ەڭسەلى بالاباقشا ءۇش قاباتتى, جالپى اۋماعى ءۇش مىڭ شارشى مەتردى قۇرايدى. وندا بالالاردىڭ زامان تالابىنا ساي جان-جاقتى دامۋىنا بارلىق قولايلى جاعداي تۋعىزىلعان. كەڭ دە جارىق اسحانا, مۋزىكا, دەنە شىنىقتىرۋ زالدارى بار. مۇندا بالالاردىڭ دامۋىنىڭ دەڭگەيىن ەسكەرە وتىرىپ, تولىمدى, جان-جاقتى ىقپال جاسايتىن بىلىكتى ماماندار جۇمىس ىستەيتىن بولادى. ءسوز اراسىندا نۇرلىكوش ەلدى مەكەنىندە كىلەڭ قانداستار تۇراتىندىعىن, وسى اۋدانداعى تۇڭعىش مەكەمەنىڭ پايدالانۋعا بەرىلگەندىگىن ايتا كەتكەننىڭ ارتىقتىعى بولماس.
– بالاباقشا اۋىل تۇرعىندارىنا وتە قولايلى, – دەپ اتاپ ءوتتى وبلىس اكىمى مارات احمەتجانوۆ. – ەلىمىزدىڭ ەرتەڭىن كوركەيتەتىن بالالارعا وسىنداي جاقسى جاعداي تۋعىزۋ ءبىزدىڭ مىندەتىمىز. جاڭا بالاباقشانىڭ اشىلۋى – اۋىلدىق جەرلەردە ءبىلىم جۇيەسىن دامىتۋدىڭ ماڭىزدى قادامى. مۇنداي جوبالار مەكتەپكە دەيىنگى مەكەمەلەردىڭ قولجەتىمدىلىگىن قامتاماسىز ەتەدى.
كوكشەتاۋ
