بيىل ۇزدىك ناتيجە كورسەتكەن ەلىمىز كومانداسىنىڭ قۇرامىندا الماتى قالاسىنىڭ فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ وقۋشىلارى ەرداۋلەت تۇرگەنباەۆ, ءالفيا بايجاقىپ, نۇرجان كوكەەۆ, دوسجان دايران جانە قادىلبەك داستان بار. جەتەكشىلەرى – نۇرداۋلەت دوسماعامبەت پەن دۋلات بايتۇلەنوۆ.
«بۇعان دەيىن اتالعان سايىستان بىردە-ءبىر مەملەكەت ەكى دۇركىن جەڭىمپاز اتانعان ەمەس, ال ءبىزدىڭ وقۋشىلارىمىز ءۇشىنشى جىل قاتارىنان جەڭىس تۇعىرىنان كورىندى. وسى تۇستا استىن سىزىپ ايتقانىمىز ءجون, ءار جارىسقا ۇنەمى جاڭا ويىنشى اتتانىپ وتىرادى, ياعني ءبىر وقۋشى ەكى رەت قاتىسپايدى. ولار سايىستىڭ ۇلتتىق كەزەڭىندە ىرىكتەلەدى. بالالار الەمدىك دوداعا ءبىر جارىم اي قارقىندى دايىندالىپ, كۇن سايىن روبوتتىڭ جۇمىسىن جەتىلدىردى. وليمپيادادا كوماندا ازىق-ت ۇلىك ماسەلەسىن شەشۋگە باعىتتالعان جوبانى ۇسىندى», دەدى «USTEM Foundation» قوعامدىق قورىنىڭ باسشىسى ءارى ۇلتتىق قۇرامانىڭ باپكەرى اسىلبەك مىرزاحمەتوۆ.
ەلىمىز 2022 جىلى جەنەۆادا, 2023 جىلى سينگاپۋردە جەڭىسكە جەتكەن ەدى. ۇلتتىق قۇراما وقۋ-اعارتۋ مينيسترلىگىنىڭ, «دارىن» رەسپۋبليكالىق عىلىمي-پراكتيكالىق ورتالىعىنىڭ, سونداي-اق الماتى قالاسى اكىمدىگىنىڭ قولداۋىمەن وتكەن روبوتتەحنيكادان ىرىكتەۋ كەزەڭدەرىندە قۇرىلدى.
