فوتو:اقوردا
پرەزيدەنت رياد قالاسىندا One Water ءسامميتىن ۇيىمداستىرۋعا قولداۋ كورسەتكەنى ءۇشىن قوس كيەنىڭ ساقشىسى, ساۋد ارابياسىنىڭ كورولى سالمان بەن ابدەلازيز ءال ساۋدقا جانە ساۋد ارابياسىنىڭ تاق مۇراگەرى, پرەمەر-ءمينيسترى مۇحاممەد بەن سالمان بەن ابدەلازيز ءال ساۋدقا العىس ايتتى. مەملەكەت باسشىسى قازاقستان مەن فرانتسيانىڭ توراعالىعىمەن ءوتىپ جاتقان سامميت الەمدەگى ەكولوگيالىق كۇن ءتارتىبىن ىلگەرىلەتۋگە ەلەۋلى ۇلەس قوساتىنىنا سەنىم ءبىلدىردى.
قاسىم-جومارت توقاەۆ بيىل قازاقستان مەن ساۋد ارابياسىنىڭ اراسىندا ديپلوماتيالىق قارىم-قاتىناس ورناعانىنا 30 جىل تولعانىن اتاپ ءوتتى. پرەزيدەنتتىڭ ايتۋىنشا, وسى كەزەڭدە ەكى ەل اراسىندا سەنىمدى ساياسي ديالوگ جولعا قويىلىپ, بەرىك قۇقىقتىق بازا قالىپتاستى. سونداي-اق بىرقاتار ينۆەستيتسيالىق جوبالار جۇزەگە استى.
كەزدەسۋ بارىسىندا ەنەرگەتيكا, مۇناي-گاز ونەركاسىبى, كولىك-لوگيستيكا سالالارىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى قاراستىرىلدى.
تاق مۇراگەرى مۇحاممەد بەن سالمان بەن ابدەلازيز ءال ساۋد قازاقستاندى ساۋد ارابياسىنىڭ ورتالىق ازياداعى ماڭىزدى سەرىكتەسى دەپ اتادى. پرەمەر-ءمينيستردىڭ پىكىرىنشە, ەكى ەلدىڭ ساۋدا-ەكونوميكالىق جانە ينۆەستيتسيالىق بايلانىستارىن قارقىندى تۇردە دامىتۋعا مول مۇمكىندىك بار.
اڭگىمەلەسۋ بارىسىندا وڭىرلىك جانە حالىقارالىق كۇن تارتىبىندەگى وزەكتى تاقىرىپتار تالقىلاندى.
