- جۇپتىق سايىستارداعى ەلىمىزدىڭ ءبىرىنشى راكەتكاسى اننا دانيلينا رەسەيلىك يرينا حروماچەۆامەن بىرگە قىتايدىڭ ۋحان قالاسىندا وتكەن WTA 1000 تۋرنيردە توپ جاردى. فينالدا ولار اقش-تىڭ وكىلدەرى – ايشا مۇحامماد پەن دجەسسيكا پەگۋلادان 6:3, 7:6 ەسەبىمەن باسىم ءتۇستى.
- گرەپپلينگتەن استانادا ءوتىپ جاتقان الەم چەمپيوناتىندا ەلىمىزدىڭ جاسوسپىرىمدەر (U15, U17) مەن جاستار (U20) قۇراما كوماندالارى تابىستى ونەر كورسەتتى. 88 جۇلدە (16 التىن, 29 كۇمىس, 43 قولا) جەڭىپ العان جەرلەستەرىمىز جالپى ەسەپتە جەكە-دارا كوش باستادى. بۇل جارىستا بارلىعى 30 مەملەكەتتەن كەلگەن 1 800 سپورتشى كۇش سىناستى.
- استانادا فۋتزالدان ەلىمىزدىڭ سۋپەركۋبوگى ساراپقا سالىندى. «سايران ارەنادا» ۇيىمداستىرىلعان ماتچتا ەل چەمپيونى «سەمەي» مەن ەل كۋبوگى يەگەرى «قايرات» شەبەرلىك بايقاستى. بۇل تارتىس 3:1 ەسەبىمەن الماتىلىقتاردىڭ پايداسىنا شەشىلدى. باسەكە بارىسىندا ەكى دوپتى اليسسون نەۆەس سوقسا, كايو رۋيز ءۇشىنشى گولدىڭ اۆتورى اتاندى. سەمەيلىكتەر ساپىنان كايو توررەس مەرگەندىك تانىتتى.
- مانەرلەپ سىرعاناۋدان الماتىدا وتكەن دەنيس تەننىڭ مەموريالىندا باس جۇلدەنى ولجالاعان ميحايل شايدوروۆ الەمدىك رەيتينگتە ەكى ساتىعا جوعارىلاپ, قازىردە 11-ورىندا تۇر. ەندى ول فرانتسيادا شىمىلدىعى تۇرىلەتىن گران-پري دوداسىنا قاتىسادى. ەگەر وسى تۋرنيردە دە ءساتتى ونەر كورسەتسە, وندا جەرلەسىمىز توپ-10-دىققا ەنەتىنى انىق. بۇگىنگى تاڭدا ۇزدىكتەر كوشىن امەريكالىق يليا مالينين باستاپ تۇر.
- فۋتزالدان ەلىمىزدىڭ ايەلدەر قۇراماسى كەلەسى جىلدىڭ 21 قاراشاسى مەن 7 جەلتوقسان ارالىعىندا فيليپپيندە جالاۋى جەلبىرەيتىن الەم چەمپيوناتىنىڭ ىرىكتەۋ تۋرنيرىنە دايارلىعىن باستادى. بۇل كۇندەرى قىزدارىمىز استانادا وقۋ-جاتتىعۋ جيىنىن وتكىزىپ جاتىر. ىرىكتەۋ سىنىنىڭ ەليتالىق توبىندا كۇش سىناسۋ قۇرمەتىنە يە بولعىمىز كەلسە, الدىمەن نيدەرلاند پەن پولشانى ۇتۋىمىز كەرەك. بۇل باسەكەلەر ەلورداداعى «سايران ارەنادا» وتەدى.
- قۇرلىقتىق حوككەي ليگاسىنىڭ (قحل) بيىلعى ماۋسىمىندا جەڭىلىستەن كوز اشپاعان استانانىڭ «بارىس» كلۋبىنىڭ باس ديرەكتورى بوريس يۆانيششەۆ ءوز ورنىن بوساتتى. ەندى ونىڭ ورنىنا ولەگ بولياكين («بارىستىڭ» باس مەنەدجەرى), راحات مارجىقباەۆ («بارىستىڭ» سپورتتىق ديرەكتورى), ۆياچەسلاۆ بوريسوۆ (جەكە حوككەي كلۋبىنىڭ باسشىسى), باۋىرجان گايسانىڭ (كوكشەتاۋ قالاسىنىڭ بۇرىنعى اكىمى, كاسىپكەر) ءبىرى كەلۋى مۇمكىن دەگەن ءسوز بار.
- الماتىدا شاڭعىمەن ترامپليننەن سەكىرۋدەن ەل چەمپيوناتى اياقتالدى. ك125 جاتتىعۋىندا دانيل ۆاسيلەۆ باس جۇلدەنى ولجالاسا, سابىرجان مومىنوۆ پەن يليا ميزەرنىح كۇمىس پەن قولا مەدال ەنشىلەدى.
