اۆتور اتاپ ايتقانداي, كىتاپقا «بۇگىنگى مەكتەپ وقۋشىلارىنىڭ اتالارى مەن اجەلەرى بالالىق شاقتارىندا باستان كەشكەن» وقيعالارى ارقاۋ بولعان. وسىناۋ بەلگىلى ءبىر تاريحي كەزەڭدە ءومىر سۇرگەن بالاۋسا شاكىرتتەردىڭ قىزىقتى الەمىن ەلەستەتەتىن تۋىندىلار توپتاماسى جاس ۇلاننىڭ وقۋداعى, قوعامدىق پايدالى ەڭبەكتەردەگى ءىس-ارەكەتتەرى, ىزدەنىستەرى, ءوزارا دوستىق قارىم-قاتىناستارى جايىنان سىر شەرتەدى.
ماسەلەن, ء«بىز تابىسار قيىرلار» حيكاياتى ادامگەرشىلىك, ازاماتتىق كوزقاراستارى تۇرلىشە قالىپتاسىپ كەلە جاتقان سىنىپتاستاردىڭ پىكىر قايشىلىعى بارىسىندا ءوزارا قاقتىعىسىپ قالۋى مەن ءتۇسىنىسىپ, تاتۋلاسۋى جونىندە تارتىمدى دا تاعىلىمدى مىسالدى العا تارتادى. ءارتۇرلى تۇرپاتتاعى سىنىپتاستار مىنەز-قۇلقىن ارقاۋ ەتكەن «مەنىڭ دوسىم» اڭگىمەسى دە وقىرمانىن بەي-جاي قالدىرمايدى. بالالاردىڭ العاشقى سەزىمدەرىن سۋرەتتەگەن وزگە تۋىندىلارى دا («كەمپىرقوساق – كوك اسپان», «ەركە», ت.ب.) سۇيسىنە وقيسىز. ال «بەتبۇرىس», «تاجىريبە, قويان جانە ءبىز» حيكاياتتارى بالالاردىڭ وقۋدى ساباقتان تىس جۇمىستاعى عىلىميلىققا پارا-پار ىزدەنىستەرىمەن قالاي ۇشتاستىرعانىن, سول رەتتەگى قارىم-قاتىناستارىن كورسەتەدى.
جيناقتاعى ەكى حيكايات وقىرماندى وقۋشىلاردىڭ عىلىمي-تەحنيكالىق فانتاستيكا كوكجيەگىندە سامعاعان قيالدارىمەن تانىستىرادى. بىرىندە («باتىر-بولات پەن گۇل-جاۋھار») وقۋ وزاتتارى كوسموس ليفتىمەن كوككە كوتەرىلىپ, عارىشتاعى دەمالىس لاگەرىندە شىم-شىتىرىق وقيعالاردى باستان كەشسە, كەلەسىدە («عارىشقا جاياۋ ساياحات») تاۋ ىشىندەگى لاگەردە تىنىعىپ جۇرگەن وقۋشىلار وزگە عالامشاردان كەلگەن كەمەگە كەزىگەدى, ءتۇر-تۇرپاتى وزدەرىندەي, بىراق تاڭىرقارلىق قاسيەتكە يە عارىشكەر بالامەن تانىسادى...
سونداي-اق «سەنىم», «سىنىپتاستار», «ارمانداستار» اتتى حيكاياتتاردا اۋىل مەن قالا مەكتەپتەرىندە وقيتىن جەتكىنشەك, ءجاسوسپىرىم شاكىرتتەردىڭ ارمان-قيالدارى, الەمدى ەرەسەكتەرشە تانۋعا تىرىسۋلارى, بولاشاققا وزدەرىنشە جوسپار قۇرۋلارى جونىندە اڭگىمەلەنەدى.
بالجان حابدينا,
باسپا جانە پوليگرافيا ءىسىنىڭ قايراتكەرى
