جالپى ۇزىندىعى 68,7 شاقىرىم جەلىنىڭ توزعان تۇستارىن الماستىرىپ, جاڭارتۋ جۇمىستارى تولىق اياقتالىپ, سۋ بەرىلە باستادى. ءسوز اراسىندا 337 شاقىرىمدىق سۋ قۇبىرى ەگىندىكول مەن قورعالجىن اۋداندارىنىڭ 14 مىڭنان استام تۇرعىنىن اۋىزسۋمەن قامتاماسىز ەتەدى. توزىعى جەتكەن قۇبىردىڭ جايى بىرنەشە جىلدان بەرى اۋىل تۇرعىندارى ءۇشىن وتكىر ماسەلەگە اينالىپ كەلگەن ەدى.
– بۇل ماسەلەنى مەملەكەت باسشىسى ەرەكشە باقىلاۋعا الدى. جاڭارتۋ جۇمىستارى باستالعانعا دەيىن ماگيسترالدى سۋ قۇبىرىنىڭ 90 پايىزدان استامى اپاتتى جاعدايدا بولدى, – دەپ اتاپ ءوتتى وبلىس اكىمى مارات احمەتجانوۆ, – اپاتتىڭ ءجيى ورىن الۋى حالىققا ايتارلىقتاي قولايسىزدىق تۋعىزدى. ماڭىزدى ماسەلەنى شەشۋ ماقساتىندا سۋ رەسۋرستارى جانە يرريگاتسيا مينيسترلىگى 2022 جىلى نۇرا سۋ قۇبىرىن جاڭارتۋ, قاجەتتى جوبالىق-سمەتالىق قۇجاتتاما ازىرلەۋدى باستاعان ەدى. اۋقىمدى شارا ساتىمەن اياقتالىپ, حالىق سۋدان تاپشىلىق كورمەيتىن بولدى.
جاڭارتۋ جۇمىستارى مامانداندىرىلعان مەردىگەر ۇيىمداردى تارتا وتىرىپ, كەزەڭ-كەزەڭمەن جۇرگىزىلدى. قورعالجىن اۋدانىنا قاراستى سابىندى اۋىلىنىڭ باس قۇرىلىستارىنان ەگىندىكول اۋىلىنا دەيىنگى ماگيسترالدى جەلىلەردىڭ ابدەن توزىعى جەتكەن بولىگىندەگى جۇمىستى ءساتتى اياقتاعان «Bertys Construction» سەرىكتەستىگىنىڭ تياناقتى جۇمىسىن اتاي كەتكەن ءجون. مەردىگەر 68,7 شاقىرىم سۋ قۇبىرىن سالىپ, ونىڭ بويىنا 78 قۇدىق ورناتتى. جاڭا جەلىلەر قارعالى, جانتەكە, قۇمكول, توعاناس ەلدى مەكەندەرى تۇرعىندارىنىڭ سۋعا دەگەن سۇرانىسىن وتەيدى. جەلى بويىنداعى كەيبىر قۇبىرلاردى جۋ, تازارتۋ جۇمىستارى تولىق اياقتالدى.
– حالىقتىڭ وتىنىشىنە قۇلاق اسقان باسشىلارعا مىڭ العىس. وسى ءبىر جاناشىر قادام ەل ىشىنە جاقسىلىق لەبى بولىپ تارادى, – دەيدى ەگىندىكول اۋىلىنىڭ تۇرعىنى بەگىندىك ءابىلوۆ, – ەندى اۋىل تۇرعىندارى وزگە وڭىرگە جايلى جەر ىزدەپ, قونىس اۋدارۋىن توقتاتاتىن شىعار.
بيىل ۇكىمەت رەزەرۆىنەن ەگىندىكول, قورعالجىن اۋداندارىنىڭ سۋ قابىلداعىش قۇرىلعىلارىن جاڭعىرتۋعا قوسىمشا قاراجات ءبولىندى. جاڭا سۋ قۇبىرى ەكى اۋدان تۇرعىندارىنىڭ تازا اۋىزسۋعا ۇزدىكسىز قول جەتكىزۋىن قامتاماسىز ەتپەك.
اقمولا وبلىسى
