سۋرەت: qarmaqshy-tany.kz
ساپار بارىسىندا ۆيتسە-پرەمەر پەتروپاۆلداعى «بالداۋرەن» باقشاسىندا بولىپ, مەكتەپكە دەيىنگى ءبىلىم بەرۋ ماسەلەلەرى بويىنشا بالاباقشا مەڭگەرۋشىلەرىمەن جينالىس وتكىزدى. كەزدەسۋ بارىسىندا مەكتەپكە دەيىنگى ءبىلىم بەرۋ جۇيەسىندەگى وزگەرىستەر مەن ۆاۋچەرلىك قارجىلاندىرۋ جۇيەسىنىڭ ەنگىزىلۋ ماسەلەلەرى قارالدى. بۇل مەحانيزم پەتروپاۆلدا كەلەر جىلدىڭ مامىر ايىندا ىسكە قوسىلۋى جوسپارلانعان. قازىرگى تاڭدا قالادا 49 بالاباقشا
7 206 بالاعا قىزمەت كورسەتىپ جاتىر.
ۆاۋچەرلىك قارجىلاندىرۋ جۇيەسى تارازدا سىناقتان ءوتىپ, شىمكەنت پەن تۇركىستان قالاسىندا قاناتقاقتى جوبا رەتىندە جۇزەگە اسىرىلۋدا. كەلەسى جىلى بۇل جۇيە ەلىمىزدىڭ بارلىق وڭىرىندە ەنگىزىلەدى.
ۆيتسە-پرەمەر بالاباقشا مەن باستاۋىش سىنىپتارداعى ءبىلىم بەرۋ باعدارلامالارىن بىرىزدەندىرۋدىڭ ماڭىزىن اتاپ ءوتىپ, بۇل ۇدەرىستە بالالاردىڭ جەكە دامۋ كارتالارى ءرولىنىڭ ەرەكشە ەكەنىنە ءمان بەردى. بۇل جاڭالىقتار «بارشاعا قولجەتىمدى ساپالى ءبىلىم» ۇلتتىق بايانداماسىندا قاراستىرىلعان.
ماعجان جۇماباەۆ اتىنداعى IT-مەكتەپ-ليتسەيىندە تامارا دۇيسەنوۆا «Smart» ورتالىعى, روبوتتەحنيكا كابينەتى, قازاق ءتىلى مەن ادەبيەتى ەتنومادەني كابينەتى, «Research» ورتالىعى جانە ينفورماتيكا كابينەتىمەن تانىستى.
سونىمەن قاتار ءبىلىم بەرۋ باسقارمالارىنىڭ باسشىلارى مەن مەكتەپ ديرەكتورلارىمەن «ماقساتتى مەكتەپتەر» جوباسىن جۇزەگە اسىرۋ ماسەلەسى بويىنشا كەزدەسۋ ءوتتى. بۇل جوبا 20 ءبىلىم وشاعىن قامتيدى, ونىڭ قاتارىندا 13-ءى – اۋىلدا. جوبا اياسىندا ادىستەمەلىك قولداۋ, پەداگوگتەردىڭ بىلىكتىلىگىن ارتتىرۋ جانە وقۋ ۇدەرىسىن جاقسارتۋ كوزدەلگەن. قازىرگى ۋاقىتتا ءار مەكتەپ ءۇشىن جەكە دامۋ جوسپارى ازىرلەنىپ, 10 ادىسكەر-مەنتور مەن 500 مۇعالىم وقىتىلعان.
ءوڭىر پەداگوگتەرى جوبانى ىسكە اسىرۋدىڭ وڭ ناتيجەلەرىن ايتتى. ماسەلەن, ۆوزۆىشەنكا ورتا مەكتەبىنىڭ ديرەكتورى ايگۇل مۇقانوۆا جوبا ءبىلىم بەرۋ مەكەمەسىنىڭ ىشكى ماسەلەلەرىن انىقتاۋعا جانە كورسەتكىشتەردى جاقسارتۋ بويىنشا ناقتى ءىس-قيمىل جوسپارىن ازىرلەۋگە كومەكتەسكەنىن اتاپ ءوتتى.
