اقىلدى كوزىلدىرىك
اتىراۋ قالاسىنداعى ء«بىلىم-يننوۆاتسيا» ليتسەيىنىڭ 11-سىنىپ وقۋشىلارى حايدار اتاگۋللا مەن قايىرحان لۇقپانوۆ ازىرلەگەن «اقىلدى كوزىلدىرىك» ستارتابى الەمنىڭ ۇزدىك 100 جوباسى قاتارىنا ەندى.
جوبا «Jasscience-2024» بايقاۋىندا جەڭىمپاز اتانىپ, دۇنيەجۇزىندەگى ەڭ بەدەلدى باعدارلامالاردىڭ ءبىرى «100 Rise Global Winners 2024» تىزىمىنە ەندى. ناتيجەسىندە, جوبا اۆتورلارىنىڭ ءبىرى حايدار اتاگۋللا الەمنىڭ كەز كەلگەن ۋنيۆەرسيتەتىندە تەگىن وقۋ مۇمكىندىگىنە يە بولدى.
«كوزىلدىرىك RikaAI اتتى جاساندى ينتەللەكت نەگىزىندە جۇمىس ىستەيدى. بۇل – ساۋساقپەن باسۋ ارقىلى ىسكە قوسىلاتىن اقىلدى باعدارلاما. اتالعان جۇيە قولدانۋشىعا قۇلاققاپ كومەگىمەن داۋىستىق تاپسىرمالار بەرەدى ءارى سول ارقىلى قۇرىلعىمەن ءوزارا ارەكەتتەسۋگە مۇمكىندىگى تۋىندايدى. ءبىز ءونىمدى جاساۋ بارىسىندا 3D پرينتەردى قولداندىق, ال كامەرا, قۇلاققاپتار مەن ميكروفوندى ارنايى تاپسىرىس ارقىلى الدىق», دەيدى ح. اتاگۋللا.
قايىرحان لۇقپانوۆتىڭ ايتۋىنشا, كوزىلدىرىكتەر ءتورت نەگىزگى فۋنكتسيانى اتقارادى.
«بىرىنشىدەن, ولار ChatGPT نەمەسە Wikipedia سياقتى قويىلعان سۇراقتارعا جاۋاپ بەرەدى. ەكىنشىدەن, ءماتىندى سكانەرلەپ, دىبىستاپ وقيدى. ۇشىنشىدەن, كوزىلدىرىك قوزعالىس كەزىندە كەدەرگىلەر تۋرالى ەسكەرتىپ وتىرادى, بۇل كورۋ قابىلەتى ناشار ادامدارعا كومەكتەسەدى. تورتىنشىدەن, كوزىلدىرىكتەر بولمەدە بولىپ جاتقان وقيعالار تۋرالى اقپارات بەرىپ, سيپاتتاي الادى. بولاشاقتا ءبىز قۇرىلعىنىڭ قىزمەتىن كەڭەيتۋدى جوسپارلاپ وتىرمىز», دەيدى ق.لۇقپانوۆ.
يننوۆاتسيالىق جوبا
سەمەيدە 11-سىنىپ وقۋشىسى قالالىق ينفراقۇرىلىم مەن ءتۋريزمدى جاقسارتۋعا كومەكتەسەتىن AR-ۆەب قوسىمشاسىن ازىرلەدى. يننوۆاتسيالىق جوبا «اقىلدى قالا» باعدارلاماسى اياسىندا جۇزەگە اسىپ, شاھار ينفراقۇرىلىمىنىڭ جوباسىن جاساۋعا مۇمكىندىك بەرەدى.
جوبا اۆتورى نۇرلىحان ماراتوۆ قاناتقاقتى نۇسقانى كەشىكپەي قولدانىسقا ەنگىزۋدى جوسپارلاپ وتىر. ونىڭ ايتۋىنشا, AR تەحنولوگياسىنا نەگىزدەلگەن قوسىمشا ارقىلى كەز كەلگەن جۇمىستىڭ 3D-مودەلىن كورۋگە بولادى. ياعني ءموبيلدى قوسىمشانى جۇكتەپ, QR-كودتى سكانەرلەۋ جەتكىلىكتى. وسىلايشا, قۇرىلىسى جوسپارلانعان نىسان بەلگىلەنگەن ورىندا پايدا بولادى.
«بۇل قوسىمشانىڭ قولدانىس اياسى وتە كەڭ. تەك قالا قۇرىلىسىندا عانا ەمەس ءبىلىم سالاسىندا دا پايدالانۋعا بولادى. ماسەلەن, تاريح كىتاپتارىندا قولدانىپ, ءار جىلداردا بولعان وقيعالاردى گرافيكا ارقىلى كورسەتۋگە مۇمكىندىك بار. ال ەگەر بيولوگيا ساباعىندا پايدالانساق, QR-كودتى سكانەرلەۋ ارقىلى ادامنىڭ اناتومياسىن كورسەتەدى», دەيدى ن.ماراتوۆ.
وزات وقۋشىنىڭ جەتەكشىسى الما شۇكەجانوۆا نۇرلىحاندى 9-سىنىپتان بەرى باۋلىپ كەلەدى. ءۇش جىلدا شاكىرتى وبلىستىق, رەسپۋبليكالىق جانە حالىقارالىق سايىستاردان جۇلدەسىز قايتپاعان.
«دارىندى وقۋشىمىز AR-ۆەب قوسىمشاسىن وبلىس تۇرعىندارى ءۇشىن قولجەتىمدى ەتۋدى كوزدەيدى. وسى ارقىلى حالىق قالا قۇرىلىسىنا قاتىسا الادى. بەلگىلى ءبىر نىساننىڭ سالىنۋىنا قاتىستى پىكىر قالدىرىپ, ءتىپتى داۋىس بەرەدى», دەيدى ماتەماتيكا ءپانىنىڭ مۇعالىمى ا.شۇكەجانوۆا.
قۇتقارۋشى قۇرىلعى
جەتىنشى سىنىپتا وقيتىن اقتاۋلىق الىشەر اسقاردىڭ قۇرالى سۋعا باتقان ادامعا جەدەل كومەك جىبەرەدى. جوبا ماكەتى شاعىن بىلەزىك پەن قۇتقارۋ قايىعىنان تۇرادى.
دارىندى وقۋشىنىڭ روبوتتەحنيكاعا دەگەن قىزىعۋشىلىعى ەكىنشى سىنىپتان باستالعان.
«ادام سۋعا باتقان كەزدە قولىنداعى بىلەزىك بەلگى بەرەدى. وسىلايشا, قۇتقارۋشى قۇرىلعىمىز باتىپ بارا جاتقان ادامنىڭ قاي ماڭدا ەكەنىن جەدەل انىقتاپ, ميكروتولقىندار ارقىلى ونى تاۋىپ, ومىرىنە اراشا تۇسەدى. بىلتىر اقشۇقىردا 3 بالانىڭ اشىق تەڭىزگە كەتىپ قالعانى مەنى بەيجاي قالدىرمادى. سونداي وقيعا قايتالانباس ءۇشىن وسى جوبانى قولعا الدىم. بۇل قۇرىلعى توتەنشە جاعدايلار قىزمەتىنىڭ جۇمىسىن ايتارلىقتاي جەڭىلدەتەدى. الداعى ۋاقىتتا كاسپي جاعاسىنداعى دەمالىس بازاسىندا سىناقتان وتكىزىپ, وزگە وڭىرلەردەگى تۋريستىك ورىنداردا قولدانۋدى جوسپارلاپ وتىرمىز», دەيدى ول.
