كتك تەلەارناسى دەرەگىنشە, العاش رەت جاپونيادا وندىرىلگەن ەرەكشە جەمىس ءتۇرى از ۋاقىتتا وڭتۇستىك كورەيانى جاۋلاپ, ارتىنشا جارناماسى جەلدەي ەسىپ, بۇكىل الەمگە تارادى.
الەۋمەتتىك جەلىدە كەڭىنەن تارالعان ءجۇزىم استاناداعى بازارلاردا سامساپ تۇر. ءپىشىنى كادىمگى جۇزىمدەردەن ەكى-ءۇش ەسە ۇلكەن.
- بۇنىڭ ساتىلىمعا شىققانىنا ءبىر اپتاداي بولدى. باستاپقىدا ءبىر كەلىسى سەگىز مىڭنان, قازىر بەس مىڭ تەڭگەدەن ساتىلىپ جاتىر. ساتىپ الماس بۇرىن, استانا قالاسىندا كوتەرمە بازاردان تەكسەرىپ, اسىقپاي, ءوزىم ءدامىن كوردىم, زەرتحانادان شىققان قاعازىن تەكسەردىم, – دەيدى ساتۋشى ارمان ارتىقباەۆ.
وتكەن ايدا تايلاند زەرتحانالارىندا «Shine muscat» ءجۇزىمىنىڭ 24 سىناماسى تەكسەرىلىپ, ونىڭ 23-ىندە ۋلى حيميالىق قالدىقتار تابىلعان. مۇنى بىلگەن تاي بيلىگى ورە تۇرەگەلىپ, زياندى ءونىمنىڭ ساتىلىمىنا تىيىم سالدى. ال قازاقستانعا سول كورەي ەلىنەن دە, كورشىلەس قىتايدان دا جۇزىمدەر جاشىك-جاشىگىمەن ەركىن تاسىمالدانىپ جاتىر. جاۋاپتى ۆەدومستۆو ەندى عانا سورەلەردە توردەن ورىن العان جەمىستى تەكسەرۋدى باستاعانىن جەتكىزدى.
- مينيسترلىك كوميتەتىنىڭ ايماقتارداعى دەپارتامەنتتەرى باقىلاۋ ماقساتىندا وسى ءجۇزىمدى ساتىپ الىپ, قازىر ساراپتاۋعا, زەرتحاناعا جولدادى. ساتىلىمنان الىنعان ونىمدەر تەكسەرىلىپ, ميكوتوكسيندەر, توكسيندى ەلەمەنتتەر, پەستيتسيدتەر جانە دە ت.ب.قاۋىپسىزدىك تالابى بويىنشا تەكسەرىس جۇرگىزىلىپ جاتىر. جۇزىمگە قاتىستى ۋلانۋ فاكتىcى ازىرگە تىركەلگەن جوق جانە دە تۇتىنۋشى تاراپىنان ارىز-شاعىم تۇسپەدى, – دەيدى دسم سانيتاريا-ەپيدەميولوگيانى باقىلاۋ كوميتەتىنىڭ باس ساراپشىسى داناگۇل قاسقاتاەۆا.
دەگەنمەن نۋتريتسيولوگ ماماندار ءجۇزىمنىڭ وسى ءتۇرىن تۇتىنباس بۇرىن, ونى مۇقيات اس سوداسىمەن جۋىپ الۋعا كەڭەس بەرەدى. سونداي-اق, ساتۋشىلاردان تاۋاردىڭ قاۋىپسىزدىك سەرتيفيكاتىن سۇراۋ كەرەك ەكەنىن ايتادى.
- باسقا جۇزىمدەرمەن سالىستىرعاندا قانت دەڭگەيى جوعارىراق. ونى تاسىمالداۋ, ساقتاۋ ءۇشىن, ءوسىرۋ كەزىندە قولدانىلاتىن حيميالىق قوسپالار, ياعني پەستيتسيدتەر مولشەرى جوعارى بولۋى مۇمكىن. ياعني ورتالىق جۇيكە جۇيەسىنە, اس قورىتۋ جۇيەسىنە كەرى اسەرىن, قاۋىپتى اسەرىن تيگىزەدى. قانت ديابەتى بار ادامدارعا وتە زيان. ال پەستيتسيدتەر بارلىق ادامعا زيان. اسىرەسە وسال توپ, ول بىزدە بالالار مەن قارت ادامدار, – دەيدى استانا مەديتسينالىق ۋنيۆەرسيتەتى پروفيلاكتيكالىق مەديتسينا عىلىمي زەرتتەۋ ينستيتۋتىنىڭ وقىتۋشىسى قارلىعاش سۇيىندىك.
