وبلىستىڭ باس رەپرودۋكتولوگى گۇلنار ەسقايىروۆانىڭ مالىمەتىنە سۇيەنسەك, بىلتىر اتالعان باعدارلاماعا قاتىسقان انالار 51 ءسابيدى ومىرگە اكەلىپتى. نارەستەلەردىڭ اراسىندا 6 ەگىز بولعان. ەندى 54 انا بالا كۇتىپ ءجۇر.
«ەلىمىزدە 5 جىلعا ارنالعان «اڭساعان ءسابي» باعدارلاماسى ىسكە اسىرىلىپ جاتىر. كەيىنگى ەكى جىلعى كورسەتكىشپەن سالىستىرعاندا, بيىل ەكستراكورپورالدى ۇرىقتاندىرۋعا بەرىلەتىن كۆوتا سانى ەكى ەسە ارتتى», دەپ حابارلادى گ.ەسقايىروۆا.
ونىڭ ايتۋىنشا, كۆوتا الۋعا نيەتتى جۇپ ءوزى تىركەلگەن ەمحاناعا ءوتىنىش ءبىلدىرۋى قاجەت. كەيىن بەدەۋلىك بويىنشا ديسپانسەرلىك باقىلاۋعا الىنادى. تولىق مەديتسينالىق زەرتتەۋ جۇرگىزىلىپ, وبلىستىق پەريناتالدىق ورتالىعىنىڭ گينەكولوگ-رەپرودۋكتولوگتەرىنە جولداما بەرەدى.
اتىراۋ وبلىستىق پەريناتالدىق ورتالىعى جانساقتاۋ ءبولىمىنىڭ نەوناتولوگ دارىگەرى اسلان مۇقانوۆتىڭ ايتۋىنشا, جىل باسىنان بەرى 10 مىڭ 522 ءسابي ومىرگە كەلگەنى تىركەلىپ وتىر. ونىڭ ىشىندە شالا تۋعان 482 نارەستە بار.
«بىلتىر 11 مىڭ 326 ءسابيدىڭ 502-ءسى مەرزىمىنەن بۇرىن دۇنيەگە كەلگەن ەدى. ال بيىل ومىرگە 10 مىڭ 522 نارەستە دۇنيەگە كەلدى. ونىڭ اراسىندا 482 ءسابيدىڭ شالا تۋعانى تىركەلدى. مەرزىمىنەن بۇرىن تۋعان سابيلەردىڭ كۇتىمى ەرەكشە بولۋى قاجەت. قازىر پەريناتالدىق ورتالىقتىڭ جانساقتاۋ بولىمىندە 10-عا جۋىق ءسابي جاتىر. شالا تۋعان نارەستەنىڭ ءبىرىنىڭ سالماعى وتە جەڭىل – 690 گرامم», دەيدى ا.مۇقانوۆ.
دارىگەردىڭ دەرەگىنە قاراعاندا, پەريناتالدىق ورتالىقتا 25 نەوناتولوگ بار. ولار شالا تۋعان نارەستەلەردىڭ دەنساۋلىعىن ۇدايى باقىلايدى.
«جالپى, 22 اپتادا 500 گرامم سالماقپەن دۇنيەگە كەلگەن سابيلەر شالا تۋعان بولىپ ەسەپتەلەدى. بىراق بۇدان از سالماقپەن ومىرگە كەلەتىن نارەستەلەردە كەزدەسەدى. ماسەلەن, ون شاقتى جىل بۇرىن اتىراۋ وبلىستىق پەريناتالدىق ورتالىعىندا ءبىر ءسابي جارتى كيلوعا جەتپەيتىن 450 گرامم سالماقپەن ومىرگە كەلدى. ءبىز نارەستەنىڭ قاتارعا قوسىلۋى ءۇشىن قولدان كەلگەن كومەگىمىزدى ايامادىق. قازىر ونىڭ جاسى 13-تە», دەپ مالىمدەدى ا.مۇقانوۆ.
اتىراۋ وبلىسى
