جالپى, كەيىنگى جىلدارى ءىرى توراپتىق ستانسا قاتارىنداعى سەكسەۋىل كەنتىنە قونىستانۋشىلار قاتارى كوپ. جىل سايىن ءتۇرلى نىساندار اشىلىپ, كاسىپ باستاعاندار دا كوبەيىپ كەلەدى. وسىعان كوڭىل توعايتقانىمىزبەن مۇنداعى مەكتەپ ماسەلەسى كوبىمىزدى كۇمىلجىتە بەرەتىن. كەيىنگى 20-30 جىلدا پايدا بولعان جاڭا اۋدانداعى مەكتەپ ماسەلەسى ءبىراز جىلدان بەرى دۇركىن-دۇركىن كوتەرىلىپ, سالالىق مينيسترلىككە سان مارتە جولدانعانىمەن شەشىلمەي كەلگەنىن دە بىلەتىن ەدىك. كۇندەلىكتى 14 رەلستى كەسىپ ءوتىپ, ورتالىقتاعى ءبىلىم وشاعىنا قاتىناپ جۇرگەن 360 بالانىڭ جايىن ويلاعان جۇرت ءۇمىتى ۇزىلە باستاعاندا 2019 جىلدىڭ 10 جەلتوقسانىندا «Egemen Qazaqstan» گازەتىندە باسىلىمنىڭ وبلىستاعى مەنشىكتى ءتىلشىسى مۇرات جەتپىسبايدىڭ «تەمىرجولدى جاعالاپ توپ بالا ءجۇر» دەگەن ماقالاسى شىعا قالدى. ەرتەسى «وسى ماقالاعا مەملەكەت باسشىسى نازار اۋدارىپ, ۇكىمەتكە تاپسىرما بەرىپتى» دەگەن حاباردى ەستىپ, ءبىر-بىرىنەن ءسۇيىنشى سۇراعاندار كوبەيدى.
وسىلايشا, كەنتتەگى جاڭا اۋداننان ورىن تەپكەن №283 ورتا مەكتەپ 2021 جىلدىڭ 1 قىركۇيەگىندە ەسىگىن ايقارا اشىپ, العاشقى شاكىرتتەرىن قابىلدادى. ەكى اۋىسىمدا 442 بالا ءبىلىم الاتىن مەكتەپتە 20 سىنىپ كەشەنى, سپورت, ءماجىلىس زالدارى, كىتاپحانا مەن اسحانانى ارالاپ كورگەن جۇرتتىڭ سول ساتتەگى قۋانىشىن سوزبەن جەتكىزۋ قيىن ەدى.
وسى كۇنى 300 ورىندىق ءبىلىم وشاعىندا 69 مۇعالىم مەن 37 كىشى قىزمەتكەر جۇمىس ىستەپ, 440 بالا وقىپ جاتىر. ءۇش جىل ىشىندە ۇستازدار مەن وقۋشىلار كوپتەگەن جەتىستىككە جەتتى. بيىلعى وقۋ جىلىندا جالپى ءبىلىم بەرەتىن پاندەر رەسپۋبليكالىق وليمپياداسىنىڭ اۋداندىق كەزەڭىنەن مەكتەپتىڭ 9-11-سىنىپ وقۋشىلارى قۇقىق نەگىزدەرى پانىنەن جۇلدەلى 1-ورىن يەلەنىپ, وبلىسقا جولداما الدى. تاريح, بيولوگيا, اعىلشىن ءتىلى مەن گەوگرافيا پاندەرىنەن دە جۇلدەلى ورىننان كورىندى.
جاڭا مەكتەپ وقۋشىلارى 2021-2022 وقۋ جىلىندا ءۇش ۇزدىك, ءبىر ەرەكشە اتتەستات يەلەنسە, كەلەسى جىلدى ەكى «التىن بەلگى», ءبىر ۇزدىك, ءتورت ەرەكشە اتتەستاتپەن تۇيىندەپتى. بىلتىرعى وقۋ جىلى قورىتىندىسى ءبىر «التىن بەلگى», ەكى ەرەكشە اتتەستات بولىپ وتىر. وسى وقۋ جىلىندا مەكتەپتە ءتورت «التىن بەلگى», ءبىر «ۇزدىك اتتەستات» جانە ءتورت ەرەكشە اتتەستاتتان ۇمىتكەرلەر بار ەكەن.
مەكتەپ شاكىرتتەرى ءتۇرلى عىلىمي جوبالار مەن سپورتتان دا الدا كەلەدى. ءبىلىم ورداسىنداعى ۇستازدار مۇعالىمدەر ليگاسى جارىسىندا ۆولەيبولدان 2-ورىن يەلەندى. «ۇلتتىق مەكتەپ ليگاسى» جوباسىنا قاتىسقان 7-8-سىنىپ وقۋشىلارى ءبىرىنشى ورىن بيىگىنەن كورىندى. مەكتەپ وقۋشىلارى اراسىندا وتكىزىلگەن ءداستۇرلى اۋداندىق سپارتاكيادادا فۋتزالدان 8-9-سىنىپتار وقۋشىلارىنان جاساقتالعان قىزدار كومانداسى ەكىنشى ورىن تۇعىرىنا كوتەرىلدى.
جاڭا ۇلگىدە سالىنعان ەكى قاباتتى مەكتەپ اۋلاسىندا جاسىل جەلەك جايقالىپ, اينالاسى باقشاعا اينالعان. «جاسىل جەلەك» جوباسىمەن جۇمىس ىستەيتىن مەكتەپ اۋلاسىندا وسكەن جەمىستەر مەن باقشا ونىمدەرى مۇمكىندىگى شەكتەۋلى وتباسىلارىنا تاراتىلىپ بەرىلەدى.
جۇرتشىلىق اراسىندا «ەگەمەن» سالدىرعان مەكتەپ» اتالىپ كەتكەن ءبىلىم وشاعىنىڭ بۇگىنگىسى وسىنداي.
تاۋەكەل جۇماعازيەۆ,
زەينەتكەر
قىزىلوردا وبلىسى,
ارال اۋدانى,
سەكسەۋىل كەنتى