«باستاپقىدا ءبىزدىڭ جوباعا كوڭىلىمىز تولمادى, بىراق جۇمىس بارىسىندا مۇعالىمدەرىمىز ونىڭ ماڭىزىن ءتۇسىندى. جوبا ءالسىز تۇستاردى انىقتاۋعا سەپ بولدى. جوبالاۋ كەڭسەسىمەن ءتيىمدى جۇمىس ىستەۋ جولعا قويىلدى, ال جۇرگىزىلگەن سىرتقى باعالاۋلار ادىستەمەلىك جۇمىستى جاقسارتۋ ءۇشىن جەكە جوسپار قۇرۋعا مۇمكىندىك بەردى», دەدى ا.مۇقانوۆا.
سونداي-اق ۆيتسە-پرەمەر سولتۇستىك قازاقستان جوعارى قۇرىلىس-ەكونوميكالىق كوللەدجىندە دۋالدى وقىتۋ جۇيەسىمەن تانىستى. كوللەدجدە سانتەحنيكالىق, دانەكەرلەۋ, اعاش وڭدەۋ, تاس وڭدەۋ جانە اسپازدىق ماماندىقتار بويىنشا وقىتۋ جۇرگىزىلەدى. ۆيتسە-پرەمەر كوللەدجدىڭ زاماناۋي قۇرالدارمەن جابدىقتالعان شەبەرحانالارىندا وقىتۋ ۇدەرىسىن كورىپ, ستۋدەنتتەرمەن اڭگىمەلەستى.
كوللەدجدە تەحنيكالىق جانە كاسىبي ءبىلىم بەرۋ ۇيىمدارىنىڭ باسشىلارىمەن كەزدەسۋ ءوتتى. پرەزيدەنتتىڭ جۇمىسشى ماماندىقتارى جىلى تۋرالى جاريالاعانىن ەسكەرە وتىرىپ, تجكب جۇيەسىن رەفورمالاۋعا قاتىستى ماسەلەلەر تالقىلاندى. ت.دۇيسەنوۆا كوللەدجدەر ءوڭىر ءۇشىن كادر دايارلاۋدىڭ نەگىزگى بازاسى بولۋعا ءتيىس ەكەنىنە توقتالدى.
قازىرگى تاڭدا وبلىستا 24 كوللەدج بار, ولاردا 11 مىڭنان اسا ستۋدەنت ءبىلىم الۋدا. 13 كوللەدج جۇمىسشى ماماندىقتار بويىنشا كادرلار دايارلايدى, كوللەدجدەر مەن كاسىپورىندار اراسىندا 1 726 كەلىسىمشارت جاسالعان جانە تۇلەكتەردىڭ جۇمىسقا ورنالاسۋ دەڭگەيى 97%-دى قۇرايدى.
ء«بىلىم بەرۋ جۇيەسى ءوزارا بايلانىستى, ءبىرىزدى جانە تۇلعانى دامىتۋعا ارنالعان كوپ دەڭگەيلى جۇيە بولۋعا ءتيىس. بۇل ۇدەرىس بارىسىندا پەداگوگتەرىمىزدىڭ ءرولى زور. مەن ولاردىڭ ەلىمىزدىڭ لايىقتى ازاماتتارىن تاربيەلەۋ ءۇشىن بار كۇش-جىگەرىن جۇمسايتىنىنا سەنىمدىمىن», دەدى ۆيتسە-پرەمەر.
ت.دۇيسەنوۆا پەتروپاۆلداعى جاڭا ۇستەل تەننيسى ورتالىعىندا بولىپ, وڭىردەگى سپورت ۇيىمدارىنىڭ باسشىلارىمەن كەزدەستى. وندا سپورت سالاسىنداعى رەفورمالارعا, ونىڭ ىشىندە باسقارۋدىڭ ۆەرتيكال ماسەلەلەرىنە جانە ءوڭىردىڭ بالالار مەن جاسوسپىرىمدەر سپورت مەكتەپتەرىنە جان باسىنا شاققانداعى قارجىلاندىرۋدى ەنگىزۋگە باستى نازار اۋدارىلدى. تالقىلاۋ بارىسىندا وسى ماسەلەلەر بويىنشا اشىق پىكىر الماسۋ ءوتتى. قازىرگى ۋاقىتتا تۋريزم جانە سپورت مينيسترلىگىندە سالا وكىلدەرىمەن كونسۋلتاتسيالار جۇرگىزەتىن ارنايى جۇمىس توبى جۇمىس ىستەيدى. ايتىلعان ۇسىنىستار مەن ەسكەرتۋلەر تۇپكىلىكتى قۇجاتتى دايىنداۋ كەزىندە ەسكەرىلەدى.
