اتالعان كورمەگە جامبىل وبلىسى جۋالى اۋدانى باۋىرجان مومىش ۇلى اۋلىنىڭ ءاليحان بوكەيحان اتىنداعى №15 تىرەك مەكتەپ-ليتسەيىندە تۇسىرىلگەن فوتوسۋرەتتەر قويىلعان. جيىنعا وسى ءبىلىم وشاعىنىڭ ديرەكتورى رۋسلان سايلاۋباەۆ تا قاتىستى.
ء«بىزدىڭ مەكتەپتە 603 بالا ەكى اۋىسىمدا ءبىلىم الىپ جاتىر. تىرەك مەكتەپتەر جەلىسىنە 2023 جىلى كىرگەن ەدىك. سوعان بايلانىستى ماتەريالدىق-تەحنيكالىق بازامىز تولىقتاي جاڭارىپ, وقۋشىلارىمىز وبلىستىق جانە رەسپۋبليكالىق دەڭگەيدەگى روبوتتەحنيكا, عىلىمي جوبالار سايىستارىندا جۇلدە الا باستادى. ماتەريالدىق بازا جاقسارعان سوڭ, ءبىز ءتۇرلى ۇيىرمەلەر اشتىق. ايتالىق, تەلەستۋديا, روبوتتەحنيكاسى, قولونەر شەبەرى, دراما ونەرى, دومبىرا, شاحمات, ارت ستۋدياعا بايلانىستى قىلقالام شەبەرى ۇيىرمەلەرى جۇمىس ىستەپ تۇر. وسىنداي جۇمىستاردىڭ ارقاسىندا اۋىلداعى مەن قالاداعى مەكتەپتەردەگى ءبىلىم ساپاسىنىڭ الشاقتىعى تومەندەپ كەلەدى. سول تالاپتارعا ساي بولعاندىقتان بۇگىنگى كورمەگە ءبىزدىڭ تىرەك مەكتەپ-ليتسەي تاڭدالىپ وتىر», دەدى ر.سايلاۋباەۆ.
«اۋىل مەكتەبى» فوتوكورمەسى – شالعايداعى ءبىلىم بەرۋ مەكەمەلەرىنىڭ زياتكەرلىك الەۋەتىن كوپشىلىككە تانىتۋعا, سونداي-اق اۋىلداعى وقۋشىلاردىڭ دامۋىنا جاڭا سەرپىن بەرەتىن بىرەگەي شىعارماشىلىق جوبا. كرەاتيۆ حاب ديرەكتورى ءارى جوبا جەتەكشىسى توعجان قۇرمانجانقىزىنىڭ ايتۋىنشا, بۇل كوشپەلى كورمە ەندىگى كەزەكتە تۇركىستان قالاسىندا, سوسىن الماتىدا وتەدى.
«ماقساتىمىز – قالا جانە اۋىل جاستارىنا مادەني-رۋحاني قۇندىلىقتاردى تەڭ قولجەتىمدى ەتۋ. وسى سەبەپتەن دە بىزگە ءبىلىم سالاسىن تۇراقتى دامىتۋ قورىنىڭ اۋىل مەكتەپتەرىن جانداندىرۋ جوباسى وتە قاتتى ۇنادى. كورمەنىڭ فوتوگرافتارى – ايگەرىم بەگىمبەت پەن ءسابينا ابدىمالىك. ولاردىڭ وسىعان دەيىن دە الەۋمەتتىك-اعارتۋشىلىق باعىتتاعى كورمەسىن ۇيىمداستىرعانبىز. شىعارماشىلىق توبىمىزبەن بىرگە وسى جوبانى ءۇش اي زەرتتەپ, زەردەلەپ, جارىققا شىعارىپ وتىرمىز. جۇمىس بارىسىندا اۋىلداعى ءبىلىم بەرۋدىڭ جاڭا ءداۋىرى باستالعانىن سەزىندىك. قالانىڭ وزىق مەكتەپتەرىنەن قالىسپايتىن, كەي تۇستا وزاتىن مەكتەپتەر بار ەكەنىنە كوز جەتكىزدىك. سوندىقتان دا ءبىز بۇل ىزگى وزگەرىستەردىڭ ونەر تۋىندىسىنا اينالعانىن, كوپشىلىككە تارالعانىن قالادىق», دەدى توعجان قۇرمانجانقىزى.
كورمە بارىسىندا فوتوسۋرەتشىلەر شىعارماشىلىق ويلارىن ورتاعا سالىپ, جوبانىڭ بىرنەشە كەيىپكەرىن تانىستىردى.
«شىنىمدى ايتسام, مەن ءوزىم دە اۋىلدا ەسكى مەكتەپتە ءبىلىم الدىم. ءبىزدىڭ اۋىلدا بىردە-ءبىر ۇيىرمە بولعان جوق. ساباقتان كەيىن تەك ءۇي شارۋاسىمەن عانا اينالىستىق. ءبىزدى دامىتاتىن, وسىرەتىن, شىعارماشىلىعىمىزدى بايىتاتىن ەش نارسە بولمادى. بۇل جوباعا شاقىرعان كەزدە, ارينە, قۋاندىم. ويتكەنى مەن ءبىر جىلدارى شىمكەنتتەگى نازارباەۆ زياتكەرلىك مەكتەبىندە جۇمىس ىستەدىم. ول جاقتاعى مۇمكىندىكتەردى, بالالارعا جاسالعان جاعدايدى, ۇيىرمەلەردى, ءبىلىم ساپاسىن كوزىممەن كوردىم. سودان سوڭ مۇنداي يگىلىكتەر نەگە ءبىر عانا مەكتەپتە بولۋى كەرەك دەگەن ويعا قالدىم. وسى كورمەگە ارقاۋ بولعان جۋالى اۋدانىنداعى ءبىلىم وشاعىنا بارعاندا سول نزم-نىڭ اۋىلداعى ۇلگىسىن كورگەندەي بولدىم. قاراڭىز, مەكتەپتە تەلەستۋديا بار. وقۋشىلار وزدەرى اۋىلدىڭ جاڭالىقتارىن جازادى. كامەراعا وزدەرى تۇسىرەدى, وزدەرى مونتاجدايدى, سوسىن وزدەرى مەكتەپتەرىندە ەكراننان كورسەتەدى. ياعني وسىلاي اۋىل مەكتەپتەرىندە دە جاعداي جاساۋعا بولاتىنىن پاش ەتكىم كەلدى», دەدى ايگەرىم بەگىمبەت.
ايتا كەتەيىك, وسىناۋ يگىلىكتى فوتوكورمە «ÓzgeEpic» كرەاتيۆ حابىنىڭ باستاماسىمەن جانە ءبىلىم سالاسىن تۇراقتى دامىتۋ قورىنىڭ قولداۋىمەن جۇزەگە استى.
