ءنۇراليدىڭ ايتۋىنشا, ويىننىڭ باستى ماقساتى – جاسوسپىرىمدەرگە جەمقورلىقتىڭ زيانىن ءتۇسىندىرۋ ءارى وعان قارسى تۇرۋ مادەنيەتىن قالىپتاستىرۋ. ول وسى ارقىلى مەكتەپ وقۋشىلارىن ادالدىق پەن ادىلدىككە باۋلۋدى كوزدەيدى.
ويىن سيۋجەتى تانىمال ەپوستىق كەيىپكەر الپامىس باتىردىڭ بەينەسىنە نەگىزدەلگەن. الپامىس ءتۇرلى سىناقتان ءوتىپ, ادىلدىك پەن پاراساتتىلىقتى ساقتاپ, جەمقورلىققا قارسى تۇرادى. ءاربىر دەڭگەيدە ويىنشى ءوزىنىڭ ادال ارەكەتتەرى ارقىلى عانا جەڭىسكە جەتە الادى. ويىن كۆەست فورماتىندا جاسالعان. ويىنشى وزىنە جاسىرىن اگەنت نەمەسە جۋرناليست ءرولىن تاڭداي الادى. سونداي-اق تەرگەۋدى سوت, پروكۋرور, مەملەكەتتىك قىزمەتشىلەردىڭ قايسىسىنا قاتىستى جۇرگىزەتىنىن دە ءوزى شەشەدى. ەڭ باستى ماقسات – جەمقورلىقتى اشكەرەلەۋ.
وقۋشىنىڭ بۇل جوباسى مۇعالىمدەر مەن سىنىپتاستارى اراسىندا قىزىعۋشىلىق تۋدىرىپ, ۇلكەن قولداۋعا يە بولدى. جەزكەنت مەكتەپ-ليتسەيىنىڭ اكىمشىلىگى دە ءنۇراليدىڭ باستاماسىن جوعارى باعالاپ, ونىڭ جوباسىن ءارى قاراي جەتىلدىرۋىنە جاعداي جاساۋدى جوسپارلاپ وتىر. قازىرگى ۋاقىتتا ويىن مەكتەپتە قۇقىق نەگىزدەرى ساباعىندا تاجىريبە جۇمىسى رەتىندە ەنگىزىلگەن. مۇعالىمدەر مۇنداي ءادىستى وقۋشىلاردىڭ قۇقىقتىق ءبىلىمىن ارتتىرۋ, جەمقورلىققا قارسى مادەنيەتىن قالىپتاستىرۋ تۇرعىسىنان ءتيىمدى دەپ باعالاپ وتىر.
ءنۇراليدىڭ ايتۋىنشا, ويىننىڭ رۋحاني مازمۇنىنا ەرەكشە نازار اۋدارىلعان. جوبا اۆتورى الداعى ۋاقىتتا ءار دەڭگەيگە ابايدىڭ قاراسوزدەرىن ەنگىزىپ, تاربيەلىك ماڭىزىن ارتتىرۋدى دا كوزدەپ وتىر. سونىمەن قاتار ول ويىننىڭ ءموبيلدى نۇسقاسىن قازاق, ورىس, اعىلشىن تىلدەرىندە ۇسىنۋدى جوسپارلاپ وتىرعانىن ايتتى.
«ويىن ەلىمىزدەگى ناقتى وقيعالارعا نەگىزدەلگەن كوركەم رومان فورماتىندا جاسالعان. ءار ەپيزودتا قىلمىستىق كودەكسكە تۇسىندىرمە بەرىلىپ, وقۋشىلاردىڭ قۇقىقتىق ساۋاتى ارتتىرىلادى. ال ويىن سوڭىندا كوپ ۇپاي جيناعان ويىنشى جەڭىمپاز اتانادى», دەيدى ءنۇرالي.
ايتا كەتەيىك, جاس ونەرتاپقىش جوبانى دامىتۋعا بىلتىر ءى رەسپۋبليكالىق سىبايلاس جەمقورلىققا قارسى جوبالار بايقاۋىندا جەڭىپ العان 1 000 000 تەڭگە سىياقىسىن جۇمساعان. سول ارقىلى ويىننىڭ تەحنيكالىق مۇمكىندىگىن جاقسارتىپ, ونىڭ كوپكە قولجەتىمدى بولۋىنا مۇمكىندىك جاساعان.
قوعامداعى جەمقورلىققا قارى كۇرەس ماسەلەسى – كۇن تارتىبىنەن تۇسپەيتىن وزەكتى تاقىرىپ. ءنۇراليدىڭ ويىنى وسى باعىتتا جاسالعان يگى قادامداردىڭ ءبىرى دەۋگە بولادى. بولاشاعىنان ۇلكەن ءۇمىت كۇتتىرەتىن وقۋشى جوباسى تانىمال بولىپ, قوعامدى وزگەرتۋگە ۇلەس قوسسا ەكەن دەيدى.
