مەنىڭ ايتايىن دەگەنىم, اۋىلدارداعى ايران, ءسۇت, قىمىز, قىمىران, سارى ماي, ىرىمشىك, جەنت, قۇرت دايىندايتىن ەڭبەگى ادال جەكە كاسىپكەرلەردىڭ باستامالارىن لايىقتى باعالاساق. ماسەلەن, شيپالى سۋسىن – قىمىزدى الايىقشى. «قىمىز – قانىم, جىلقى – جانىم» دەگەندى اتام قازاق باياعىدا-اق ايتىپ كەتكەن جوق پا؟ «بيەنىڭ ءسۇتى – سارى بال, قىمىزدان اسقان ءدام بار ما؟» دەپتى كەزىندە اقتامبەردى جىراۋ. قىمىز – ءارى تاعام, ءارى ەم. بۇل شيپالى سۋسىن تىرشىلىك تىنىسىن سىيلاپ, دەرت بويلاعان دەنەنى جازا الادى. كەشەگى پاندەميا كەزىندە جۇرتشىلىق بۇعان انىق كوز جەتكىزدى, ودان شيپا تاپتى.
شالعايداعى سوزاق اۋدانىنىڭ ورتالىعى شولاققورعان اۋىلىندا شيپالى سۋسىن – ساۋمال مەن قىمىز دايىندايتىن وراز دەگەن جەكە كاسىپكەر تۇرادى. قىس, جاز دەمەي, اۋىلداستارىن بيەنىڭ سۇتىمەن قامتاماسىز ەتىپ كەلەدى. قاناعاتشىل جىگىتتىڭ قويعان باعاسى دا اناۋ ايتقانداي قىمبات ەمەس, قولجەتىمدى.
بىزدىكى جەرگىلىكتى جەردەگى اتقارۋشى ورگاندار وسىنداي قاراپايىم ەڭبەك ادامدارىنىڭ كاسىبىنە قولداۋ كورسەتىپ, مورالدىق, ماتەريالدىق جاعىنان دەمەپ وتىرسا دەگەن تىلەك قانا. جوعارىدا ايتقان ۇلت ساۋلىعىن نىعايتۋ ءىسى وسىنداي جانداردىڭ ارقاسىندا مۇمكىن بولماق.
كارىباي امزە ۇلى,
ەڭبەك ارداگەرى
تۇركىستان وبلىسى
كوشپەلىلەر ويىندارىنىڭ ونەگەسى
جاقىندا استانا قالاسىندا V دۇنيەجۇزىلىك كوشپەلىلەر ويىندارى دۇركىرەپ ءوتتى. وعان الەمنىڭ 85 ەلىنەن ءتورت مىڭعا جۋىق قاتىسۋشى كەلدى. ويىنداردىڭ اشىلۋى مەن جابىلۋى سالتاناتتارى, جالپى ۇيىمداستىرىلۋ دەڭگەيى وتە جوعارى بولدى. ءتىپتى, وليمپيا ويىندارىنان كەم ەمەس دەپ باعا بەرگەندەردىڭ پىكىرلەرىمەن دە كەلىسۋگە بولاتىنداي. ال بۇل جايت ەلىمىزدە تۇراتىن كىم-كىمنىڭ دە بويىندا ماقتانىش سەزىمىن تۋدىرعانى انىق.
اتالعان كەڭ اۋقىمدى الاماننىڭ مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعانى, ونىڭ اسا جوعارى دەڭگەيدە ۇيىمداستىرىلىپ, وتكىزىلۋىنە سەپتىگىن تيگىزدى دەۋىمىز كەرەك. بۇعان ەلىمىزدىڭ بارلىق ءوڭىرى ۇلكەن ۇلەس قوسقانىن دا ريزاشىلىق سەزىمىمەن ەرەكشە اتاپ وتۋگە ءتيىسپىز. مۇنىڭ ءوزى الداعى ۋاقىتتا ەلىمىزدەگى ۇلتتىق سپورت تۇرلەرىن ءارى قاراي دامىتۋعا سەرپىن قوساتىنى كۇمانسىز.
جارىس كەزىندە وعان دايىندىق بارىسىندا شاعىن جانە ورتا كاسىپكەرلىك, ونىڭ ىشىندە تۋريزم, حالىق قولونەرى, قىزمەت كورسەتۋ سالالارىنداعى مۇمكىندىكتى ىسكە اسىرۋعا بارلىق جاعدايدىڭ جاسالعانى انىق كورىنىپ تۇردى. ال كەڭ كولەمدى مادەني جانە سپورتتىق باعدارلامالار ەلىمىزدەگى ەتنو ءتۋريزمدى دامىتۋعا دا ءوز ۇلەسىن قوساتىن بولادى. وسى ورايدا, اسىرەسە, ءوزىم كۋا بولعان, شەتەلدىك مەيمانداردى تاڭداي قاقتىرارلىقتاي ەتىپ اسەم بەزەندىرىلگەن ەتنواۋىل كەشەنىنىڭ كۇنىنە 30 مىڭداي كەلۋشىنى قابىلداعانىن ايرىقشا اتاپ وتسەم دەيمىن.
