نەگىزگى ماقسات – مەملەكەت باسشىسىنىڭ ەكونوميكانى ءارتاراپتاندىرۋ مەن ءوسىمنىڭ جاڭا مۇمكىندىكتەرىن دامىتۋ جونىندەگى تاپسىرمالارىن جۇزەگە اسىرۋ.
«بايتەرەك» حولدينگىنىڭ ەكونوميكانىڭ ءتۇرلى سالالارىندا پيلوتتىق جوبالاردى ىسكە اسىرۋداعى جاڭا تاسىلدەرى قاراستىرىلدى. بۇل ينۆەستيتسيالىق جوبالاردى قاراۋ تالاپتارىن جەڭىلدەتۋ جانە بىرىزدەندىرۋ, سونداي-اق ءوتىنىم بەرگەننەن باستاپ, جوبالىق قۋاتقا شىققانعا دەيىن بيزنەس-باستامالارعا قولداۋ كورسەتۋگە باعىتتالعان.
ءبىرىنشى كەزەڭدە تاماق ونىمدەرىن ءوندىرۋ, تەرەڭدەتە وڭدەلگەن مەتاللۋرگيا ونىمدەرى مەن باسقا دا جوبالار قاراستىرىلدى.
«بايتەرەك» حولدينگى ەنگىزگەن بىرىڭعاي جانە جەڭىلدەتىلگەن وتىنىمدەردى قاراۋ رەگلامەنتى بيزنەسكە كورسەتىلەتىن مەملەكەتتىك قولداۋدىڭ اشىقتىعىن ءارى تيىمدىلىگىن ارتتىرادى, سونداي-اق ىشكى نارىقتا وتاندىق ءونىمنىڭ ءوسۋ قارقىنىن ارتتىرىپ, ەكسپورتتىق مۇمكىندىكتەردى كەڭەيتەدى.
پرەمەر-مينيستر بيزنەسكە كورسەتىلەتىن قولداۋ شارالارىنىڭ تيىمدىلىگىن ارتتىرۋ ماقساتىندا اكىمشىلىك شىعىنداردى ازايتۋ قاجەتتىگىن اتاپ ءوتتى.
«مەملەكەتتىك ورگاندار مەن دامۋ ينستيتۋتتارى بيزنەسپەن بارىنشا قولايلى جاعداي رەجىمىندە جۇمىس ىستەپ, ەلىمىزگە قاجەت ەكسپورتقا باعىتتالعان وندىرىستەردى دامىتۋعا دايىن ءتيىمدى كاسىپكەرلەردى بەلسەندى ىزدەۋى كەرەك», دەپ اتاپ ءوتتى و.بەكتەنوۆ.
ۇكىمەت باسشىسى ءىرى كاسىپورىنداردىڭ شاعىن جانە ورتا بيزنەسپەن تىعىز جۇمىس ىستەۋىنىڭ ماڭىزىن ەرەكشە اتاپ ءوتتى. وتاندىق وندىرۋشىلەردىڭ تاۋارلارى, قىزمەتتەرى مەن جۇمىستارىن ساتىپ الۋ بويىنشا ءوز ۋاقىتىندا وففتەيك-كەلىسىمدەر جاساۋ قاجەتتىگى ايتىلدى. وسىلايشا, قولداۋ شارالارى تەك بەلگىلى ءبىر كاسىپكەرلەرگە عانا ەمەس, جالپى قازاقستاندىق ءوندىرىستى دامىتۋعا وڭ اسەر ەتۋگە ءتيىس.
ۇلتتىق ەكونوميكا مينيسترلىگىنە مۇددەلى مەملەكەتتىك ورگاندار مەن ايماق اكىمدىكتەرى, «بايتەرەك» حولدينگى مەن «اتامەكەن» ۇلتتىق پالاتاسىمەن بىرلەسە جاڭا پرواكتيۆتى جۇمىس فورماتىنا كوشۋدى جەدەل تۇردە قامتاماسىز ەتۋ تاپسىرىلدى.
