فوتو: ۇكىمەت
پرەمەر-ءمينيستردىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا بەرگەن تاپسىرمالارى اياسىندا جەكە تۇلعالاردىڭ كىرىستەرى مەن مۇلكىن جالپىعا بىردەي دەكلاراتسيالاۋ ماسەلەسى قارالدى.
قارجى ءمينيسترى ءمادي تاكيەۆ بۇگىندە العاشقى ءۇش كەزەڭدە جالپىعا بىردەي دەكلاراتسيالاۋ جۇيەسىنە 4,8 ملن ادام, ونىڭ ىشىندە مەملەكەتتىك قىزمەتشىلەر, كوممەرتسيالىق ۇيىمدار, كۆازيمەملەكەتتىك سەكتور باسشىلارى مەن قۇرىلتايشىلارى جانە ولاردىڭ جۇبايلارى ەنگەنىن حابارلادى. قالعان ساناتتاعى ازاماتتاردىڭ (جەكە قۇرىلىمدار قىزمەتكەرلەرى, زەينەتكەرلەر, ءۇي شارۋاسىنداعى ايەلدەر, ستۋدەنتتەر جانە باسقا دا تۇلعالار) 8 ملن-عا جۋىق ادامنىڭ دەكلاراتسيا تاپسىرۋ مىندەتتەرىنە قاتىستى قارجى ءمينيسترى دەرەكتەر بازاسىن تسيفرلاندىرۋدى جانە قولما-قول اقشاسىز تولەمدەردى دامىتۋدى ەسكەرە وتىرىپ, اتالعان ساناتتاعى ازاماتتاردى اكتيۆتەرى مەن مىندەتتەمەلەرى تۋرالى دەكلاراتسيالار تاپسىرۋدان بوساتۋدى ۇسىندى.
بوساتۋ وسى ساناتتاعى جەكە تۇلعالاردىڭ 90%-دان استامىنا اسەر ەتەدى. دەكلاراتسيالاۋدى كەلەسى ساناتتاعى تۇلعالار ءۇشىن ساقتاۋ ۇسىنىلادى: قر تىسقارى جەرلەردە اكتيۆتەرى بار; ءبىر جىل ىشىندە قۇنى 20 مىڭ اەك (74 ملن تەڭگە) استام سوماعا ساتىپ الۋلار جاساعان; دەربەس سالىق سالىناتىن تابىس العان. ازاماتتارعا ەرىكتى تۇردە دەكلاراتسيالاۋ قۇقىعى بەرىلەتىنىن اتاپ وتكەن ءجون.
پرەمەر-مينيستر ولجاس بەكتەنوۆ اتالعان ۇسىنىستى قولداپ, قارجى, ۇلتتىق ەكونوميكا جانە ادىلەت مينيسترلىكتەرىنە ءۇش كۇن ىشىندە زاڭناماعا قاجەتتى تۇزەتۋلەر دايىنداۋدى جانە ولاردى پارلامەنتتىڭ قاراۋىنا ەنگىزۋدى تاپسىردى.
«قازىر دەكلاراتسيانى 4 ملن-نان استام ادام تاپسىرادى. ولاردىڭ اراسىندا مەملەكەتتىك قىزمەتشىلەر, كۆازيمەملەكەتتىك سەكتور مەن بيزنەس وكىلدەرى بار. 2025 جىلى بارلىق قالعان ساناتتاعى ازاماتتار دەكلاراتسيا تاپسىرادى دەپ جوسپارلانعان بولاتىن. بۇعان حالىق الاڭداۋشىلىق ءبىلدىردى, سوندىقتان اتالعان ماسەلەگە مەملەكەت باسشىسى ءوزىنىڭ نازارىن اۋداردى. بۇگىنگى تاڭدا مەملەكەتتىك ورگانداردىڭ دەرەكتەر بازاسى بارىنشا تسيفرلاندىرىلعان. قارجىلىق جانە ۆاليۋتالىق باقىلاۋ كۇشەيتىلدى. حالىقارالىق كەلىسىمدەر شەڭبەرىندە شوتتار بويىنشا دەرەكتەر الماسۋ جولعا قويىلدى. تسيفرلىق قىزمەتتەر كەڭ تارالعان. سوندىقتان جالپى العاندا, جەكە تۇلعالاردىڭ اكتيۆتەرى بويىنشا بارلىق اقپارات بار. قارجى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى تىركەۋ جانە سالىقتىق باقىلاۋ ءۇشىن بارلىق تسيفرلىق بازالاردان, ونىڭ ىشىندە ەكىنشى دەڭگەيلى بانكتەردەن مالىمەتتەر الۋدى قامتاماسىز ەتكەنى ءجون. سوندىقتان مەن 2025 جىلى ازاماتتاردىڭ قالعان ساناتتارىن اكتيۆتەر تۋرالى دەكلاراتسيالاردى مىندەتتى تۇردە تاپسىرۋدان بوساتۋ تۋرالى قارجى ءمينيسترىنىڭ ۇسىنىسىن قولدايمىن», دەپ اتاپ ءوتتى پرەمەر-مينيستر.