جالپىكوماندالىق ەسەپتە ەلىمىزدىڭ وزگە قاتىسۋشى مەملەكەتتەردەن وق بويى وزىپ كەتكەنى دە قۋانتارلىق جاعدايلاردىڭ ەڭ باستىسى بولدى. كەلەسى ويىنداردىڭ كورشى قىرعىز رەسپۋبليكاسىندا وتەتىنى دوداعا ەكى ەل قاتىسۋشىلارى اراسىنداعى باسەكەنى قىزدىرا تۇسەتىندىگىمەن قاتار, دوستىق قارىم-قاتىناستىڭ بەكۋىنە دە ىقپال ەتەتىن بولادى دەپ ۇمىتتەنەمىز.
تيمۋر ايساريەۆ,
ءىت تەحنولوگ, كوشپەلىلەر ويىندارىنىڭ جانكۇيەرى
اتىراۋ وبلىسى
بالالار ءسۋيتسيدى – قاتەرلى ماسەلە
سوڭعى كەزدەردە ءجاسوسپىرىم ۇل-قىزدىڭ ءوز-وزىنە قول سالۋ وقيعالارىنىڭ تىم جيىلەپ كەتۋى كىم-كىمدى دە ويلاندىرسا كەرەك. بۇل جايتتىڭ بۇگىندە قوعامنىڭ وزەكتى ماسەلەسىنە اينالىپ بارا جاتقانى دا بەلگىلى. وسى سەبەپتى اتالعان ماسەلە قىرىق جىلدىق پەداگوگتىك ءوتىلى بار ۇستاز رەتىندە مەنى دە بەي-جاي قالدىرماي, قولىما قالام العىزدى.
الاڭداتارلىق احۋالعا بايلانىستى وي-پايىمىمدى ورتاعا سالايىن. ەرتەرەكتە بۇل جايت دابىل قاعىپ, كۇن تارتىبىنە شىعارارلىقتاي دەڭگەيدە ەمەس ەدى. ىشىندە ءبىردى-ەكىلى سوتقارلارى بولماسا, وقۋشى بالالار قالادا دا, دالادا دا نەگىزىنەن ءتارتىپتى, اتا-اناسى مەن جاقىندارىنىڭ, مۇعالىمدەرىنىڭ ايتقاندارىن ەكى ەتپەي ورىنداۋعا تىرىساتىن. ءوز-ءوزىن ءولتىرۋ دەگەن جانتۇرشىكتىرەر ويلار ولاردىڭ ءوڭى تۇگىلى تۇستەرىنە دە كىرىپ شىقپايتىن.
بەرتىن كەلە جاعداي كەرى كەتە باستاعانىنىڭ كۋاگەرى بولىپ وتىرمىز. كەيىنگى جىلدارى مەكتەپكە بارعان بالانىڭ بۋللينگكە تاپ بولاتىنى تۋرالى كوپ ايتىلىپ ءجۇر. ماسەلەن, كەيبىر دەرەكتەر ەلىمىزدە ءاربىر ءۇشىنشى ءجاسوسپىرىم سىنىپتاستارى تاراپىنان قىسىمعا ۇشىرايتىنىن كولدەنەڭ تارتادى. بۇعان جاسى ۇلكەن وقۋشىلاردىڭ الىمجەتتىگىن قوسساق, جاعدايدىڭ قاي سيپاتتا ءوربيتىنىن بولجاي بەرۋگە بولادى. «بۋللينگكە ۇشىراعان بالا ودان قۇتىلۋدىڭ جولىن تابا الماعان سوڭ, ءوز-ءوزىن ولىمگە قيۋعا ءماجبۇر بولادى», دەيدى پسيحولوگ ماماندار.
بۇل ازداي, كەيىنگى كەزدەرى بالالاردى سۋيتسيد جاساۋعا يتەرمەلەيتىن گادجەتتەگى كەيبىر ويىندار تۋرالى كوپ ايتىلا باستادى. «جەل بولماسا, ءشوپتىڭ باسى قيمىلدامايدى» دەگەندەي, بۇعان دا قاجەتتى دەڭگەيدە ءمان بەرىلۋى كەرەك. جالپى, وقۋشى مىنەز-قۇلقىنىڭ كەنەتتەن وزگەرگەنىن اتا-انا بىردەن بايقاۋى كەرەك ەمەس پە؟ مۇعالىمدەر, ءبىرىنشى كەزەكتە سىنىپ جەتەكشىسى قايدا قارايدى دەگەن دە سۇراق تۋىندايدى.
بالا ولىمىنە اپاراتىن سەبەپتىڭ ۇلكەنى, مەنىڭشە, نەمقۇرايدىلىقتا جاتىر. بۇل جەردە ۇلكەن جاۋاپكەرشىلىك, اسىرەسە, اتا-انانىڭ موينىنا جۇكتەلۋگە ءتيىس.
جامال سماعۇلوۆا,
زەينەتكەر ۇستاز, «ى.التىنسارين» توسبەلگىسىنىڭ يەگەرى
اقمولا وبلىسى,
ءبىرجان سال اۋدانى
