فوتو: ج. جۇمابەكوۆ
ءماجىلىس سپيكەرى ماسكەۋ قالالىق دۋماسىنىڭ دەلەگاتسياسىمەن كەزدەسۋدە ەكى ەل اراسىندا بارلىق دەڭگەيدە ءوزارا تىعىز بايلانىس ورناعانىن اتاپ ءوتتى.
ء«سىزدىڭ ەلورداعا ساپارىڭىز ەكى استانانىڭ وكىلدى ورگاندارى اراسىنداعى ىنتىماقتاستىقتى جاڭا دەڭگەيگە كوتەرەدى. بۇل وتە ماڭىزدى, ويتكەنى استانا مەن ماسكەۋ دەپۋتاتتارى ءوز وڭىرلەرىنىڭ ماسەلەلەرىن جاقسى بىلەدى جانە ەكى ەلوردا اراسىنداعى بايلانىستاردىڭ مازمۇنىن تولىقتىرا الادى», دەدى ەرلان قوشانوۆ.
ءماجىلىس توراعاسى رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ قازاقستانعا جاقىندا جاساعان مەملەكەتتىك ساپارىنىڭ تاريحي ماڭىزدىلىعىنا نازار اۋدارىپ, قازاقستان مەن رەسەي باسشىلارىنىڭ تاتۋ كورشىلىك قاتىناستاردى نىعايتۋداعى ەرەكشە رولىنە جەكە توقتالدى.
ساپار قورىتىندىسى بويىنشا جاڭا جاھاندىق ءتارتىپ جاعدايىندا ستراتەگيالىق سەرىكتەستىكتى تەرەڭدەتۋ تۋرالى بىرلەسكەن مالىمدەمە قابىلداندى. وندا پارلامەنتارالىق ىنتىماقتاستىقتىڭ جوعارى قارقىنى اتاپ وتىلگەن.
«بۇل – ەكى ەل پارلامەنتتەرىنىڭ قارىم-قاتىناسىنا بەرىلگەن وتە جوعارى باعا. ءبىزدىڭ پارلامەنتشىلەر ءبىر-بىرىمەن جەكە دە, جۇمىس بويىنشا دا تىكەلەي بايلانىستا بولىپ, تۋىنداعان ماسەلەلەردى جەدەل شەشۋدە. وسى جازدا مەملەكەتتىك دۋمامەن ىنتىماقتاستىق جونىندەگى پارلامەنتارالىق كوميسسيانىڭ جۇمىسى قايتا جانداندى», دەدى ءماجىلىس سپيكەرى.
الەكسەي شاپوشنيكوۆ قوناقجايلىق ءۇشىن العىسىن ءبىلدىرىپ, استانا ءماسليحاتى مەن ماسكەۋ قالالىق دۋماسى اراسىنداعى ءوزارا ىقپالداستىقتى ودان ءارى دامىتۋدى ۇسىندى. تاراپتار سونداي-اق مادەني, ءبىلىم بەرۋ جانە ەكونوميكا سالالارداعى ىنتىماقتاستىق جونىندەگى بىرقاتار ماسەلەنى تالقىلادى.
