اتالعان سپورتتىق ءىس-شارادا شىمكەنت قالاسىنىڭ باس يمامى باقداۋلەت نۇرمات ۇلى سپورتپەن شۇعىلدانۋ پايعامبارىمىز مۇحاممەدتىڭ (س.ع.س) سۇننەتى ەكەنىن ايتا كەلە, ءدىن مەن ءداستۇردى جالعاعان سپارتاكياداعا دەمەۋشىلىك كورسەتكەن ىزگى جاندارعا جاماعات اتىنان العىسىن ءبىلدىردى.
ال ءدىنتانۋشى, قالانىڭ نايب-يمامى مۇحامەدجان ەستەمىروۆ توعىزقۇمالاق, ارقان تارتىس, اسىق اتۋ, لاڭگى تەبۋ, شەكەم تاس وينى, كىر تاسىن كوتەرۋ, كوكپار, بايگە, ساداق اتۋ, قول كۇرەس سپورتى ەرتە زاماننان كەلە جاتقان حالقىمىزدىڭ ۇلتتىق مۇراسى ەكەنىن, اتالعان سپورت ءتۇرىن ۇمىت قالدىرماي, ۇرپاقتان-ۇرپاققا جەتكىزىپ وتىرۋ ءبارىمىز ءۇشىن پارىز سانايتىنىن ايتتى.
سپارتاكياداعا ۇلتتىق سپورت تۇرىنەن ەلىمىزگە بەلگىلى سايىپقىراندار ابىلاي ماقسۇت, ماقسات ابدىكەرىموۆ پەن ميراس قاراباەۆتار تورەلىك جاسادى. جارىس قورىتىندىسىندا ءى ورىندى «قاراتاۋ» كومانداسى الىپ, سىيلىققا جىلقى مالى تارتىلدى. ءىى ورىن ء«ال-فارابي» توبىنىڭ قانجىعاسىندا كەتتى. ول كومانداعا ماراپات رەتىندە ءىرى قارا مال سىيعا بەرىلدى. ءىىى ورىن يەلەنگەن «تۇران» قۇراماسى قوشقاردى مىسە تۇتتى. ال ىنتالاندىرۋ سىيلىعىنا يە بولعان «اباي» مەن «ەڭبەكشى» كوماندالارى سەمىز توقتىمەن ماراپاتتالدى. ايتا كەتۋ كەرەك, بۇل كوماندالاردىڭ ءبارى دە – شاھارداعى بەس اۋداننىڭ اتىنان سايىسقا شىققان توپتار. ەڭ باستىسى, ءدىن سالاسىنىڭ قىزمەتكەرلەرى سپورتتىق ءىس-شارا ارقىلى كوپشىلىككە, اسىرەسە جاستارعا ۇلكەن ۇلگى-ونەگە كورسەتتى.
جۋىردا قمدب توراعاسى, باس ءمۇفتي ناۋرىزباي قاجى تاعان ۇلىنىڭ باستاماسىمەن ءدىني باسقارمادا ء«دىن مەن ءداستۇر» دەپ اتالاتىن جاڭا ءبولىم اشىلعان بولاتىن. اتالعان ءبولىم يدەياسىنىڭ ناتيجەسىندە, سونىمەن بىرگە ءدىني باسقارما قولعا العان «ىزگى قوعام» جوباسى اياسىندا وسى «Ulttyq sport fest» سپارتاكياداسى ۇيىمداستىرىلىپ وتىر. بۇل سالاماتتى ءومىر سالتىن ناسيحاتتاۋ عانا ەمەس, استانا قالاسىندا وتكەن دۇنيەجۇزىلىك كوشپەلىلەر ويىندارىنىڭ ايماقتاعى كىشىگىرىم جالعاسى ىسپەتتى.
شىمكەنت
