فوتو: عىلىم جانە جوعارى ءبىلىم مينيسترلىگى ءباسپاسوز قىزمەتى
ءىس-شارانىڭ اشىلۋ سالتاناتىنا قازاقستان رەسپۋبليكاسى عىلىم جانە جوعارى ءبىلىم مينيسترلىگى مەن وقۋ-اعارتۋ مينيسترلىگىنىڭ باسشىلىعى, «Educational Testing Service» ETS (اقش), «AQA» ( ۇلىبريتانيا), National Foundation For Educational Research (NFER) ( ۇلىبريتانيا), Dutchtestologis (نيدەرلاندى), «TÖMER» ورتالىعى (تۇركيا), Vantage Labs كومپانياسى (اقش) سىندى تەستولوگيا سالاسىنداعى الەمنىڭ جەتەكشى كومپانيالارىنىڭ باسشىلارى مەن وكىلدەرى, ەۋرازيا ءبىلىم بەرۋ ساپاسىن باعالاۋ قاۋىمداستىعىنىڭ وكىلدەرى, رەسەي, وزبەكستان, قىرعىزستان, ازەربايجان, تاجىكستان, ارمەنيا ەلدەرىنىڭ ەمتيحان ورتالىقتارىنىڭ وكىلدەرى, سونداي-اق باعالاۋ تەحنولوگيالارى مەن پەداگوگيكالىق ولشەمدەر سالاسىنداعى وتاندىق عالىمدار مەن ماماندار قاتىستى.
عىلىم جانە جوعارى ءبىلىم ءمينيسترى ساياسات نۇربەك كونفەرەنتسيانىڭ ماڭىزدىلىعىن ەسكەرە وتىرىپ, بۇل شىعارماشىلىق يدەيالاردى تالقىلاۋعا, بولاشاقتى بولجاۋعا, سونداي-اق وزىق ءبىلىم مەن تاجىريبە الماسۋعا باعىتتالعان بىرەگەي جوبا ەكەنىن اتاپ ءوتتى.
«ۇبت – ءبىلىم بەرۋ پروتسەسىنىڭ ماڭىزدى بولىگى. بۇگىنگى تاڭدا ءبىزدىڭ مىندەتىمىز – قول جەتكىزگەن ناتيجەلەردى ساقتاپ قانا قويماي, العا قاراي ۇمتىلۋ. ءبىز تەحنيكانىڭ قارقىندى دامۋىن تولىقتىرۋ مەن ءبىلىمدى باعالاۋدىڭ جاڭا تاسىلدەرى داۋىرىندە ءومىر ءسۇرىپ جاتىرمىز, ياعني ۋاقىت تالابىنا ساي, سىن-تەگەۋرىنگە دايىن بولۋ ماڭىزدى», دەدى مينيستر.
ۇلتتىق تەستىلەۋ ورتالىعىنىڭ ديرەكتورى بولاتبەك ابدراسيلوۆ ۇبت-نىڭ 20 جىلدىق تاريحىنداعى اتاۋلى جەتىستىكتەرى مەن ماڭىزدى جوبالارىن تانىستىردى.
«2004 جىلى ەنگىزىلگەن تەستىلەۋ مەكتەپ بىتىرۋشىلەرىنىڭ ءبىلىمىن باعالاۋعا دەگەن كوزقاراستارىن تۇبەگەيلى وزگەرتىپ, ەلدەگى جوعارى وقۋ ورىندارىنا ءتۇسۋدىڭ نەگىزگى تەتىگىنە اينالدى. ۇبت قازاقستان ءبىلىم بەرۋ جۇيەسىنىڭ ءبىلىمدى باعالاۋ جانە ستۋدەنتتەردى ىرىكتەۋدەگى ەلەۋلى وزگەرىستەر مەن رەفورمالاردى بەينەلەيتىن نەگىزگى بولشەگى بولىپ تابىلادى. ەكى ونجىلدىق ىشىندە ۇبت زاماناۋي تەحنولوگيالار مەن عىلىمي تاسىلدەرگە نەگىزدەلگەن كۇردەلى جانە كوپقىرلى جۇيەگە ءارى قازاقستانداعى ءبىلىم بەرۋ جۇيەسىنىڭ اجىراماس بولىگىنە اينالدى», دەدى بولاتبەك سەرىكباي ۇلى.
ءىس-شارادا ورتالىق قالىپتاسقان ساتتەن بەرى باسقارعان باسشىلار ماراپاتتالدى. سونداي-اق اقش, رەسەي, تۇركيا, وزبەكستان, قىرعىزستان ەلدەرىنىڭ ەمتيحان ورتالىقتارىمەن ءبىلىم دەڭگەيىن باعالاۋ جانە دامىتۋ اياسىندا ءوزارا ىنتىماقتاستىقتى قولداۋ مەن دامىتۋعا باعىتتالعان مەموراندۋمدارعا قول قويىلدى.
كەزدەسۋدە حالىقارالىق ساراپشىلار ءبىلىم بەرۋدىڭ ناتيجەلەرىن باعالاۋ, ءبىلىم ساپاسىن ارتتىرۋ, جاساندى ينتەللەكت پەن جاڭا تەحنولوگيالار سياقتى ماڭىزدى تاقىرىپتار اياسىندا الەمدىك تاجىريبە جانە جەتىستىكتەرمەن ءبولىستى.
كونفەرەنتسيانىڭ سەكتسيالىق وتىرىستارىندا جەتەكشى وتاندىق جانە شەتەلدىك پراكتيك-عالىمدار ءوز كەيستەرىن ۇسىنىپ, ءىس-شاراعا قاتىسۋشىلارمەن بىرەگەي تاجىريبەلەرىمەن الماستى.
كونفەرەنتسيانىڭ جۇمىسى ماڭىزدى دوڭگەلەك ۇستەلگە جالعاسىپ, ءبىلىم بەرۋ ساپاسىن باعالاۋ سالاسىنداعى زاماناۋي سىن-قاتەرلەر, مۇمكىندىكتەر, سونىمەن قاتار تەستولوگيا سالاسىنداعى مامانداردى دايارلاۋدىڭ قازىرگى مىندەتتەرى مەن بولاشاعى تالقىلاندى.
