كونفەرەنتسياعا قاتىسۋشىلارعا كوللەدج تاريحىن تاسپالاعان دەرەكتى فيلم ۇسىنىلىپ, مۇحتار اۋەزوۆتىڭ ەسكەرتكىشىنە گۇل شوقتارىن قويۋ ءراسىمى وتكىزىلدى. ءىس-شارادا وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا, پەداگوگيكالىق عىلىمدارىنىڭ دوكتورى, پروفەسسور اسقاربەك قۇسايىنوۆ, پارلامەنت سەناتىنىڭ دەپۋتاتى التىنبەك نۇح ۇلى كوللەدجدىڭ ءبىلىم ۇدەرىسىندەگى ءرولى, ونىڭ جاڭاشىلدىقتارى مەن قوعامعا تيگىزگەن اسەرى تۋرالى ويلارىن ورتاعا سالدى. سونىمەن قاتار بايانداماشىلار مۇنداي كونفەرەنتسيالار ءبىلىم سالاسىنداعى ىنتىماقتاستىقتى نىعايتۋعا, تاجىريبە الماسۋعا جانە بولاشاق ۇرپاققا ۇلگى بولاتىن تۇلعالاردى تانىتۋعا زور مۇمكىندىك بەرەتىنىن اتاپ ءوتتى.
كونفەرەنتسيا اياسىندا سەمينار-پراكتيكۋم, فوتوكورمە جانە مۇراعات ماتەريالدارى نەگىزىندە جاساقتالعان قۇجاتتار كورمەسى ۇيىمداستىرىلدى. سونداي-اق تانىمال تۇلەكتەرگە ارنالعان تاقىرىپتىق كابينەتتەردىڭ تۇساۋى كەسىلىپ, «وقۋ ورنىنىڭ تۇلەكتەرى – تاريحي تۇلعالار» تاعزىم تاقتاسى اشىلدى. اكادەميك قانىش ساتباەۆ, الكەي مارعۇلان, اقىن-جازۋشى تۇرلىحان قاسەن ۇلى, عالىم قايىم مۇحامەدحانوۆ سياقتى تۇلعالارعا ارنالعان كابينەتتەر اشىلدى.
مەرەكەلىك ءىس-شارا بارىسىندا 22 مۇعالىم وقۋ-اعارتۋ مينيسترلىگىنىڭ قۇرمەت گراموتاسى, وقۋ-اعارتۋ مينيسترلىگىنىڭ العىسى, «ى.التىنسارين» توسبەلگىسى, ء«بىلىم بەرۋ ءىسىنىڭ قۇرمەتتى قىزمەتكەرى» توسبەلگىسى, «تەحنيكالىق جانە كاسiپتiك ءبىلىم بەرۋ iسiنiڭ ۇزدiگi» سياقتى ماڭىزدى ماراپات تابىستالدى. بۇعان قوسا وبلىس اكىمدىگى تاراپىنان كوللەدج ۇجىمىنا 10 ملن تەڭگەلىك سەرتيفيكات تارتۋ ەتىلدى. ال ۇزدىك ستۋدەنتتەرگە «ۇزدىك اۋەزوۆشى», «اسىلحان بەكباەۆ اتىنداعى شاكىرتاقى» تاعايىندالدى.
وسىعان دەيىن مۇحتار اۋەزوۆ اتىنداعى پەداگوگيكالىق كوللەدجىنىڭ 120 جىلدىق مەرەيتويى اياسىندا «قاراجىرا» اق دەمەۋشىلىگىمەن سالىنعان «ەس-ايماق» رۋحاني ورتالىعىنىڭ سالتاناتتى اشىلۋ ءراسىمى وتكەن. ەكى قاباتتى عيماراتتىڭ جالپى اۋماعى 2 500 شارشى مەتر. جاڭا عيمارات ستۋدەنتتەر كامپۋسىنىڭ ورتاسىندا ورنالاسقان, زاماناۋي جابدىقتارمەن قامتاماسىز ەتىلگەن. جاڭا ورتالىق 500 ستۋدەنتكە ارنالعان. 7 ارنايى كابينەت پەن زال بار. كونتسەرت زالى 300 ورىنعا شاقتالعان. وندا زاماناۋي LED ەكران, جارىق جانە دىبىس قوندىرعىلارى, اۆتوماتتاندىرىلعان ساحنا مەحانيزمدەرى مەن جۇمساق ورىندىقتارمەن جابدىقتالعان.
مۇحتار اۋەزوۆ, جۇسىپبەك ايماۋىت ۇلى, قانىش ساتباەۆ, الكەي مارعۇلان, شاكەن ايمانوۆتاي تۇلعالاردىڭ ءىزى قالعان وقۋ ورداسى كەلەشەكتە دە ءبىرتۋار تۇلعالارعا تۇعىر, ونەرلى ۇل-قىزداردىڭ رۋحاني قۋاتىن ارتتىراتىن وردا بولارى ءسوزسىز.
اباي وبلىسى
