بەرەدى. بۇعان دەيىن بۇل ۇدەرىس 6 ساعات ۋاقىت الاتىن. جاڭا ادىستە كومىر قولدانىلمايدى, سوندىقتان كومىرقىشقىل گازىنىڭ ءبولىنۋى ازايىپ, ءوندىرىس ەكولوگياعا قاۋىپسىز بولادى. عالىمداردىڭ ايتۋىنشا, ارنايى قۇرىلعى ساعاتىنا 450 توننا تەمىر كەنىن وڭدەي الادى, ال جىلدىق ءوندىرىس كولەمى 7 ميلليون توننادان اسادى.
اۋە تاكسيى
2025 جىلى ابۋ-دابيدە «Archer Aviation» ستارتاپى نەگىزىندە ازىرلەنگەن اۋە تاكسيى ىسكە قوسىلادى.
ەندى اۋە تاكسيلەرى ابۋ-دابي مەن دۋباي اراسىنداعى جول ءجۇرۋ ۋاقىتىن 10 مينۋتقا قىسقارتادى. «Archer Aviation» ستارتاپ جوباسى بىرىككەن اراب امىرلىكتەرىمەن كەلىسىمشارت جاساستى. ىسكە قوسىلاتىن Midnight مودەلى 241 كم/ساع جىلدامدىقپەن ۇشادى. بۇعان دەيىن كومپانيا جاپونياعا 100 اەروتاكسي جەتكىزۋ تۋرالى كەلىسىم جاساعان. ال لوس-اندجەلەستە اۋە تاكسيى قىزمەتى 2026 جىلى قولجەتىمدى بولماق. سونداي-اق «Archer Aviation» تاياۋ شىعىس پەن سولتۇستىك افريكادا ەلەكترۇشاق ءوندىرىسىن اشۋدى جوسپارلاپ وتىر.
