سۋرەت: krmm.kz
جيىن بارىسىندا ۇلتتىق تەستىلەۋ ورتالىعىنىڭ ديرەكتورى بولاتبەك ءابدىراسىلوۆ ۇبت-نىڭ 20 جىلدىق تاريحىنداعى اتاۋلى جەتىستىكتەر مەن ماڭىزدى جوبالاردى تانىستىردى.
«2004 جىلى ەنگىزىلگەن وسىناۋ تەستىلەۋ جۇيەسى مەكتەپ بىتىرۋشىلەرىنىڭ ءبىلىمىن باعالاۋعا دەگەن كوزقاراستى تۇبەگەيلى وزگەرتىپ, جوعارى وقۋ ورىندارىنا ءتۇسۋدىڭ نەگىزگى تەتىگىنە اينالدى. ەكى ونجىلدىق ىشىندە ۇبت زاماناۋي تەحنولوگيالار مەن عىلىمي تاسىلدەرگە نەگىزدەلگەن ەلىمىزدەگى وقىتۋدىڭ اجىراماس بولىگىنە اينالدى. ءدال وسى تەستىلەۋ جۇيەسى بۇرىنعى فورماتتا جالعاسا بەرەدى. بىراق سۇراقتاردىڭ مازمۇنىن وزگەرتىپ, اشىق تەستىلەۋدەن ءوتۋىمىز كەرەك. ويتكەنى ۇبت وقۋشىنىڭ ءبىلىمىن عانا باعالايدى. بىراق مۇنىمەن شەكتەلمەي, بالالاردىڭ باسقا دا قابىلەتتەرىن انىقتاۋىمىز قاجەت. بالالارىمىزعا قاجەتتى اقپاراتتى ىزدەۋگە, ونى پراكتيكالىق ماقساتتا پايدالانۋعا ۇيرەتۋىمىز كەرەك. ۇبت وقۋعا ءتۇسۋ قۇرالى عانا بولماي جۇمىستا, عىلىمي سالادا دا قولدانسا دەيمىز. جاھاندىق ەمتيحان سالاسىنىڭ ماماندارىمەن اقىلداسىپ, ءبىلىم مەن قابىلەتتى انىقتاۋدىڭ وزىق تۇستارىن تالقىلاۋ – بۇگىنگى جيىننىڭ باستى ماقساتى», دەدى بولاتبەك سەرىكباي ۇلى.
ءىس-شارا بارىسىندا اقش, رەسەي, تۇركيا, وزبەكستان, قىرعىزستان ەلدەرىندەگى ەمتيحان ورتالىقتارىمەن ءوزارا ىنتىماقتاستىقتى قولداۋ مەن دامىتۋعا باعىتتالعان مەموراندۋمدارعا قول قويىلدى. سونىمەن قاتار كەزدەسۋدە حالىقارالىق ساراپشىلار ءبىلىم ناتيجەسىن جاساندى ينتەللەكت ارقىلى باعالاۋ, وقىتۋدىڭ ساپاسىن ارتتىرۋ سەكىلدى تاقىرىپتاردا پىكىر الماستى.
عىلىم جانە جوعارى ءبىلىم ءمينيسترى ساياسات نۇربەك كونفەرەنتسيانىڭ ماڭىزىن ەسكەرە وتىرىپ, بۇل شىعارماشىلىق يدەيالاردى تالقىلاۋعا, بولاشاقتى بولجاۋعا, سونداي-اق وزىق ءبىلىم مەن تاجىريبە الماسۋعا باعىتتالعان بىرەگەي جوبا ەكەنىن اتاپ ءوتتى.
«ۇبت – وقىتۋ ۇدەرىسىنىڭ ماڭىزدى بولىگى. جيىرما جىل ىشىندە ۇلتتىق بىرىڭعاي تەستىلەۋ جوعارى وقۋ ورىندارىنا تۇسۋگە قولجەتىمدىلىك پەن اشىقتىقتى قامتاماسىز ەتەتىن ماڭىزدى قۇرالعا اينالدى. حالىقارالىق ستاندارتقا ساي ءدال وسى جۇيە ءار تۇلەكتىڭ الەۋمەتتىك نەمەسە گەوگرافيالىق جاعدايىنا قاراماستان, ساپالى ءبىلىم الۋعا تەڭ مۇمكىندىك بەرەدى. ۇبت دەگەنىمىز جاي ەمتيحان ەمەس, بۇل – بىزگە تالانتتاردى انىقتاۋعا, وقۋشىلاردى ىنتالاندىرۋعا, ولاردىڭ بىلىمگە دەگەن قۇشتارلىعىن ارتتىرۋعا كومەكتەسەتىن قۇرال. جيىرما جىلداعى ماڭىزدى ۇدەرىس – ەمتيحاننىڭ تسيفرلاندىرىلۋى. ەندىگى مىندەتىمىز – قول جەتكىزگەن ناتيجەلەردى ساقتاپ قانا قويماي, العا قاراي ۇمتىلۋ. ويتكەنى ۋاقىت تالابىنا ساي سىن-تەگەۋرىنگە دايىن بولۋ وتە ماڭىزدى», دەدى مينيستر.
